ގައުމީ ދުވަހާއި ގުޅިގެން މަނަދޫގައި ޕެރޭޑު ބާއްވައިފި
ގައުމީ ދުވަހާއި ގުޅިގެން 4 ރަށެއްގައި ވަނީ ޕެރޭޑު ބާއްވާފައި
މަނަދޫގައި ބޭއްވި ޕެރޭޑުގެ ތެރެއިން
މި އަހަރުގެ ޤައުމީ ދުވަހުގެ މުނާސަބަތުގައި އެމްއެންޑީއެފުން ނ. މަނަދޫގައި ޕެރޭޑު ބާއްވައިފިއެވެ.
ހޮނިހިރު ދުވަހުގެ ހަވީރު މަނަދޫގައި އެމްއެންޑީއެފުން ބޭއްވި ޕެރޭޑުގެ ހަރަކާތް، އެމްއެންޑީއެފް ނޮދަން އޭރިއާ ކޮމާންޑުގެ ކޮމާންޑަރު ބްރިގޭޑިއަރ އިސްމާޢީލް ޝަރީފް ވަނީ ބައްލަވާލައްވާފަައެވެ. އަދި، މަނަދޫގެ ގިނަ އަދަދެއްގެ ކުޑަކުދިން ހިމެނޭހެން އެރަށުގެ ގިނަ ބަޔަކު ޕެރޭޑު ބަލާލުމަށް މަގުތަކަށް ނުކުމެފައިވެއެވެ.
މަނަދޫގައި ޕެރޭޑް ކުރިއަށްދިޔަ ވަގުތުތަކުގައި އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުގައި ވަނީ ރާގު ކުޅެފައެވެ. ޕެރޭޑު ހުއްޓާފަައިވާ ސަރަހައްދުތަކުގައި ބޭންޑުން ރާގު ކުޅެމުންދިޔައިރު ކުޑަކުދިން ވެސް ބޭންޑާއެކު ބައިވެރިވެ، ތަރުހީބުދީފައިވެއެވެ.
ޤައުމީ ދުވަހާ ގުޅިގެން ނ.މަނަދޫގެ އިތުރުން، އެމްއެންޑީއެފުން ހއ. އުތީމާއި ނ.ކެނދިކުޅުދޫއާއި ނ.ވެލިދޫގައި ވެސް ވަނީ ޕެރޭޑް ބާއްވާފައެވެ. ޤައުމީ ދުވަހުގެ މުނާސަބަތުގައި ރާއްޖޭގެ ހަތަރު ރަށެއްގައި ބޭއްވުމަށް ނިންމި ޕެރޭޑުގެ ހަރަކާތްތަކުގެ ތެރެއިން، މަނަދޫއަކީ މި ޕެރޭޑު ބޭއްވި ފަހު ރަށެވެ.
މި ރަށްތަކުގައި ކުރިއަށްގެންދިޔަ ޕެރޭޑުގައި ހަރަކާތްތެރިވެފައި ވަނީ އެންމެ ފަހުން ދަސްވެނިވުނު 68 ވަނަ އަސާސީ ތަމްރީނު ކޯހުގެ ސިފަައިންނެވެ.
