މޮޅެތި ރިސޯޓް، ހޮޓާ މެނޭޖްމަންޓުތަކުން ދަންނާނެ މުވައްޒަފުންގެ މުހިންމުކަން: މައުސޫމް

ރާއްޖޭގެ މޮޅެތި ރިސޯޓާއި ހޮޓާތަކުގެ މެނޭޖްމަންޓުތަކަށް މުވައްޒަފުންގެ މުހިންމުކަން މިހާރު އެނގޭނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޙީގައި ވާހަކަދައްކަވަމުން މައުސޫމް ވިދާޅުވީ ފަތުރުވެރިކަމުގެ ދާއިރާގައި އެންމެ މުހިންމު ކަމަކީ މެހެމާންދާރީ ކަމަށެވެ. މެހެމާންދާރީއާ ގުޅޭ ކަންކަން ކިޔަވައިދެވުނު ނަމަވެސް އަސްލު މެހެމާންދާރީއަކީ މީހާގެ ހިތުން އަންނަ އެއްޗެއްކަމަށާއި ދިވެހިން ތަފާތުވަނީ އޭގެ ސަބަބުން ކަމަށް އޭނާ ވިދާޅުވިއެވެ.

މައުސޫމް ވިދާޅުވީ ދިވެހި މުވައްޒަފުން އަދާ ކުރާ މެހެމާންދާރީގެ ސަބަބުން އެ މުވައްޒަފުންނާއި ފަތުރުވެރިންނާ އޮންނަ ގުޅުން ބަދަހިވާ ކަމަށާއި އޭގެ ސަބަބުން އެ މުވައްޒަފު އެ ފެސިލިޓީއަކަށް މުހިންމުވާ ކަމަށެވެ. އެގޮތުން، މުވައްޒަފު އެހެންތަނަކަށް ބަދަލުވެއްޖެ ނަމަ ބައެއް ފަތުރުވެރިން ވެސް އޭނާ ދާ ތަނަކަަށް ދާކަން ފާހަގަކުރެވޭ ކަމަށާއި އެހެންވެ، މިއަދު ގިނަ ތަންތަނުން އެފަދަ މުވައްޒަފުން އުފާކޮށްފައި ބަހައްޓަން ކުރެވެން އޮތް ހުރިހާ ކަމެއް ކުރަމުންދާނެ ކަމަށް ވިދާޅުވިއެވެ.

ފަތުރުވެރިކަމުގެ ދާއިރާގައި ކުރިއަށް އޮތްތަނުގައި ގިނަ އެނދުތައް އުފެދިގެން އަންނައިރު ދިވެހި މުވައްޒަފުން ބޭނުންވާނެކަން ވެސް މިނިސްޓަރު މައުސޫމް ވަނީ ފާހަގަކުރައްވާފައެވެ. އަދި ތަފާތު ދާއިރާތަކުން އިސް މަގާމުތަކުގައި ދިވެހިން ތިބުމަކީ ވެސް މުހިންމުކަމެއް ކަމަށް އޭނާ ވިދާޅުވިއެވެ.

މައުސޫމް ވިދާޅުވީ ރާއްޖޭގައި ފަތުރުވެރިކަމުގެ ދާއިރާގައި ދިވެހިންނަށް ގިނަ ފުރުސަތުތައް ފަހިކުރަން ޖެހޭއިރު އެނދުތައް ގިނަވުމުގެ ސަބަބުން ބޭރުން ވެސް މުވައްޒަފުން ގެންނަން ޖެހޭނެ ކަމަށެވެ. ބޭރުން މުވައްޒަފުން ގެނައި ނަމަވެސް ދިވެހިން ބޭނުންވާ ވަޒީފާތައް ދިވެހިންނަށް ލިބޭ ގޮތަށް އޮންނަން ޖެހޭނެ ކަމަށް ވެސް ވިދާޅުވިއެވެ.