ކުޅުދުއްފުށި ރީޖަނަލް ހޮސްޕިޓަލުން ކުރިއަށް އޮތް 5 އަހަރު ދުވަހަށް އެކުލަވާލި ސްޓްރެޓެޖިކް އެކްޝަން ޕްލޭން ލޯންޗްކޮށްފިއެވެ. މިކަމަށްޓަކައި ބުރާސްފަތި ދުވަހުގެ ރޭ ކުޅުދުއްފުށި އަފީފުއްދީން ސްކޫލްގައި ބޭއްވި ހާއްޞަ ރަސްމިއްޔާތުގައި މި ޕްލޭން ލޯންޗް ކޮށްދެއްވީ ރައީސް އޮފީހުގެ ސެކްރެޓަރީ ކެބިނެޓް އެފެއާރޒް އަލްފާޟިލް އަހުމަދު ހަސަން ދީދީ އެވެ.
ކުޅުދުއްފުށި ރީޖަނަލް ހޮސްޕިޓަލްއަކީ ވަކި ބަޖެޓެއް ހަމަޖައްސާ، ޤަވަނިން ބޯޑެއްގެ ލަފާގެ ދަށުން ހިންގާ ހޮސްޕިޓަލެއްގެ ގޮތުގައި ސަރުކާރުން ހަމަޖައްސާފައިވާ ހޮސްޕިޓަލެކެވެ. އެގޮތުން ކުޅުދުއްފުށި ރިޖަނަލް ހޮސްޕިޓަލް ހިންގާނެ ގޮތުގެ ޕްލޭނެއް އެކުލަވާލުމަކީ ޤަވަނިން ބޯޑުގެ މައްޗަށް އެންމެ ފުރަތަމަ ލާޒިމްކުރާ އެއްކަންތަކެވެ.
ކުޅުދުއްފުށި ރީޖަނަލް ހޮސްޕިޓަލުން 2022 ން 2026 ށް އަމަލުކުރުމަށް އެކުލަވާލައި ތައްޔާރުކުރި މި ސްޓެރެޓެޖިކް އެކްޝަން ޕްލޭން އަކީ އެހޮސްޕިޓަލްގެ ދުރު ރާސްތާ ތަރައްޤީގެ ޕްލޭންގެ ތެރެއިން ފުރަތަމަ 5 އަހަރު އަމަލުކުރާނެ ގޮތުގެ އެކްޝަން ޕްލޭންކަމަށް އެހޮސްޕިޓަލްގެ ފަރާތުން ހާމަކުރައްވައެވެ.
މިރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުން ރައީސް އޮފީހުގެ ސެކްރެޓަރީ ކެބިނެޓް އެފެއާރޒް އަލްފާޟިލް އަހުމަދު ހަަސަން ދީދީ ވިދާޅުވީ މަންޒިލަކަށް ވާސިލްވުމަށްޓަކައި ދަތުރުކުރާނެ އަމާޒެއް އޮންނަންޖެހޭނެކަމަށެވެ. އެގޮތުން މި އެކްޝަން ޕްލޭން އަކީ ކުޅުދުއްފުށި ރީޖަނަލް ހޮސްޕިޓަލްގެ ތަރައްޤި އެހެން ހަރުފަތަކަށް ގެންދިއުމަށް ކޮށާލެވިފައިވާ މަގެއްކަމަށާއި، މިމަންޒިލަށް ވާސިލްވުމަށް ހޮސްޕިޓަލްގެ ހުރިހާ ލެވެލް އެއްގެ މުއައްޒަފުން އަތުކުރި އޮޅާލައިގެން ފޫހި ކަމެއްނެތި މަސައްކަތް ކުރަންޖެހޭނެ ކަމަށް ވިދާޅުވިއެވެ.
މިރަސްމިއްޔާތުގައި ކުޅުދުއްފުށި ރީޖަނަލް ހޮސްޕިޓަލްގެ ޤަވަނިން ބޯޑްގެ ޗެއަރޕާސަން އައިމިނަތު ޤާސިމް ދެއްކެވި ވާހަކައިގައި، ޤަވަނިން ބޯޑްގެ މައްޗަށް ލާޒިމްކުރާ އެންމެ މުހިންމު އެއްކަމަކީ އެކްޝަން ޕްލޭން އެއް އެކުލަވާލުންކަމަށާއި، މިމަސައްކަތް ކުރުމަށް ގާތްތަނޑަކަށް އަހަރެއްހާ ދުވަސް ހޭދަވެފައިވާކަމަށެވެ. އަދި މި ޕްލޭން އެކުލަވާލުމަށް ހޮސްޕިޓަލްގެ އެކި ޑިޕާރޓްމަންޓް ތަކުން ވަރަށްބޮޑު އެހީތެރިކަމެއް ދެއްވާފައިވާކަން ފާހަގަކޮށް އެކަމަށް ޝުކުރު އަދާކުރެއްވިއެވެ. އަދި މިއީ މިހޮސްޕިޓަލްގެ 40 އަހަރުގެ ތާރީހުގައި އަލަށް ކުރެވުނުކަމަކަށްވާއިރު މިއީ ލިބިގެން ދިޔަ ނުހަނު ބޮޑު ކާމިޔާބީއެއްކަމަށް ފާހަގަ ކުރެއްވިއެވެ.
ކުޅުދުއްފުށި ރީޖަނަލް ހޮސްޕިޓަލްގެ ސްޓްރެޓެޖިކް އެކްޝަން ޕްލޭންގެ އަމާޒަކީ ،އެހޮސްޕިޓަލަކީ މުޅި ރާއްޖޭގެ އެއްވަނަ މަލްޓިސްޕެސަލިޓީ ހޮސްޕިޓަލްކަމުގައި ވެގެންދިއުމެވެ.
