ބެޑްމިންޓަންގެ ތަރިންތަކެއް އުފެއްދުމަށް އަޖުފާންގެ ވަރުގަދަ އަޒުމެއް!

މުޙައްމަދު އަޖުފާން ރަޝީގެ ނަމަކީ ކުޅިވަރުގައި, ވަކިން ޚާއްޞަކޮށް ބެޑްމިންޓަންގައި ފަރިތަ ނަމެކެވެ. ކުޅުންތެރިއެއްގެ ގޮތުގައި އޭނާގެ ތަޢާރަފެއް ބޭނުމެއް ނުވެއެވެ. ރާއްޖޭގެ ބެޑްމިންޓަންގެ އެންމެ ކާމިޔާބު އެއް ކުޅުންތެރިއަކީ އެއީއެވެ. ކުޅިވަރުން ރާއްޖެއަށް ރަން ވަނަތަކަށް ހޯދައިދީފިއެވެ. އަދިވެސް ހުރީ ކުޅުންތެރިއެއްގެ ގޮތުގައި އެފަދަ އިތުރު ކާމިޔާބީ ހޯދުމުގެ އަޒުމުގައެވެ.

އެކަމަކު އެއަށްވުރެ މާބޮޑު އަޒުމެއެއް އޭނާގެ މިހާރު އެބައޮތެވެ. މާ ޝައުޤުވެރިކަމާއެކު ކުރަމުން އަންނަ އެހެން މަސައްކަތެއް އެބައޮތެވެ. ކޯވިޑާއެކު ކުޅިވަރަށް އައި ހުއްޓުމުގެ އަސަރު ބެޑްމިންޓަންއަށްވެސް ކުރިއެވެ. ޚާއްޞަކޮށް ސްކޫލް ބެޑްމިންޓަން ޕްރޮގްރާމް ހުއްޓުމަކަށް އައުމުން ބެޑްމިންޓަންގެ ކުރިމަގަށް ނުރަނގަޅު އަސަރު ކުރާނެކަމުގެ ނުތަނަވަސްކަން އުފެދުނެވެ. އެނުތަނަވަސްކަމުން އަރައިގަތުމަށް އަޖުފާން އިންޓަރނޭޝަނަލް ބެޑްމިންޓަން އެކަޑަމީ 2020 ވަނަ އަހަރު ރަޖިސްޓްރީކޮށް ޒުވާން ޖީލެއް ބިނާ ކުރުމުގެ މަސައްކަތް ފެށިއެވެ. ރާއްޖޭގެ ޔޫތު ޑިވެލޮޕްމަންޓަށް އޭނާ ފެށި ދަތުރުގެ ފެށުން ރަނގަޅެއް ނޫނެވެ.

4-15 އަހަރާ ދެމެދުގެ ދެޖިންސްގެ ކުދިންނާއެކު އަޖުފާން ކުރަމުންދާ މަސައްކަތުގައި އޮތީ ކާމިޔާބީތަކެއް ހޯދައިދިނުމުގެ ވިސްނުމާއި އަޒުމެވެ. އާދައިގެ ގޮތަކަށް ފެށި ދަތުރުގައި ދެ އަހަރުގެ ތެރެގައި އާދެވިފައިވާ ހިސާބަކީ ނަތީޖާ ނެރެވޭނެކަން ދައްކުވައިދޭ ހެއްކެކެވެ. އެއީ ކޯޗެއްގެ ގޮތުގައި އަޖުފާނަށް އޮތް ބޮޑު އިތުބާރެކެވެ. ހުކުރު ދުވަސް ފިޔަވާ ހަފްތާގެ ކޮންމެ ދުވަހަކު އެކި ވަގުތު ތަކުގައި ތަމްރީނު ހޯދަމުންދާ ކުޅުންތެރިންގެ ފަރާތުން އަޖުފާނަށް ފެންނަނީ ހުނަރެވެ. މަސައްކަތެވެ. އެއާއެކު އެކުދިން ކާމިޔާބީ ހޯދާނެކަމުގެ ޔަޤީންކަން އަޖުފާނަށް އެބައޮތެވެ.

މަސައްކަތުގައި އޮތް ބޮޑު ގޮންޖެހުމަކީ ކޯޓުގެ ދަތިކަމެވެ. 150 އެއްހާ ކުދިން ބޭނުންކުރަން އޮތީ އެކުވެނި ކޯޓްތަކެވެ. އެއީ ފުދޭ މިންވަރެއް ނޫނެވެ. ޔޫތު ޑިވެލޮޕްމަންޓަށް ޚާއްޞަ ކޯޓުތަކެއް ހިމެނޭ ދެވަނަ އެކުވެންޏެއް ހެދުމަކީ ހައްލުކަމަށް އަޖުފާން ދެކެއެވެ. އެކަމަކު އޭނާއަށް އޮތް ހިތްހަމަޖެހުމަކީ ސަރުކާރާއި, ބެޑްމިންޓަން އެސޯސިއޭޝަނުންވެސް ދޭ ސަޕޯޓެވެ. ބެޑްމިންޓަންގެ ތަރިންތަކެއް އުފެއްދުމަށް ކުރާ މަސައްކަތުގައި އެންމެންގެ ސަޕޯޓް ލިބޭކަން އޭނާ ފާހަގަކުރިއެވެ. މިނިސްޓަރާއި ހިސާބުން، އެސޯސިއޭޝަންގެ ރައީސްއާ ހިސާބުން, ބެލެނިވެރިންނާ ހަމައަށްވެސް ލިބޭ ސަޕޯޓަކީ އުއްމީދުކުރާ ނަތީޖާއާއި, ރަން ވަނަތައް ހޯދައިދިނުމަށް އޮތް ޔަޤީންކަމެވެ.

އަޖުފާންގެ އުއްމީދުތައް ހާސިލްވާނެކަމުގެ ހުރިހާ ނިޝާނެއް ކުޅުންތެރިންގެ ފަރާތުން ފެނެއެވެ. ބެލެނިވެރިން އެހިތްވަރު އެބަކުރެއެވެ. ކުޅިވަރުގެ ވަސީލަތްތައް ޤާއިމްކުރުމުގައި ސަރުކާރު ސްޕީޑް ހުރި ވަރަށް ބަލާއިރު އޮތް ގޮންޖެހުމަށްވެސް އަވަސް ހައްލެއް އަންނާނެކަމަށް ކުރެވޭ އުއްމީދު ބޮޑެވެ.