"ނޭޝަނަލް ޑައިގްނޯސްޓިކް ސެންޓަރ" ޤާއިމްކުރުމަށް އައިޖީއެމްއެޗްގެ ހަދާ 25 ބުރީގެ އިމާރާތުގެ މަސައްކަތް ނިމި ހިދުމަތް ދޭން ފެށުމުން ހޮސްޕިޓަލްގެ ހިދުމަތްތައް ތިން ގުނަ އަށް އިތުރުވެގެންދާނެ ކަމަށް އައިޖީއެމްއެޗް ހޮސްޕިޓަލުން ބުނެފިއެވެ.
އާ ޢިމާރާތުގެ މަސައްކަތް މިހާރު ގޮސްފައިވާ ހިސާބާ ގުޅޭ ގޮތުންނާއި އަލަށް ތަޢާރަފް ކުރާނެ ހިދުމަތްތަކާ ގުޅޭ ގޮތުން ރާއްޖެއެމްވީ އަށް މަޢުލޫމާތު ދެއްވަމުން، އައިޖީއެމްއެޗްގެ ޑިރެކްޓަރ ޕަބްލިކް ރިލޭޝަންސް އެންޑް މީޑިއާ، އަޙްމަދު މަޢުސޫމް ވިދާޅުވީ، އައިޖީއެމްއެޗްގައި މިހާރު އެންމެ ބޮޑަށް ދިމާވެފައި ދައްޗަކީ ޖާގައިގެ ދަތިކަމާއި އެނދުގެ ދަތިކަން ކަމަށެވެ. ނަމަވެސް އާ އިމާރާތް ނިމި ހިދުމަތް ދޭން ފެށުމުން އެ ދަތިތަކަށް ވެސް ވަރަށް ބޮޑު ހައްލެއް ލިބިގެންދާނެ ކަމަށް މައުސޫމް ވިދާޅުވިއެވެ.
އެގޮތުން އައިޖީއެމްއެޗްގެ ބެޑް ކެޕޭސިޓީ 500 އަށް އިތުރު ވެގްނދާނެކަން މައުސޫމް ފާހަގަ ކުރެއްވިއެވެ.
މައުސޫމް ވިދާޅުވީ އާ ހިދުމަތްތައް ތަޢާރަފް ކުރެވިގެންދާއިރު އެ ހިދުމަތްތައް ދިނުމަށް ބޭނުންވާ ވަސީލަތްތައް ގާއިމް ކުރުމަށް ވެސް ޖާގަ ބޭނުންވާ ކަމަށެވެ. އެގޮތުން އާ އިމާރާތާއެކު އެކަމަށް ވެސް ހައްލު ލިބިގެންދާނެ ކަމަށް މައުސޫމް ވިދާޅުވިއެވެ.
މައުސޫމް ވިދާޅުވީ އައިޖީއެމްއެޗްގެ އާ އިމާރާތް ފަރުމާ ކޮށްފައި ވަނީ ހޮސްޕިޓަލުން ދެމުން ގެންދާ ހިދުމަތްތައް ވަރަށް ބޮޑަށް އިތުރު ކުރެވޭނެ ގޮތަށް ކަމަށެވެ. އެގޮތުން އާ އިމާރާތުން ހިދުމަތް ދޭން ފެށުމާ އެކު އިތުރު ދެ އެމްއާރުއައި މެޝިނާއި ސީޓީސްކޭންގެ ދެ މެށިން ބެހެއްޓިގެންދާނެ ކަމަށް މައުސޫމް ވިދާޅުވިއެވެ.
އޭނާ ވިދާޅުވީ މިހާރު ބޭނުން ކުރަމުންދާ އިމާރާތުގައި ޑޮކްޓަރަށް ދެއްކުމަށް އަންނަ މީހުންނަށް ތަފާތު އެކި ދަތިތަކާ ކުރިމަތިލާން ޖެހޭ ކަމަށެވެ. ނަމަވެސް އާ އިމާރާ ނިމި ހިދުމަތް ދޭން ފެށުމުން ޑޮކްޓަރަށް ދެއްކުމަށް އަންނަ ބަލި މީހުންނަށް މިހާރަށް ވުރެ އަވަހަށް ހިދުމަތް ލިބި ފަސޭހަ ކަމާއެކު ގިނަ އަދަދެއްގެ ބަޔަކަށް އެއް ފަހަރާ ހިދުމަތް ދެވޭނެ ކަމަށް މައުސޫމް ވިދާޅުވިއެވެ.
އެގޮތުން އައިޖީއެމްއެމްޗްގެ އެކި ޑިޕާޓްމެންޓްތަކުން ދެމުން އަންނަ ހުރިހާ ހިދުމަތެއް ވެސް ދެގުނަ އަށް އިތުރުވެގެންދާނެ ކަމަށް މައުސޫމް ވިދާޅުވިއެވެ.
މީގެ އިތުރުން މައުސޫމް ވިދާޅުވީ މިހާރު ބޭނުން ކުރަމުންދާ އިމާރާތުގައި ޑޮކްޓަށް ދެއްކުމަށް އަންނަ ބަލި މީހުން ތިބޭނެ އެކަށީގެންވާ ތަންތަން ގާއިމް ކުރެވިފައި ނެތް ކަމަށާއި ސަބަބަކީ އެ ވަރަށް ޖާގަ ނެތުން ކަމަށް މައުސޫމް ވިދާޅުވިއެވެ.
ނަމަވެސް ޑޮކްޓަރަށް ދެއްކުމަށް އަންނަ ބަލި މީހުން އިށީދެލައިގެން ތިބޭނެ ޖާގަ އާއިމާރާތާ އެކު ގާއިމް ކުރެވިގެންދާނެ ކަމަށާއި އަދި އެންމެ އެއްތަނަކަށް ތޮއްޖެހިގެން ތިބެން ޖެހޭ މައްސަލަ އަށް ވެސް ހައްލު ލިބި، ހިތްހަމަޖެހިގެން ފެސާހަ ކަމާއެކު ޑޮލްޓަރަށް ދެއްކުމުގެ ކަންކަން ކުރިއަށް ގެންދެވޭނެ ކަމަށް މައުސޫމް ވިދާޅުވިއެވެ.
އޭނާ ވިދާޅުވީ "ނޭޝަނަލް ޑައިގްނޯސްޓިކް ސެންޓާ" ނިމުމުން އައިޖީއެމްއެޗުން މިހާރު ދެމުން ގެންދާ ހުރިހާ އައުޓް ޕޭޝަންޓް ޚިދުމަތާއި ރާއްޖޭގައި ފަރުވާދިނުމަށް ބޭނުންވާ ބަލިތަކުގެ މުހިންމު ހުރިހާ ތަޙްލީލްތަކެއް ހެދޭނޭ އިންތިޒާމް ޤާއިމްކުރެވިގެންދާނެ ކަމަށެވެ. އަދި އިތުރު އާ ހިދުމަތްތައް ވެސް ތަޢާރަފް ކުރެވޭނެ ކަމަށް މައުސޫމް ވިދާޅުވިއެވެ.
އެގޮތުން ސްޕޯޓްސް މެޑިސިންގެ ޚިދުމަތާއި ފިޒިއޯތެރެޕީ ހައިދްރޯތެރެޕީ އަދި އިތުރު ޚިދުމަތްތަކެއް އައިޖީއެމްއެޗްއަށް ތަޢާރަފުކުރާނެ ކަމަށް މައުސޫމް ވިދާޅުވިއެވެ. ހަމައެހެންމެ ރޭޑިއޮލޮޖީގެ ޚިދުމަތް ވެސް އިތުރަށް ފުޅާވެގެންދާނެ ކަމަށް މައުސޫމް ވިދާޅުވިއެވެ.
މީގެއިތުރުން ނެޝަނަލް ޑައިގްނޯސްޓިކް ޢިމާރާތުގައި ޗައިލްޑް ކެއަރ ސެންޓަރަކާއި، ޖިމާއި، ރިހެބިލިޓޭޝަން ސުއިޓެއް ވެސް ހިމެނެއެވެ. އަދި ހައިޑްރޯ ތެރަޕީ ސުއިޓެއްގެ ގޮތުގައި ބޭނުންކުރާނެ ސްވިމިންގޕޫ ލްވެސް ހިމެނެއެވެ. ސަރުކާރުގެ އަމާޒަކީ 25 ބުރީގެ މި ޢިމާރާތުގެ މަސައްކަތް 2018 ވަނަ އަހަރުގެ ޖޫންމަހުގެ ނިޔަލަށް ނިންމައި، އެތަނުގެ ޚިދުމަތް ޢާއްމުންނަށް ދެއްވަން ފެއްޓުން ކަމަށް މައުސޫމް ވިދާޅުވިއެވެ.
