އަންނަން އޮތް ޖީލުތަކަށް ދިވެހި ގައުމު ގައުމިއްޔަތެއްގެ ގޮތުގައި ފޯރުކޮށްދެވޭނީ ބަހާތައް އަދުގެ ޖީލުން ފުރިހަމައަށް ރައްކާތެރިވެރިގެން – އިމްރާން

އަންނަން އޮތް ޖީލުތަކަށް ދިވެހި ގައުމު ގައުމިއްޔަތެއްގެ ގޮތުގައި ފޯރުކޮށްދެވޭނީ ދިވެހި ގައުމީ ބަހާތައް އަދުގެ ޖީލުން ފުރިހަމައަށް ރައްކާތެރިވެރިގެން ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

80 ވަނަ ގައުމީ ދުވަހުގެ މުނާސަބަތުގައި ވާހަކަދައްކަވަމުން މިނިސްޓަރު ވިދާޅުވީ ބޮޑުތަކުރުފާނަކީ އާދަޔާ ހިލާފަށް ނެވިކަމާއި، ހެވިކަން ދަސްކުރައްވައިގެން މައިދާނަށް ނުކުނެވި ކޮމާންޑަރެއް ކަމަށެވެ. އަދި އިސްނެންގެވުމާއި، ކެރިވަޑައިގަތުމާއި، ޖެހިލުންކުޑަ ސިފަ ލިބިވަޑައިގެން ހުންނެވި ވަރުގަދަ ލިޑަރެއް ކަމަށެވެ.

މިނިސްޓަރު އިމްރާން ވިދާޅުވީ ކޮންމެ ގައުމެއްވެސް ބިނާވެގެންވަނީ އެ ގައުމެއްގެ ގައުމިއްޔަތުގެ ބަހާތަކާއި އަސާސްތަކާއި ރުކުންތަކުގެ މައްޗަށް ކަމަށެވެ. ދިވެހި ގައުމިއްޔަތުގެ ބަހާތަކަކީ މާތްވެގެންވާ އިސްލާމްދީނާއި ދިވެހިބަހާ ދިވެހި ސަގާފަތާއި އާދަކާދަތުގެ ތަރިކަ ކަމަށެވެ.

މިނިސްޓަރު ވިދާޅުވީ އަންނަން އޮތް ޖީލުތަކަށް ދިވެހި ގައުމު، ގައުމިއްޔަތެއްގޮތުގައި ފޯރުކޮށްދެވޭނީ ދިވެހި ގައުމިއްޔަތުގެ ބަހާތަކަށް އަދުގެ ޖީލުތައް ފުރިހަމައަށް ރައްކާތެރިވެގެން ކަމަށެވެ. އުފެދި ބޮޑުވެގެން އަންނަ ޖީލުތަކުގެ ހިތްތަކުގައި އިސްލާމްދީނުގެ ސައްހަ އަގީދާ ކަނޑާ ބިންވަޅު ނެގިގެން ކަމަށެވެ.

މިނިސްޓަރު ވިދާޅުވީ ގައުމެއް ކުރިއަރާ ތަރައްގީވާނީ އެ ގައުމެއްގެ ދަރިން ބިނާކޮށް ތަރުބިއްޔަތުކޮށް މީހުނަށް ހަދައިގެން ކަމަށެވެ. މީހުން ބިނާކުރުމުގައި ބޮޑުތަކުރުފާނުގެ ފަލްސަފާއަކީ ކާމިޔާބު ނަމޫނާ ފަލްސަފާއެއް ކަމަށެވެ.