ސާބާ ވިމަންސް ޗެމްޕިއަންޝިޕް ބާސްކެޓުބޯޅަ މުބާރާތުގައި ބޭނުންވީ ރާއްޖެ އަށް ރަން މެޑަލެއް ހޯދައިދޭން ކަމަށް ޤައުމީ އަންހެން ބާސްކެޓު ޓީމުގެ ކޯޗު ސުޕުން ވިމާލް ބުނެފިއެވެ.
މިއަހަރުގެ މުބާރާތް ރާއްޖޭގައި ބޭއްވިއިރު، ޓާގެޓަކީ ވެސް ރަން މެޑަލްއެވެ. ނަމަވެސް ބުދަ ދުވަހުގެ ރޭ ސްރީލަންކާ އަތުން ބަލިވުމުން ރާއްޖެ އަށް ވަނީ އެ ޓާގެޓަށް ވާސިލްވެވޭ ގޮތް ނުވެފައެވެ. ލަންކާއިން ރަން މެޑަލް ހޯދިއިރު، ރިހި މެޑަލް ލިބެނީ ނޭޕާލަށެވެ. ރާއްޖެ އަށް އޮތީ ބުރާސްފަތި ދުވަހުގެ ރޭ ބޫޓާން ބަލިކޮށް، ލޯ މެޑަލް ހޯދުމުގެ ފުރުސަތެވެ.
މެޗަށްފަހު ވާހަކަ ދައްކަމުން ސުޕުން ބުނީ މި މުބާރާތަކީ ރަން މެޑަލް ހޯދަން ލިބުނު ވަރަށް ރަނގަޅު ފުރުސަތެއް ކަމަށެވެ. ނަމަވެސް އެކަން ހާސިލްނުވުމުން ދެރަވާކަން ފާހަގަކޮށް އޭނާ ބުނީ، ހުރިހާ ޒިންމާއެއް އޭނާ ނަގާނެ ކަމަށެވެ. މީގެ އިތުރުން އޭނާ ބުނީ ލަންކާ މެޗުގައި ވީ ކިހިނެއް ކަމެއް ބުނަން އޭނާ އަށް ވެސް އުނދަގޫ ކަމަށެވެ. ނަމަވެސް މެޗުގައި ވަރަށް ކުދި ކުދި މިސްޓޭކްސް ހެދުނުތަން ފެނުންކަން ފާހަގަކޮށް ސުޕުން ބުނީ، މެޗު ފެށައިގެން ފުރަތަމަ ކޮޅު ދަށްކޮށް ދިޔައީ ކަމަށެވެ.
ސުޕުން ބުނީ ޓީމުގެ އެންމެ މުހިންމު ހައެއްކަ ކުޅުންތެރިން ތިބީ ހުން ވެސް އައިސްފަކަމަށެވެ. ނަމަވެސް ބަލިވުމުން އެއީ އުޒުރެއްގެ ގޮތުގައި ދައްކަން ބޭނުންނުވާ ކަމަށެވެ. އޭނާ ބުނީ ޕާސް ދިނުމާ ހަަމައިން ގޮސް، ޑިފެންސް ކުރުމުގައި ވެސް ޓީމަށް މައްސަލަތަކަކާ ކުރިމަތިވި ކަމަށެވެ.
ރާއްޖޭގެ ފަހު މެޗުގައި ބުރާސްފަތި ދުވަހުގެ ރޭ ބޫޓާނާ ދެކޮޅަށް ނިކުންނައިރު، އެއީ ޤައުމީ ޓީމަށް ސުޕުން އިރުޝާދު ދޭނެ އެންމެ ފަހު މެޗެވެ. އޭނާ ބުނީ މިހާރު ދެން ބޭނުންވަނީ ޓީމު ދޫކޮށްލަން ކަަމަށާއި، ފެންވަރު ރަނގަޅު އެހެން ކޯޗަކާއެކު ރާއްޖެއަށް ބާސްކެޓުގެ މުސްތަގުބަލެއް އޮތް ކަމަށެވެ. ސުޕުން ބުނީ ކޯޗުކަން ދޫކޮށްލި ނަމަވެސް، ރާއްޖޭގެ ބާސްކެޓަށް އޭނާ ޚިދުމަށް ކުރާނެކަމަށެވެ.
