"ޕޯޓް ޑިޖިޓަލްކޮށް" ކެމްޕޭނުގެ ދަށުން 3 ޚިދުމަތެއް ތައާރަފުކޮށްފި
25 ސެޕްޓެމްބަރު 2022 | އާދީއްތަ 02:14އަލަށް ތައާރަފު ކުރީ އެމްޕީއެލްގެ ޖޮބް ޕޯޓަލް އާއި ސްޓާފް މޯބައިލް އެޕްލިކޭޝަނާއި އޮކްޝަން ޕޯޓަލް
އެމްޕީއެލް
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑިޖިޓަލް ޓްރާންސްފޮމޭޝަން، "ޕޯޓް ޑިޖިޓަލްކޮށް" ކެމްޕޭނުގެ ދަށުން ތިން ޚިދުމަތެއް ތައާރަފުކޮށްފިއެވެ.
މި ޚިދުމަތްތައް ތައާރަފު ކޮށްފައިވަނީ އެމްޕީއެލްގެ 36 ވަނަ އަހަރީ ދުވަސް ފާހަގަ ކުރުމަށް ހޮނިހިރު ދުވަހުގެ ރޭ ބޭއްވި ހާއްސަ ރަސްމިއްޔާތުގެ ތެރެއިންނެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހުއެވެ.
"ޕޯޓް ޑިޖިޓަލްކޮށް" ކެމްޕޭނުގެ ދަށުން އެމްޕީއެލުން އަލަށް ތައާރަފުކޮށްފައިވަނީ އެ ކުންފުނީގެ ޖޮބް ޕޯޓަލް އާއި ސްޓާފް މޯބައިލް އެޕްލިކޭޝަނާއި އޮކްޝަން ޕޯޓަލެވެ. މި ތިން ޚިދުމަތަކީ ވެސް އެ ކުންފުނިން ޚިދުމަތް ހޯދާ ފަރާތްތަކާއި މުވައްޒަފުންނަށް މުހިންމު ޚިދުމަތްތަކެކެވެ.
އެމްޕީއެލް ޖޮބް ޕޯޓަލް މެދުވެރިކޮށް އެ ކުންފުނިން އިއުލާނުކުރާ ވަޒީފާތައް މިހާރު ފެންނަން ހުންނާނެއެވެ. އަދި ބޭނުންވާ ވަޒީފާއަކަށް އޮންލައިންކޮށް އެދުމުގެ ފުރުސަތު މި ޕޯޓަލްގެ ޒަރީއާއިން ފަހިިވެގެންދާއިރު އެ ކުރިމަތިލާ ވަޒީފާއެއްގެ ޕްރޮސެސް ވެސް ބަލައިލެވޭނެއެވެ.
މި ޚިދުމަތުގެ ސަބަބުން ވަޒީފާއަށް ކުރިމަތިލުމަށް ހޭދަ ކުރާ ވަގުތު އެތައް ގުނައެއް މަދު ކުރެވޭނެ ކަމަށް އެމްޕީއެލުން ބުނެއެވެ.
މުވައްޒަފުންނަށް ހާއްސަކޮށްގެން އެމްޕީއެލުން ތައާރަފު ކުރި ސްޓާފް އެޕްލިކޭޝަނުގެ ސަބަބުން އެ ކުންފުނީގައި މަސައްކަތް ކުރާ މުވައްޒަފުންނަށް އެ މުވައްޒަފެއްގެ ސްޓާފް ޕްރޮފައިލް ބަލައި، ހާޒިރީ ރިޕޯޓާއި މުސާރައިގެ ތަފްސީލު ވެސް ބަލައިލެވޭނެއެވެ. އަދި ޗުއްޓީގެ ބެލެންސް ބެލުމާއި ޗުއްޓީއަށް އެދުމުގެ ފުރުސަތު ވެސް އެ އެޕްލިކޭޝަން މެދުވެރިކޮށް މުވައްޒަފުންނަށް ލިބިގެންދާނެއެވެ.
އެމްޕީއެލް އޮކްޝަން ޕޯޓަލަކީ ރާއްޖެއަށް އެތެރެ ކުރާ މުދަލުގެ ތެރެއިން ކްލިއާނުކޮށް ގިނަ ދުވަސްވަންދެން ހުންނަ މުދާ ނީލަން ކިޔުމަށް ތައާރަފު ކުރި ޕޯޓަލެކެވެ. މި ޕޯޓަލްގެ ސަބަބުން ނީލަމުގައި ބައިވެރިވާން ބޭނުންވާ ފަރާތްތަކުން މިހާރު ޕޯޓަށް ދާކަށް ނުޖެހޭނެއެވެ. އޭގެ ބަދަލުގައި ޕޯޓަލް މެދުވެރިކޮށް ނީލަން ކިޔާ މުދަލުގެ ތަފްސީލު ބަލާލައި އަގު ހުށަހެޅުމުގެ ފުރުސަތު ލިބިގެންދާނެއެވެ. އަދި ނީލަމުގެ ޕްރޮސެސް ވެސް އޮންލައިންކޮށް ބަލައިލެވޭނެއެވެ.
އެމްޕީއެލްގެ ޚިދުމަތްތައް ޑިޖިޓަލް ކުރުމަށް ފެށި "ޕޯޓް ޑިޖިޓަލްކޮށް" ކެމްޕޭނަކީ ރައްޔިތުންނަށް ދޭ ޚިދުމަތުގެ ސްޕީޑު އަވަސްކޮށް، އެ ކުންފުނީގެ މުވައްޒަފުންނާއި ކަސްޓަމަރުންނަށް ފަސޭހަކަމާއެކު މަސައްކަތް ކުރެވޭނެ މާހައުލެއް ހޯދައިދިނުމަށް ހިންގާ ކެމްޕޭނެކެވެ. މި ކެމްޕޭނުގެ ދަށުން މީގެ ކުރިން ވަނީ "މައި ބަނދަރު" ޕޯޓަލަށް ޑޭޝް ބޯޑެއް ވެސް އިތުރުކޮށްފައެވެ.
މި ކެމްޕޭނުގެ ދަށުން އޮންލައިންކޮށް ބަދަލު ކުރި ބައެއް ޚިދުމަތްތަކާއެކު މުދާ ކްލިއާކުރަން ކުރިން ހަ ގަޑިއިރު ހޭދަވި މަސައްކަތްތައް މިހާރު 15 މިނެޓުން ނިންމާލެވޭ ކަމަށް އެމްޕީއެލްއިން ބުނެއެވެ.
