މިއީ ދޮށީ އުމުރުގެ މީހެކެވެ. ހިނގާބިނގާވެ އުޅުމުގައި ނުކުޅެދުންތެރި ކަމެއް ހުއްޓަސް، ހުއްޓި ލައިގެން އެހެރީ އެންމެ ކާރުބާރު ބޮޑު މަގުގެ މެދުގައެވެ. އޭނާ ކަށަވަރު ކޮށްދެނީ ގާނޫނުއަސާސީން ލިބިދޭ ހިޔާލުފާޅު ކުރުމުގެ މިނިވަންކަމެވެ. ރާއްޖޭގެ ހާލަތާ ގުޅިގެން އޭނާ ސިކުނޑިއަށް ވިސްނައި ގަނެވޭ، އަދި ދޭހަކުރެވޭ ކަންތައްތައް އެ ފާޅުކުރަމުންދަނީ ލެސްލީތަލް ހަތިޔާރާއެކު ނުކުމެ ތިބި، ރަޔަޓް ފުހުންގެ ކުރިމަތީގައެވެ. މުޒާހަރާ ރޫޅާލުމަށް އަނިޔާވެރި އަމަލުތަކެއް ހިންގީ އޭނާގެ ކުރިމަތީގަ އެވެ. ހާލަތާ ނުބައްދަލު ބާރު ބޭނުން ކުރި މަންޒަރު ފެނި، ނުރައްކަލަށް އޭނާ ހުށަހެޅިފައިވާކަން ވެސް އޭނާއަށް އެ ދަނޑިވަޅުގައި އެނގޭނެއެވެ. އެ ހާލަތުގައި ވެސް އޭނާ އެ ބޭނުން ކުރަނީ ގާނޫނުން ކަށަވަރުކޮށްދޭ ހައްގެވެ. ހިޔާލުފާޅުކުރުމުގެ ހައްގެވެ. އިންޒާރަކާ ނުލައި، ކޮންމެ ތަނަކަށް ވެސް، އެއްވެ ޝުއޫރުފާޅުކުރެވޭނެ ކަމެވެ.
މިއަދު އެތައް ބައެއްގެ ތައުރީފު އޮހެމުންދަނީ އޭނާގެ ހިތްވަރަށެވެ. އޭނާގެ އަޒުމަށެވެ. އަދި އޭނާގެ ކެރުމަށެވެ. ސަރުކާރާ ދެކޮޅަށް ގުޅިފައިވާ ޕާޓީތަކުން މަޖީދީމަގުގައި ކުރިއަށް ގެންދާ މުޒާހަރާއަށް ނުކުމެ، ހުއްޓިލައިގެން އެހެރީ މަޖީދީމަގުގެ މެދުގަ އެވެ. މާވެޔޮމަގާއި މަޖީދީމަގު ގުޅޭ ކަންމައްޗަށް ނުކުމެ، ހުއްޓިލައިގެން އެހެރީ ދެ އަސާގެ މަތީގައެވެ. އަސާގަނޑަކުން ކޮޅަށް ހުރުމުގެ ހިތްވަރާއެކު، ރައްޔިތުންނަށް އޭނާ ދެމުންދާ ސާބަހަކީ އޭނާގެ ހިތްވަރު އިތުރަށް ވަރުގަދާ ސަބަބެވެ.
ދިވެހިން އެ ދިދައެއްގެ ހިޔާދަށުގައި ތިބި، ފެއްސާއި ރަތާއި ހުދުގެ ދިދަ ހޫރުވަމުން، ރަޔަޓް ގިޔަރުގައި ނުކުމެ ތިބި، ފުލުހުންނަށް އެ އިލްތިމާސްކުރަނީ އަނިޔާވެރި ނުވުމަށެވެ. އޭނާގެ ހިތްވަރުން ބުނެދެނީ ދިވެހިން ބަލައިގެންފައިވާ ރިޔާސީ ނިޒާމުގައި ސަރުކާރު ޖަވާބުދާރީ ކުރުވުމަށް ފެހި ގާނޫނުއަސާސީން ލިބިދީފައިވާ ހައްގުތައް ނިގުޅައި ނުގަތުމަށެވެ.
އެއްވުމުގެ ތެރޭގައި ހުރެ ރާއްޖެޓީވިއާ އޭނާ ވަނީ ވާހަކަ ދައްކާފައެވެ. އޭނާ ބުނި ގޮތުގައި މާލޭގައި ކުރަމުންދާ ސިލްސިލާ މުޒާހަރާތަކަށް އޭނާ ނުކުތީ ރައީސް ޔާމީންގެ ސަރުކާރާމެދު ހިތްހަމަނުޖެހޭކަން ދެއްކުމަށެވެ. އަދި ނުކުޅެދޭ އެހެން ފަރާތްތަކުން ވެސް އޭނާއާއެކު މަގުމައްޗަށް ނުކުތުމަށް އިލްތިމާސްކުރާ ކަމަށް އޭނާ ބުންޏެވެ.
އޭނާ ބުނީ މުޒާހަރާއަށް ނުކުތުމުން، އެތަނުން ދިއުމަށް ފުލުހުން އެންގި ކަމަށާއި ނަމަވެސް ރައީސް ޔާމީން މަގާމުން ދުރުކުރުމަށް ކުރަންޖެހޭ މަސައްކަތުގައި ވެސް އޭނާ ވެސް ދެމިހުންނާނެ ކަމަށެވެ.
އޭނާއަށް ރާއްޖޭގެ ހާލަތު ވަޒަން ކުރެވިއްޖެއެވެ. ރައީސް ޔާމީންގެ ފިކުރާ ކުޑަކޮށް ހިޔާލުތަފާތުވި މީހަކު ވެސް، އެކަހެރިކޮށް ނުހައްގު އަނިޔާދިންތައް އޭނާއަށް މިއަދު ފެނިއްޖެއެވެ. ވާދަވެރި ސިޔާސީ މާހައުލު ކިލަނބުކޮށް، ސަރުކާރު ޖަވާބުދާރީ ކުރުވުމަށް ބަސް ބުނަން ތިބި ސިޔާސީ ހުރިހާ ލީޑަރުންނަށް ދިން އަނިޔާ ތަމްސީލުވަމުން ދިޔައީ އޭނާގެ ކުރިމަތީގައެވެ. ހިޔާނާތްތެރިން މިތުރުންނަށް ހަދައި، ފަސާދައިގެ ހުޅުގަނޑުގައި ދިވެހި މާލިއްޔާ ހުލިވުމުން، އެކަމާ ދެކޮޅަށް ނުކުތް ލީޑަރުން ހައްޔަރު ކުރީ ވެސް އޭނާގެ ކުރިމަތީގައެވެ.
ތިން ބާރުވަކިވެފައިވާ ނިޒާމުގެ ހުއްޓުމަކަށް ގެނެސް، އެންމެ މަތީ ކޯޓުގެ، މަތީ ފަނޑިޔާރުން ހައްޔަރުކޮށް، ރައްޔިތުންގެ މަންދޫބުންގެ ގޮތުގައި ތިބި މަޖިލީހުގެ މެމްބަރުން ހައްޔަރުކޮށް، ޣައިރު ގާނޫނީ އަމުރަށް ކިޔަމަންނުވި ސިފައިންނާއި ފުލުހުން ހައްޔަރުކޮށް، ދެމުންދާ އަނިޔާގެ ދިފާއުގައި ނުކުމެ އެ ހުރީ، މި ނިކަމެތި ރައްޔިތުމީހާއެވެ.
މަގުތަކަށް ނުކުމެ އަޑުއުފުލަމުންދާ މީހުންގެ ފަރާތުން ހިތްވަރު ލިބި، ހައްގުގެ މަގުގައި ގޮވާލުމަށް އޭނާ މިއަދު އެހުރީ ނުކުމެވެ. އޭނާގެ ހިތްވަރާއި ކެރުމުން ބުނެދެނީ ކޮންމެ ދުވަހެއް އަދި ކޮންމެ ވަގުތުކޮޅެއް، އަދި ހިނދުކޮޅެއް ވެސް ގެއްލުވާލައިފިނަމަ، ދުނިޔެއަށް އުފަންވާން ތިބި، ދިވެހި ދަރިންގެ ހައްގުތައް ނިކުޅައިގެންފާނެކެމެވެ. ދިވެހި ފަސްގަނޑުން ދިވެހި ބިމުން، ޣައިރު މުސްލިމުންނަށް މިލްކު ނުކުރެވޭނެކަން އޭނާ އެ ދަނީ ބުނެދެމުންނެވެ.
އޭނާގެ ހިތްވަރަށް އެތައް ބަޔަކު ސޯޝަލް މީޑިއާގައި ތައުރީފު ބަންޑުން ކުރަމުންދާއިރު، އޭނާގެ ހިތްވަރުން ބުނެދެނީ ކުޅެދޭ މީހުންނަށް ވުރެ، އޭނާ ހިތްވަރު ވަރުގަދަކަމެވެ.
