ރާއްޖޭގެ އާސަރުތައް ފެންނަން ނެތުމުން ބޮޑުތަކުރުފާނު ޕޯޗުގީޒުންނާ ހަނގުރާމަ ކުރިކަމަށް ބުނާ ވަހަކަ ޅަ ޖީލުން ދޮގުކުރޭ: އަލާ
ބޮޑުތަކުރުފާނުގެ ހަނދާންތައް ފެންނާކަށް ނެތް ކަމަށް އަލާ ވަނީ ވިދާޅުވެފައި
ގައުމީ ދުވަހުގެ ޖަލްސާގައި އަހުމަދު އަލާ ދީދީ ވާހަކަ ދައްކަވަނީ
ރާއްޖޭގެ އާސަރުތައް ފެންނަން ނެތުމުން ބޮޑުތަކުރުފާނު ޕޯޗުގީޒުންނާއި ހަނގުރާމަ ކުރެއްވި ކަމަށް ބުނާ ވަހަކަ ޅަ ޖީލުން ދޮގުކުރާ ކަމަށް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ ރިސާޗް އެނަލިސްޓް އަހުމަދު އަލާ ދީދީ ވިދާޅުވެއްޖެއެވެ.
ރާއްޖޭގެ 80 ވަނަ ގައުމީ ދުވަސް ފާހަގަކުރުމަށް އަންގާރަ ދުވަހު ހއ. އުތީމު، ބޮޑުތަކުރުފާނުގެ ހަނދާނި މަރުކަޒުގައި ބޭއްވި ޖަލްސާގައި ވާހަކަފުޅު ދައްކަވަމުން އަލާ ވިދާޅުވީ ބޮޑުތަކުރުފާނުގެ ހަނދާންތައް ފެންނަން ނެތުމުން އެކަމާއި ވަރަށް ގިނަ ބަޔަކު ސުވާލު އުފައްދަވާ ކަމަށެވެ.
ޕޯޗުގީޒުން މީހުން ރާއްޖޭގައި ވެރިކަން ހިންގީ ކޮއްޗޭގައި ހުންނެވި ދިވެހި ރަސްކަލެއްގެ ނަންފުޅު މަތީގައި ކަމަށް އަލާ ވިދާޅުވިއެވެ. އެހެންކަމުން ޤާނޫނީ ގޮތުން ރާއްޖޭގައި ވެރިކަން އޮތީ ދިވެހި ރަސްކަލެއްގެ ނަންމަތީގައި ކަމަށާއި ބާރުވެރިޔަކީ ޕޯޗުގީޒުން ކަމަށެވެ.
ޕޯޗުޖީޒުން މީހުން ސިއްކަ ޖަހާފައި ހުރި ބޮޑު ބަޑިތައް ފަހަކާއި ޖެހެން ދެން ހުރި ކަމަށާއި މިހާރު ވެސް ދާރުލްއާސާރައަށް ވަންނައިރު ކަނާތް ފަރާތުގައި އެއް ބަޑި އޮންނާނެ ކަމަށް ވެސް ވިދާޅުވިއެވެ.
ސަންގަމް ހަރަތުން ދިވެހިންނާއެކު ވިޔަފާރިކޮށްފައިވާކަން ދައްކުވައިދޭ ލިޔުންތައް ފެންނަން މިހާރު ވެސް އެބަހުރި ކަމަށް ވިދާޅުވިއެވެ.
ރޯމަނުންގެ އަރިހަށް ރާއްޖޭގެ ރަސްކަލަކު ސަފީރުން ފޮނުއްވި ކަމަށާއި އެއީ އިންޑިއާ ކަނޑުގައި ރޯމަނުންގެ ވިޔަފާރި ގަދަވެ، ރޯމަނުންނާއެކު ވިޔަފާރި ގުޅުން ޤާއިމުކޮށް، ދެން އޮތް ޤައުމުތަކާއި ރާއްޖެއިން ވާދަކުރުމަށް ކަމަށް އަލާ ފާހަގަކުރެއްވިއެވެ. އަދި އެއީ 19700 ކުރީގެ ވާހަކަތައް ކަމަށް ވެސް ވިދާޅުވިއެވެ.
އިންޑިއާ ކަނޑުގައި ރާއްޖެ އޮތުމުން ދުވަހަކު ވެސް ރާއްޖެ ފޮރުވިފައި ނެތްކަން ފާހަގަކުރައްވާ އަލާ ވިދާޅުވީ އެ ޒަމާނުގައި ޝީޝެލް އެއީ އޮތް ޤައުމެއް ކަމަށް މީހުން ނުދަން ކަމަށެވެ،
އެ ޒާމުނުއްސުރެން ރާއްޖެ ދިވެހި ދައުލަތެއް ގޮތުގައި ދެމިއޮތް ކަމަށާއި އެއީ ޤައުމިއްޔަތުކަން ކަމަށް ވިދާޅުވިއެވެ.
ވިޔަފާރި ބަނދަރެއްގެ މެދުގައި ހިނގި މި ހަމަލާތަކަށް ދިވެހިން ވެސް ވަތްކަން ފާހަގަކުރައްވާ އަލާ ވިދާޅުވީ އޭރުގެ ހަމަލާތަކުގައި ގިނަ އަދަދެއްގެ ދިވެހި ވިޔަފާރިވެރިން އަނދައިގެން މަރުވި ކަމަށެވެ. އަދި އެކަން ޕޯޗުގީޒުންގެ އަރުޝީފުތަކުގައި ފެންނަން އެބައޮތް ކަމަށް ވިދާޅުވިއެވެ.
ޤައުމެއް ދެކެ ލޯބިވާ ވެރިޔަކު ކާބަފައިންގެ ރަމްޒުތައް ހިމާޔަތްކޮށްދޭނެ ކަމަށާއި އެގޮތުން މިއަދު އާސާރުގައި ހުރި މަދު ތަކެތަކެއްޗާއި އާސާރުތައް ދިރުވުމުގެ ގިނަ ގުނަ މަސައްކަތްތައް ކުރިއަށްދާ ކަމަށް ވިދާޅުވިއެވެ.
