މާޒިޔާގެ ފުރިހަމަ އިތުބާރު ފަސްވަނަ ދައުރަކަށް ދަމަހައްޓާ, ކްލަބްގެ ޗެއަރމަންކަމަށް އަހުމަދު ސާޖިދު އިންތިޚާބުކޮށްފިއެވެ.

ވިިދިވިދިގެން ފަސްވަނަ ދައުރަށް އަހުމަދު ސާޖިދު ކަލްބްގެ ޗެއަރމަންކަމަށް އިންތިޚާބުވީ ވާދަވެރިކަމެއް ނެތި އަދި ފުރިހަމަ އިތުބާރާއެކުއެވެ. ބޯޑްގެ އެހެން މަޤާމްތަކަށްވެސް މެންބަރުން އިންތިޚާބުވީ ވާދަކުރާނެ އެހެން މެންބަރަކު ނެތި, އެހެން ނަމަވެސް މެންބަރުންގެ ފުރިހަމަ ތާއީދު ލިބިގެންނެވެ. ރާއްޖޭގެ ފުޓްބޯޅައިގައި އޮތް އެންމެ ހަރުދަނާ އިތުބާރު ކުރެވޭ ކްލަބަށް މާޒިޔާ ހެދުމުގައި ޗެއަރމަން އަހުމަދު ސާޖިދު ވަނީ ވަރަށްބޮޑު ދައުރެއް އަދާކުރައްވާފައެވެ. ޗެއަރމަން ވިދާޅުވަމުން ގެންދަވަނީ ކުޅުންތެރިންނަށް މުސާރަ ނުދެވޭ ހާލަތެއްގައި މާޒިޔާ ނޯންނާނެކަމަށެވެ.

ފަސްވަނަ ދައުރާއެކު ފެށުނީ މާޒިޔާގެ ޗެއަރމަންކަމުގައި އަހުމަދު ސާޖިދުގެ 21 ވަނަ އަހަރެވެ. މިދިޔަ ހަތަރު ދައުރެގެ ތެރޭގައި 20 އަހަރު އޭނާ ވަނީ ކްލަބްގެ ޗެއަރމަންކަން ކުރައްވާފައެވެ. ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓްވެ. ފައިތިލަ ސާބިތުކޮށް ވަރުގަދަ ޓީމެއް އެކުލަވާލީ މަޑުމަޑުން ހަރުފަތަކަށް ފަހު ހަރުފަތެއް ގިރާކުރަމުންނެވެ. މިހާރު މާޒިޔާއަކީ ކުޅުންތެރިން އެންމެ އިތުބާރު ކުރާ ކްލަބެވެ.

ނިމުނު ސީޒަންގައިވެސް ދިވެހި ލީގާއި, އެފްއޭކަޕާއި, ޗެރިޓީ ޝީލްޑް އުފުލާލީ މާޒިޔާއިންނެވެ.