މިއަދު މިސްރާބު އޮތީ ދިވެހިންގެ ގައުމިއްޔަތު ގެއްލިދާ ގޮތަށް: އަބްދުﷲ ކަމާލުއްދީން

މިއަދު މިސްރާބު އޮތީ ދިވެހިންގެ ގައުމިއްޔަތު ގެއްލިގެންދާ ގޮތަށް ކަމަށް ކުރީގެ މިނިސްޓަރ އަބްދުﷲ ކަމާލުއްދީން ވިދާޅުވެއްޖެއެވެ.

ގައުމީ ދުވަހުގެ މުނާސަބަތުގައި ރާއްޖެ ޓީވީން ގެނެސްދިން ޚާއްސަ ޖަވަރޭޖުގައި ބައިވެރިވެވަޑައިގެން ވާހަކަދައްކަވަމުން އަބްދުﷲ ކަމާލުއްދީން ވިދާޅުވީ ދިވެހި ގައުމިއްޔަތުގެ އެއް ރުކުނަކީ ދިވެހިންގެ ބަސް ކަމަށެވެ. އެއީ ރީތި، ސާފު އަދި ދިވެހިންގެ އަމިއްލަ ބަހެއް ކަމުގައި ފާހަގަކުރެއްވިއެވެ.

އަބްދުﷲ ކަމާލުއްދީން ވިދާޅުވީ މި ރީތި ސާފު ބަސް ދަމަހައްޓާ ނެގެހެއްޓުމުގެ ވާޖިބު މިއަދު އަދާކުރަން ޖެހިފައިވާކަމަށެވެ. ކޮންމެވެސް ސަބަބަކާހުރެ މިއަދު ދިވެހި ބަހުން ވާހަކަދައްކަންވެސް ނޭނގޭ ކަމަށާއި، އެއީ ކިހިނަކުން ވާ ކަމެއްތޯ ބަލަންޖެހޭ ކަމަށެވެ. މިބަހަކީ އަހަރުމެން ކޮންމެ މީހަކުވެސް ފަޚުރުވެރިވާ ބަހަކަށް ހެދުމަށް، ބަސް ކުރިއަރުވަން މަސައްކަތްކުރަންޖެހޭކަން އޭނާ ފާހަގަކުރެއްވިއެވެ.

ކަމާލުއްދީން ވިދާޅުވީ މިކަމަށް ޚާއްސަ ދައުލަތުގެ މުއައްސަސާތައް އެބަހުރި ކަމަށެވެ. ސްކޫލްްތަކާއި، މީޑިއާ މެދުވެރިކޮށްވެސް މިކަން ކޮށްދެވޭނެ ކަމަށް އޭނާ ވިދާޅުވިއެވެ.

އޭނާ އިތުރަށް ވިދާޅުވީ ގައުމެއްގައި ރައްޔިތުންނަށް ބޭނުންވާ އަސާސީ ޚިދުމަތްތައް އެއްވެސް އިސްތިސްނާއެއް ނެތި ދެވޭ ހިސާބުން ގައުމިއްޔަތެއް އޮންނާނީ އެކުލަވާލެވިފައި ކަމަށެވެ.

މީގެ އިތުރުން ރާއްޖޭގެ ސިޔާސީ މަސްރަހަށް ބަލާލާއިރުވެސް ގައުމިއްޔަތަށް އަސަރުކުރާ ފަދަ ބައެއް ކަންކަން ފެންނަމުންދާކަމަށް އޭނާ ވިދާޅުވިއެވެ. ސިޔާސީ މަސައްކަތްތައް ހިނގަންޖެހެނީ އެކި ފަރާތްތަކުގެ މެދުގައި ހެދޭ އިންތިޒާމެއްގެ ތެރެއިން ކަމަށާއި، ވޯޓު ހޯދަން 1،000 ރުފިޔާ ދީގެން ހޯދާ އިޚުލާސްތެރިކަމަކުން ގައުމިއްޔަތެއް ނުނިކުންނާނެ ކަމަށް އަބްދުﷲ ކަމާލުއްދީން ވިދާޅުވިއެވެ.