މި އަހަރުގެ ގައުމީ ދުވަހުގެ މުނާސަބަތުގައި އެމްއެންޑީއެފުން ހއ. އުތީމުގައި ޕެރޭޑް ބާއްވައިފިއެވެ.

މި އަހަރު ގައުމީ ދުވަސް ރަސްމީކޮށް ފާހަގަކުރާ ރަށަކީ ހއ. އުތީމެވެ. އަންގާރަ ދުވަހުގެ ހަވީރު އުތީމުގައި އެމްއެންޑީއެފުން ބޭއްވި ޕެރޭޑް ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ، އިބްރާހީމް މުޙައްމަދު ޞާލިޙްގެ އިތުރުން މިނިސްޓަރ އޮފް ޑިފެންސް މާރިޔާ އަޙްމަދު ދީދީއާއި، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ބައްލަވާލައްވާފަައިވެއެވެ. އަދި، ހއ. އުތީމުގެ ގިނަ އަދަދެއްގެ އާންމު ރައްޔިތުންވެސް މިއަދުގެ ޕެރޭޑް ބެލުމަށް މަގުތަކަށް ނުކުތެވެ.

އުތީމުގައި ޕެރޭޑް ކުރިއަށްދިޔަ ވަގުތުތަކުގައި އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުގައި ވަނީ ރާގު ކުޅެފައެވެ. ޕެރޭޑް ހުއްޓާފަައިވާ ސަރަހައްދުތަކުގައި ބޭންޑުން ރާގު ކުޅެމުންދިޔައިރު ކުޑަކުދިންވެސް ބޭންޑާއެކު ބައިވެރިވެ، ތަރުހީބުދީފައިވެއެވެ.

އެމްއެންޑީއެފުން ބޭއްވުމަށް ހަމަޖެހިފައިވާ ޕެރޭޑްތައް، އުތީމުގެ އިތުރުން ތިން ރަށެއްގައި ބާއްވާގޮތަށް ވަނީ ހަމަޖެހިފައެވެ. މިގޮތުން ދެން ބާއްވާ ޕެރޭޑް އޮންނާނީ ބުދަ ދުވަހުގެ ހަވީރު، ނ. ކެނދިކުޅުދޫގައެވެ. އަދި، ސެޕްޓެންބަރު 29 ވަނަ ދުވަހު ނ. ވެލިދޫގައި ޕެރޭޑު ބޭއްވުމަށް ހަމަޖެހިފައިވާއިރު، ސެޕްޓެންބަރު 30 ވަނަ ދުވަހު ޕެރޭޑު ބޭއްވުމަށް ހަމަޖެހިފައިވަނީ ނ. މަނަދޫގައެވެ.

މި ރަށްތަކުގައި ކުރިއަށްގެންދާ ޕެރޭޑުގައި ހަރަކާތްތެރިވާނީ އެންމެ ފަހުން ދަސްވެނިވި، 68 ވަނަ އަސާސީ ތަމްރީނު ކޯހުގެ ސިފަައިންނެވެ.