ރާއްޖޭގެ މެރަތަން ދުވުންތެރިޔާ ޝަމްހާ އަހްމަދު ޤައުމީ ރެކޯޑެއް މުގުރާލައިފިއެވެ.

ބާލިން މެރަތަންގައި ޝަމްހާ މުގުރާލީ ރާއްޖޭގެ މެރަތަން ރެކޯޑެވެ. ޝަމްހާ ވަނީ 3:02:41ން މުބާރާތުގައި މެރަތަން ނިންމާފައެވެ. މީގެ ކުރިން މި ރެކޯޑު އޮންނަނީ މަރިޔަމް އަބްދުލް ކަރީމް އަތުގައެވެ. އޭނާ ރެކޯޑު ހެދީ 2019 ވަނަ އަހަރު ނޭޕާލުގައި އޮތް ސާފް ގޭމްސްގައި 3:21:54ން މެރަތަން ނިންމައިގެންނެވެ.

ޝަމްހާގެ ކޯޗަކީ މެރަތަން ރަނާސްގެ ނަސްރުﷲ އަހުމަދުއެވެ. ނަސްރަކީ ރާއްޖޭގެ އެންމެ ގިނަ މެރަތަން ދުވުމުގެ ރެކޯޑު އޮތް ދުވުންތެރިޔާއެވެ. ޝަމްހާ ވަނީ މިހާތަނަށް އޮސްލޯ މެރަތަންގައި ހާފް މެރަތަން ރެކޯޑްގެ އިތުރުން 20 ކިލޯމީޓަރު، 15 ކިލޯމީޓަރު އަދި 10 ކިލޯމީޓަރު ދުވުމުގެ ގައުމީ ރެކޯޑްވެސް ހަދާފައެވެ.

ނިމުނު ޤައުމީ މުބާރާތުގައި ރާއްޖޭގެ ދިގު ދުވުންތެރިޔާ އާމިނަތު ޖާއިޝާ ޖުނީޒްވެސް ވަނީ ޤައުމީ ރެކޯޑެއް ހަދާފައެވެ. ޖައިޝާ ވަނީ 5000 މީޓަރު ދުވުމުގައި ޖައިޝާ ރޭސް ނިންމީ 19.43.09 މިނެޓުން ރޭސް ނިންމާފައެވެ. މިއީ ދިވެހި އެތުލީޓަކު 20 މިނެޓަށްވުރެ އަވަހަށް 5000 މީޓަރު ނިންމި ފުރަތަމަ ފަހަރެވެ. މީގެ ކުރިން 5000 މީޓަރުގެ އަންހެން ރެކޯޑު އޮންނަނީ 20 މިނިޓް 10:30 ސިކުންތުން ރޭސް ނިންމި މަރިޔަމް އަބްދުލް ކަރީމް އަތުގައެވެ. އޭނާ ރެކޯޑު ހެދީ 2019 ވަނަ އަހަރު އިންޑިއަން އޯޝަން އައިލެންޑް ގޭމްސްގައެވެ.