ބޮޑުތަކުރުފާނުގެ ޖިހާދުން ޒުވާނުންނަށް ލިބިދޭ ފިލާވަޅަކީ ހިތްވަރު: މެމްބަރު އަޙުމަދު އަބްދުﷲ

ބޮޑުތަކުރުފާނުގެ ޖިހާދުން ޒުވާނުންނަށް ލިބިދޭ ފިލާވަޅަކީ ހިތްވަރުކަމަށް ބާރަށު ދާއިރާގެ މެމްބަރު އަޙުމަދު އަބްދުﷲ ވިދާޅުވެއްޖެއެވެ.

ޤައުމީ ދުވަހުގެ ރަސްމީ ޖަލްސާގައި ވާހަކަ ދައްކަވަމުން ބާރަށު ދާއިރާގެ މެމްބަރު އަހުމަދު އަބްދުﷲ ވަނީ ޤައުމީ ދުވަސް ހއ އުތީމުގައި ރަސްމީކޮށް ފާހަގަ ކުރެއްވުމަށް ރައީސުލްޖުމްހޫރިއްޔާ ނިންމެވި ނިންމެވުން ފާހަގަ ކުރައްވައި އެކަމަށްޓަކައި އެމަނިކުފާނަށް ޝުކުރު އަދާ ކުރައްވާފައެވެ.

މެމްބަރު ވިދާޅުވީ، ޤައުމީ ދުވަހާއި ގުޅޭގޮތުން އެތައް ބަޔަކަށް އެތައް ވާހަކަތަކެއްވެސް ދެއްކިދާނެ ކަމަށެވެ. އެހެންނަމަވެސް މިއަދު މިއޮތީ ވާހަކައަށްވުރެ އަމަލުން ކަންކަން ދައްކަން ޖެހިފައިކަމަށް މެމްބަރު ވިދާޅުވިއެވެ.

ބޮޑުތަކުރުފާނުގެ ޖިހާދަށް އަލިއަޅުވާލައްވައި މެމްބަރު ވިދާޅުވީ، އެކަމުން މިއަދުގެ ޒުވާނުންނަށް ބޮޑެތި ފިލާވަޅުތަކެއް ލިބިދޭ ކަމަށާއި، އޭގެ ތެރެއިންވެސް އެންމެ ބޮޑު އެއް ފިލާވަޅަކީ ހިތްވަރު ކަމަށެވެ. އެގޮތުން ބޮޑުތަކުރުފާނުގެ ހިތްޕުޅުގައި ރާއްޖެ އޮތް ޙާލަތު ބަދަލު ކުރެއްވުމަށްޓަަަކައި އޮތް އަޒުމާއި ހިތްވަރުން ފިލާވަޅު ލިބިގަންނަން ޖެހޭކަމަށް މެމްބަރު ފާހަގަ ކުރެއްވިއެވެ.

ބޮޑުތަކުރުފާނުގެ ޖިހާދުން އިބުރަތް ލިބިގަނެ، ރާއްޖެއަށް ކުރިމަތިވާ ކޮންމެ ޙާލަތުން އަރައިގަތުމަށް މަސައްކަތް ކުރުމަށް މެމްބަރު ވަނީ ގޮވާލައްވާފައެވެ.

އެ ދުވަސްތަކުގެ ޒިކުރާއަށް ނިމުމެއް ނެތްކަންވެސް މެމްބަރުގެ ވާހަކަފުޅުގައި ފާހަގަ ކުރެއްވިއެވެ.