މިފްކޯއިން ހިންގަމުން އައި 14 އައިސްޕްލާންޓެއް ފެނަކައާ ހަވާލުކޮށްފި
22 ސެޕްޓެމްބަރު 2022 | ބުރާސްފަތި 08:22މި އައިސްޕްލާންޓުތަކުގެ ތަޅުދަނޑި ވަނީ ހަވާލުކޮށްފައި
މިފްކޯ އައިސްޕްލާންޓުތައް ފެނަކައާ ހަވާލުކުރުން
މޯލްޑިވްސް އިންޑަސްޓްރިއަލް ފިޝަރީސް ކޮމްޕެނީ (މިފްކޯ) އިން ހިންގަމުންއައި 14 އައިސްޕްލާންޓެއް ފެނަކަ ކޯޕަރޭޝަން ލިމިޓެޑާ ހަވާލުކޮށްފިއެވެ.
މި އައިސްޕްލާންޓުތައް ފެނަކައާ ހަވާލުކޮށްފައިވަނީ މިކަމަށްޓަކާ ބުރާސްފަތި ދުވަހު ބޭއްވި ޚާއްސަ ރަސްމިއްޔާތެއްގައެވެ. އައިސްޕްލާންޓުތައް ފެނަކައާ ހަވާލުކުރުމުގެ އެއްބަސްވުމުގައި މިފްކޯގެ ފަރާތުން ސޮއިކުރެއްވީ ސީއީއޯ އަދި މެނޭޖިން ޑިރެކްޓަރު އިސްމާއިލް ފައުޒީއެވެ. ފެނަކައިގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައީދެވެ.
އަދި މި އައިސްޕްލާންޓުތަކުގެ ތަޅުދަނޑި ވެސް މި ރަސްމިއްޔާތުގައި ވަނީ ހަވާލުކޮށްފައެވެ. ފެނަކައާ މި ތަޅުދަނޑިތައް ހަވާލުކޮށްދެއްވީ މިފްކޯގެ ސީއީއޯ ފައުޒީއެވެ.
މީގެ އިތުރުން މަސްވެރިންނަށް ފަސޭހައިން އައިސް ލިބޭނެ އިންތިޒާމު ހަމަޖެއްސުމަށް "ފެނަކަ އައިސް"ގެ ނަމުގައި މޯބައިލް އެޕްލިކޭޝަނެއް ވަނީ ލޯނެޗުކޮށްފައެވެ. މި އެޕްލިކޭޝަނުން ކުރީބައިގައި އައިސް ގަނެވޭނެއެވެ. އަދި އައިސް ލިބުމަށް ދިމާވާ ދަތިތަކަށް ހައްލު ލިބިގެންދާނެ ކަމަށް ފެނަކައިން ބުނެއެވެ.
މި ރަސްމިއްޔާތުގައި ބައިވެރިވެވަޑައިގެން ވާހަކަދައްކަވަމުން ފިޝަރީސް މިނިސްޓަރު ޑރ. ހުސައިން ރަޝީދު ހަސަން ވިދާޅުވީ މިއީ ރަނގަޅު ބަދަލަކަށް ވާނެ ކަމަށެވެ. ފެނަކައިގެ ދަށުން މި ޚިދުމަތް އެންމެ ރަނގަޅަށް ފޯރުކޮށްދެވޭނެކަމަށް ގަބޫލުކުރައްވާ ކަމަށާއި، ޚިދުމަތްތައް ފަސޭހަވެ އަވަސްވާނެކަން ޔަގީންކުރައްވާ ކަމަށެވެ.
އަދި އައިސް ފޯރުކޮށްދިނުމަށް މިފްކޯއިން ކުރަމުންދާ މަސައްކަތުގެ ބަދަލުގައި މަސް ޕްރޮސެސްކުރުންފަދަ ކަންކަމަށް ފޯކަސްކުރުމަށް އިތުރަށް ފަސޭހަވެގެންދާނެ ކަމަށްވެސް މިނިސްޓަރުވިދާޅުވިއެވެ.
