މި އަހަރުގެ ޤައުމީ ދުވަހުގެ މުނާސަބަތުގައި އެމްއެންޑީއެފުން ނ. ވެލިދޫގައި ޕެރޭޑު ބާއްވައިފި

މި އަހަރުގެ ޤައުމީ ދުވަހުގެ މުނާސަބަތުގައި އެމްއެންޑީއެފުން ނ.ވެލިދޫގައި ޕެރޭޑު ބާއްވައިފިއެވެ.

ހުކުރު ދުވަހުގެ ހަވީރު ނ. ވެލިދޫގައި އެމްއެންޑީއެފުން ބޭއްވި ޕެރޭޑުގެ ހަރަކާތް، މިނިސްޓަރ އޮފް ޑިފެންސް މާރިޔާ އަޙްމަދު ދީދީއާއި، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ބައްލަވާލައްވާފަައިވެއެވެ.

ނ. ވެލިދޫގެ ގިނަ އަދަދެއްގެ އާންމު ރައްޔިތުން ވެސް ޕެރޭޑު ބަލާލުމަށް މަގުތަކަށް ނިކުތެވެ. އޭގެތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ.

ނ.ވެލިދޫގައި ޕެރޭޑް ކުރިއަށްދިޔަ ވަގުތުތަކުގައި އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުގައި ވަނީ ރާގު ކުޅެފައެވެ. ޕެރޭޑު ހުއްޓާފަައިވާ ސަރަހައްދުތަކުގައި ބޭންޑުން ރާގު ކުޅެމުންދިޔައިރު ކުޑަކުދިން ވެސް ބޭންޑާއެކު ބައިވެރިވެ، ތަރުހީބުދީފައިވެއެވެ.

ޤައުމީ ދުވަހާއި ގުޅިގެން އެމްއެންޑީއެފުން ހއ. އުތީމާއި ނ.ކެނދިކުޅުދޫގައި ވެސް ވަނީ ޕެރޭޑް ބާއްވާފައެވެ. ދެން ބާއްވާ ޕެރޭޑް އޮންނާނީ  އޮކްޓޯބަރު 1 ވަނަ ދުވަހު ނ.މަނަދޫގައެވެ.މި ރަށްތަކުގައި ކުރިއަށްގެންދާ ޕެރޭޑުގައި ހަރަކާތްތެރިވާނީ އެންމެ ފަހުން ދަސްވެނިވި 68 ވަނަ އަސާސީ ތަމްރީނު ކޯހުގެ ސިފަައިންނެވެ.