ޕްރިމިއަރ ލީގުގައި ކުޅުމަށް ކެތް މަދުވެފައި ހުރި ކަމަށް ގަބްރިއެލް ސްލޮނީނާ ބުނެފިއެވެ.
ޗިކާގޯ ފަޔަރ ދޫކޮށް ޒުވާން ކީޕަރު ޗެލްސީ އަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. އޭނާ ޗެލްސީއަށް ބަދަލުވީ ލޯނު އެއްބަސްވުމެއްގެ ދަށުން ޗިކާގޯ ފަޔަރ އަށް ކުޅެވޭ ގޮތަށެވެ.
ޗެލްސީއާ ގުޅޭ ގޮތުން ވާހަކަ ދައްކަމުން ސްލޮނީނާ ބުނީ އެ ޓީމަށް ކުޅެދިނުމަށް އޭނާ ކެތްމަދުވެފައި ހުރި ކަމަށެވެ. އޭނާ ބުނީ ޕްރިމިއަރ ލީގު ކަހަލަ، ދުނިޔޭގެ ބޮޑު ލީގެއްގައި ކުޅެލައި، އެކަމުގެ ތަޖުރިބާ ވެސް ކޮށްލަން ބޭނުންވާ ކަމަށެވެ. މީގެ އިތުރުން ސްލޮނީނާ ބުނީ ޗެލްސީގެ ކުޅުންތެރިޔެެއްގެ ގޮތުގައި އޭނާ ދައްކާލި ދުވަހު، އެ ޓީމުގެ ސަޕޯޓަރުންނާއި ވެރިންގެ ފަރާތުން ފެނުނީ އޭނާ އަށް ވަރަށް ކަމުދިޔަ ކަންތައްތަކެއް ކަމަށެވެ.
މީގެ އިތުރުން ޗެލްސީ އަކީ ބޮޑު ކުލަބެއްކަން ފާހަގަކޮށް، ސްލޮނީނާ ބުނީ އެ ޓީމާއެކު ކާމިޔާބު ހޯދުމަކީ އޭނާގެ އެންމެ ބޮޑު އަޒުމުކަމަށެވެ. ސްލޮނީނާ ވަނީ ޗިކާގޯ ފަޔަރގައި މޮޅު ކުޅުމެއް ދައްކާފައެވެ. ގިނަ ކުލަބުތަކުން އޭރު ވަނީ އޭނާ ހޯދުމުގެ މަސައްކަތްކޮށްފައި ކަމަށް މީޑިއާ ތަކުގައި ރިޕޯޓުކޮށްފައިވެއެވެ. ޗެލްސީ އަށް ބަދަލުވި ނަމަވެސް، ސްލޮނީނާ އަދި އެ ޓީމަށް ކުޅެދީފައެއް ނުވެއެވެ.
