ޤައުމިއްޔަތަކީ ތަފާތެއް ނެތި އަމާޒެއް އޮވެ ޖަޒީރާ ކުދި ރަށްތަކާ އެކު ދިރިއުޅެވޭނެ ގޮތެއް ރައްޔިތުންނަށް ހޯދައިދިނުން - ރައީސް

ޤައުމިއްޔަތަކީ ތަފާތެއް ނެތި އަމާޒެއް އޮވެ، ޖަޒީރާ ކުދި ރަށްތަކާ އެކު ދިރިއުޅެވޭނެ ގޮތެއް ރައްޔިތުންނަށް ހޯދައިދެއްވުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރާއްޖޭގެ 80 ވަނަ ގައުމީ ދުވަސް ފާހަގަކުރުމަށް އަންގާރަ ދުވަހު ހއ. އުތީމު، ބޮޑުތަކުރުފާނުގެ ހަނދާނި މަރުކަޒުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ބޮޑުތިލަދުންމައްޗަށް ކުރައްވަމުން ގެންދަވާ މިދަތުރުގައި ހދ. ފިނޭއަށް އެމަނިކުފާނު ވަޑައިގެންނެވި ކަމަށެވެ. ސަރުކާރުން އަލުން އަނބުރާ އިއާދަކުރަން މަސައްކަތް ކުރާ ދިވެހި ޤައުމިއްޔަތުގެ ހަމަތައްގަނޑަށް، ފިނޭ ފެތެމުން އަންނަ ކަމަށް ރައީސް ވިދާޅުވިއެވެ. ރައީސް ވިދާޅުވީ ބިންގަނޑު ރަނގަޅު، ފެހިކަން ގަދަ، ކުނބުރެއްގެ މިސާލުގާ އޮތް ފިނޭ އަކީ، އެކަހެރިކޮށް އޮތް ރަށެއް ކަމަށެވެ. މާބޮޑު ފަޅެއްނެތި، މާކަނޑުގެ މެދުން ހިކިފައިވާ، ޖަޒީރާ މުތެއް ކަމަށެވެ.

ރައީސް ވިދާޅުވީ މިނިވަންކަމާ، ސިޔާދަތާ، އަމިއްލަވަންތަކަން ދެމެހެއްޓުމަށް، ފުރަތަމަ އެނގެން ޖެހެނީ، އަމިއްލަ ތާރީޚު ކަމަށެވެ. ތިމާމެންނަކީ ކޮންތާކު، ކިހިނެއް ދިރިއުޅުނު، ކޮންބައެއްކަން އެނގެންޖެހޭނެ ކަމަށެވެ. ތާރީޚާއި، ސަގާފަތާއި އާސާރުތަށް ދެމެހެއްޓެން ޖެހޭނެ ކަމަށެވެ.

ރައީސް ވިދާޅުވީ އުތީމުގާ ހުންނަވާ މިވާހަކަ ދައްކަވާއިރު، ވިދާޅުވާން ޖެހެނީ، ހުރި ކިތަންމެ މުއްސަނދި އާސާރަކަށް އިހުމާލުވެ، ނެތިދިޔަ ހިތާމަވެރި ވާހަކަ ކަމަށެވެ. އުތީމު ގަނޑުވަރު ނޫނީ ދިވެހި ޤައުމިއްޔަތު ދައްކުވައިދޭ މިފަދަ އާސާރެއް، ހަނދާނެއް، އަދި ތާރީޚީ ބިނާއެއް، ނެތޭވެސް ވިދާޅުވެވިދާނެ ކަމަށެވެ. ކަޅުވަކަރު މިސްކިތް އަތުޖެހިފާ އެވަނީ، ކުރި ވަރަށް ބުރަ މަސައްކަތުން ކަމަށާއި، ސަލްޓަން ޕާކްގާ ހުރި އުސްގެކޮޅު އޮތީ އެލިސްޓަށް އަރާފަ ކަމަށެވެ. މާލޭގާ ހުރި ތާރީޚީ ބިނާތަށް، މާލެތެރޭގައި ގިނަވެ، ބިކަވެ އެގޮތް މިގޮތްވެގެން ދިޔަ ކަމަށެވެ.

ރައީސް ވިދާޅުވީ މުޅިރާއްޖޭގެ ހުރިހާ ހިސާބެއްގައި ހުރި، ތާރީޚީ އާސާރުތަށް ޙިމާޔަތްކޮށް ރައްކާތެރި ކުރުމަކީ، ރާއްޖެއަށް ޓަކައި ކުރާންޖެހޭ ކަމެއް ކަމަށެވެ. ވަކި ސިޔާސަތަކާ އެކު، ސަރުކާރުން މިދަނީ މި މަސައްކަތް ކުރަމުން ކަމަށް ރައީސް ވިދާޅުވިއެވެ.