ސަރުކާރުން ފޯރުކޮށްދެމުންދާ ބޯހިޔާވަހިކަމުގެ ދަށުން ފްލެޓް ލިބިފައިވާ ފަރާތްތަކުގެ ތެރެއިން 31-41 އިންސައްތަ މީހުން ގަވާއިދުން ކުލި ދައްކަމުން ނުދާކަމަށް ހައުސިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

އެމްއޭސީއެލުން އެ ކުންފުނީގެ މުވައްޒަފުންނަށް އިމާރާތްކުރި ޓަވަރުތަކުގެ މަސައްކަތް ނިންމައި، އެތަންތަން ލިބުނު ފަރާތްތަކާ ތަޅުދަނޑި ހަވާލުކުރުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވަނީ, އެ ފްލެޓްތައް ލިބޭ ފަރާތްތަކުން އެގޮތަށް އަމަލުނުކުރުމަށް އެދިވަޑައިގެންފައެވެ. އެ ފްލެޓްތަކަކީ ފައިސާ ދައްކައިގެން އެތަން އަމިއްލަކުރުމުގެ ފުރުސަތު ލިބޭ ސްކީމުތަކުގެ ދަށުން އަޅާ ފްލެޓްތަކަށް ވާއިރު، ފައިސާ ނުދެއްކުމަކީ ސަރުކާރަށް އުފުލަންޖެހޭ ބުރައެއްކަން އަސްލަމް ވަނީ ފާހަގަކުރައްވާފައެވެ. މީގެ އިތުރުން އެއީ ދެމެހެއްޓެނިވި ގޮތެއްގައި އެ މަޝްރޫއުތައް ކުރިއަށް ގެންދަން ބޭނުންނަމަ ބަދަލުކުރަންޖެހޭ ކަމެއް ކަމަށްވެސް އަސްލަމް ވިދާޅުވިއެވެ.

އެގޮތުން 1990ގެ ފަހުކޮޅާއި 2000ގެ ކުރީކޮޅު ސަރުކާރުން އަޅާފައިވަނީ 100 އެއްހާ ފްލެޓް ކަމަށާއި، އޭރު ފައިސާ ނުދެއްކުމުން ސަރުކާރަށް ބުރަނުވިނަމަވެސް މިހާރު ހާހުން ފްލެޓް އަޅަމުންދާއިރު އެއީ ސަރުކާރަށް ބޮޑު ބުރައަކަށް ވާނެކަން އަސްލަމް ފާހަގަކުރެއްވިއެވެ.

މިނިސްޓަރ މި މޭރުމުން ވާހަކަފުޅުދައްކަވާފައިވާއިރު، ހިޔާ މަަޝްރޫއުގެ ދަށުން ފްލެޓް ލިބުނު ބައެއް މީހުން ވަނީ ކުލި ދައްކަން ދެކޮޅުހަދާފައެވެ. އެ މީހުން އެގޮތަށް ކަންތައްކުރީ ސަރުކާރުން ފްލެޓަށް ކަނޑައެޅި އަދަދު ބޮޑުކަމަށް ބުނެއެވެ. އެހެންނަމަވެސް އެޗްޑީސީން ވަނީ ކުލި ނުދައްކާ މީހުންނަށް ޖޫރިމަަނާއާއެކު ފައިސާ ދައްކަން އަންގައި ލިޔުން ފޮނުވާފައެވެ.