މިއަންނަ ނޮވެމްބަރު މަހު ގަތަރުގައި އޮންނަ ފީފާ ވޯލްޑް ކަޕްގެ ސެކިއުރިޓީ ބެލެހެއްޓުމަށް ތުރުކީގެ 3000 ފުލުހުން ގަތަރަށް ފޮނުވުމަށް ދެގައުމުގެ ދެމެދުގައި އެއްބަސްވެއްޖެއެވެ.

ތުރުކީގެ މީޑިއާތަކުގައި ރިޕޯޓުކޮށްފައިވާ ގޮތުގައި މުބާރާތުގެ ސެކިއުރިޓީ ބެލެހެއްޓުމަށް ތުރުކީގެ ފުލުހުން ގަތަރަށް ފޮނުވުމަށް މިހާރު ވަނީ ދެގައުމުގެ މެދުގައި އެއްބަސްވުމެއް ހަދާ، ސޮއިކޮށްފައެވެ. އޭގެ ތެރޭގައި ހިމެނެނީ 3000 ރިއޮޓް ފުލުހުންގެ އިތުރުން، 100 ސްޕެޝިއަލް އޮޕަރޭޝަންސް ފުލުހުންނާއި، 50 ބޮމްބް ސްކޮޑް ފުލުހުންނާއި 80 ޑޯގް ސްކޮޑުގެ ފުލުހުންނެވެ.

ތުރުކީއިން ގަތަރަށް އެހީވެދޭނީ މުބާރާތް ކުރިއަށްދާއިރު ސްޓޭޑިއަމް އަދި ހޮޓާތަކުގެ ސެކިއުރިޓީ ބެލެހެއްޓުމަށެވެ. މުބާރާތާއި ދިމާކޮށް ގިނަ އަދަދެއްގެ މީހުން ގަތަރަށް ދަތުރުކުރާއިރު ސެކިއުރިޓީ ބެލެހެއްޓުމުގައި ގަތަރަށް ވަނީ ދަތިތަކެއް ކުރިމަތިވެފައެވެ. އެހެންކަމުން ގަތަރުން އަންނަނީ އެގައުމާއި ގާތް ގުޅުމެއް އޮންނަ އެހެން ގައުމުތަކުގެ އެހީ މިކަމުގައި ހޯދަމުންނެވެ.

ރިޕޯޓުތައް ބުނާ ގޮތުން މިފަހަރުގެ ވޯލްޑް ކަޕާއި ދިމާކޮށް 1.2 މިލިއަން މީހުން ގަތަރަށް ދަތުރުކުރާނެއެވެ.