ކުޅުދުއްފުށި ސިޓީ ކައުންސިލުން ތަރައްޤީ ކުރި "ރަށްމަތިފަންނު" މައިޒާން ހުޅުވައިފި
23 ސެޕްޓެމްބަރު 2022 | ހުކުރު 10:56މިމައިޒާން ތަރައްޤީ ކުރުމަށް 1.1 މިލިއަން ރުފިޔާ ކައުންސިލުން ވަނީ ހަރަދުކޮށްފައި
"ރަށްމަތި ފަންނު" ހުޅުވުން
ކުޅުދުއްފުށީ ސިޓީ ކައުންސިލުން އާބަނދަރު ސަރަހައްދުގައި ތަރައްޤީކުރި ފިނި މައިޒާން "ރަށްމަތިފަންނު" ރަސްމީކޮށް ހުޅުވައިފިއެވެ. މިމައިޒާން ތަރައްޤީކޮށްފައިވަނީ ކުޅުދުއްފުށި ހުޅަގުފަރާުގައި އަލަށްހެދި ބަނދަރު ސަރަހައްދުގައެވެ.
ބުރާސްފަތި ދުވަހު ހަވީރު އެކަމަށްޓަކައި ބޭއްވި ހާއްޞަ ރަސްމިއްޔާތެއްގައި މިމައިޒާން ހުޅުވައިދެއްވީ ކައުންސިލްގެ މޭޔަރ މުހައްމަދު އާތިފްއެވެ. މިމައިޒާން ތަރައްޤީ ކުރުމަށް 1.1 މިލިއަން ރުފިޔާ ހަރަދުކޮށްފައިވާއިރު، މައިޒާނަށް ޒިޔާރަތްކުރާ މީހުންނަށް އުނދޯންޏާއި ބެޗުންތަކާއި ހަޓްތައް ތަރައްގީކޮށްފައިވެ އެވެ. މޫދަށް އެރުމަށްފަހު ފެންވެރޭނެ އިންތިޒާމާއި ފާހާނާ ކުރެވޭނެ ގޮތްވެސް މި މައިޒާނުގައި ގާއިމުކޮށްފައިވެ އެވެ.
މި ރަސްމިއްޔާތުގައި ވާހަކަދައްކަވަމުން މޭޔަރު އާތިފް ވިދާޅުވީ، ކުޅުދުއްފުށި ތަރައްޤީވެ ކުރިއަރާދާއިރު މިފަދަ މައިޒާންތަކެއް ހުރުމަކީ މުހިންމުކަމެއް ކަމަށެވެ. އަދި މިއީ ސިޓީ ކައުންސިލުން ތަރައްޤީކުރި މިފަދަ ފުރަތަމަ މައިޒާން ކަމަށާއި ކައުންސިލްގެ ވިސްނުން ހުރީ ކުރިއަށްއޮތްތަނުގައި މިފަދަ މައިޒާންތައް ރަށުގެ އެކި ހިސާބުތަކުގައި ތަރައްޤީ ކުރުމަށް ކަމަށް މޭޔަރ ވިދާޅުވިއެވެ. މީގެ އިތުރުން މޭޔަރ ވިދާޅުވީ މިތަންތަނުގެ ސާފުތާހިރުކަން ދެމެހެއްޓުމަށް ރައްޔިތުންގެ އެހީތެރިކަން ބޭނުންވާ ކަމަށެވެ.
