އެމްއޭސީއެލްއަކީ މުވައްޒަފުން މަސައްކަތްކުރަން އެންމެ ރަނގަޅު އެއް ކުންފުނި: ސީއީއޯ
މި މަޝްރޫއުގެ ދަށުން 300ށްވުރެ ގިނަ ފްލެޓް އަޅާފައިވޭ
އެމްއޭސީއެލް މެނޭޖިންގ ޑިރެކްޓަރު އަދި ސީއީއޯ، މަހްޖޫބް ޝުޖާއު
ވެލާނާ އިންޓަރނޭޝަނަލް އެއާޕޯޓް ހިންގާ ކުންފުނި އެމްއޭސީއެލްއަކީ މުވައްޒަފުންނަށް މަސައްކަތްކުރަން އެންމެ ރަނގަޅު އެއް ކުންފުނިކަމަށް، އެމްއޭސީއެލް މެނޭޖިންގ ޑިރެކްޓަރު އަދި ސީއީއޯ، މަހްޖޫބް ޝުޖާއު ވިދާޅުވެއްޖެއެވެ.
އެމްއޭސީއެލްއިން އިމާރާތްކޮށްފައިވާ ފްލެޓްތަކުގެ މަސައްކަތް ނިންމައި އެ ފްލެޓްތައް މުވައްޒަފުންނާ ހަވާލުކުރުމުގެ ރަސްމިއްޔާތުގައި ވާހަކަފުޅުދައްކަވަމުން އޭނާ ވަނީ މުވައްޒަފުންނަށް ވަރަށް ބޮޑަށް ތައުރީފްކުރައްވާފައެވެ. އެގޮތުން އެ ކުންފުންނަކީ ގާތްގަނޑަކަށް 56 އަހަރުގެ ތާރީޚެއް އޮތް ކުންފުންޏަކަށް ވާއިރު، އެ ކުންފުންޏަކީ ސަރުކާރު ކުންފުނިތަކުގެ ތެރެއިން އެންމެ ރަނގަޅަށް މަސައްކަތްކުރާ އެއް ކުންފުނިކަން އޭނާ ފާހަގަކުރެއްވިއެވެ. އެ އަމާޒު ހާސިލްވަނީ މުވައްޒަފުންގެ ބުރަ މަސައްކަތާއި ހީވާގިކަމުން ކަމަށްވެސް އޭނާ ވިދާޅުވިއެވެ.
މީގެ އިތުރުން ތަފާތު ކާރިސާތަކާ ގުޅިގެން އެމްއޭސީއެލްގެ މުވައްޒަފުން ކުރާ މަސައްކަތް ފާހަަކުރައްވައި އޭނާ ވަނީ، އެކަމަށްޓަކައި މުވައްޒަފުންނަށް ޝުކުރު އަދާކުރައްވާފައެވެ. މަހްޖޫބް ވަނީ މުވައްޒަފުންގެ ބުރަ މަަސައްކަތްތައް ފާހަގަކުރުމަށްޓަކައި އިނާޔަތްތައް ފޯރުކޮށްދޭންޖެހޭ ކަމަށްވެސް ވިދާޅުވެފައެވެ.
މަހްޖޫބް ވަނީ ފްލެޓްތަކަށް ފައިސާއާއި ޑައުންޕޭމަންޓް ދެއްކުމުގައި ލުއި އިންތިޒާމުތަކެއް މުވައްޒަފުންނަށް ހަމަޖައްސައިދީފައިވާކަން ފާހަގަކުރައްވާފައެވެ. މި މަޝްރޫއުގެ ދަށުން 300ށްވުރެ ގިނަ ފްލެޓް އަޅާފައިވެއެވެ. އޭގެ ތެރޭގައި ހިމެނެނީ 2 ކޮޓަރީގެ އެޕާޓްމެންޓާއި 1 ކޮޓަރީގެ އެޕާޓްމެންޓެވެ. އެއީ 14 ބުރީގެ 2 ޓަވަރެވެ.
