މިއަހަރު ނިމުމުގެ ކުރިން ބަންކަރިންގެ ހިދުމަތް އިހަވަންދިއްޕޮޅުގައި ދޭން ފަށާނެ – ނަހުލާ

އާގު ބޯޓު ފަހަރަށް ބޭނުންވާ ބަންކަރިންގެ ހިދުމަތް މިއަހަރު ނިމުމުގެ ކުރިން އިހަވަންދިއްޕޮޅުގައި ދޭން ފަށާނެ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ ބައިނަލްއަގުވާމީ ކަނޑުދަތުރާ ބެހޭ ދުވަސް ފާހަގަކުރުމަށް އަންގާރަ ދުވަހުގެ ރޭ ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރު ނަހުލާ ވިދާޅުވީ ކުރީ ސަރުކާރުތަކުން މެރިޓައިމް ދާއިރާ ކުރިއަރުވަން މަސައްކަތް ކޮށްފައި ނުވި ނަމަވެސް މި ސަރުކާރުން އެ ދާއިރާ ކުރިއެރުވުމަށް ހާއްސަ އިސްކަމެއްދޭ ކަމަށެވެ.

މިނިސްޓަރު ވިދާޅުވީ ބައިނަލްއަގުވާމީ ބަންކަރިންގެ ހިދުމަތް މިއަހަރު ނިމުމުގެ ކުރިން އިހަވަންދިޕޮޅުގައި ފެށިގެންދާނެ ކަމަށެވެ. މިނިސްޓަރު ވިދާޅުވީ ރާއްޖެ ހިމެނޭ ސަރަހައްދުން ދަތުރުކުރާ އުޅަނދުތަކަށް ތެޔޮ ފޯރުކޮށްދިނުމަށް އިހަވަންދިޕޮޅުގައި ތެޔޮ ސްޓޯރޭޖެއް ގާއިމްކޮށް، ބަންކަރިންގެ ހިދުމަތް ފެށުމަށް ވާންޖެހޭ ތައްޔާރީތައް ވަމުންދާ ކަމަށެވެ.

އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ތަރައްގީކުރެވެންދެން އެ ސަރަހައްދުން ދަތުރުކުރާ އާގުބޯޓުފަހަރަށް ދެވިދާނެ ހިދުމަތްތައް ފާހަގަކޮށް، ހއ. ހޯރަފުށި، ތުރާކުނު އަދި އުލިގަމު ކައުންސިލުން ހުށަހަޅުއްވާފައިވާ ގަރާރުގައިވާ ކަންކަން ވީ އެންމެ އަވަހަށް އެ ސަރަހައްދުގައި ފެށުމަށްޓަކައި، އެ މިނިސްޓްރީގެ އިސްނެގުމަށް ކަމާ ގުޅޭ އިދާރާތައް ހިމެނޭ ގޮތަށް ވޯކިންގ ގްރޫޕެއް އެކުލަވާލެވި މަސައްކަތް ކުރެވެމުންދާ ކަމަށް އިކޮނަމިކް މިނިސްޓަރު ފައްޔާޒު އިސްމާއިލް ވަނީ ރައްޔިތުންގެ މަޖިލީހުގައި ވިދާޅުވެފައެވެ.

މިނިސްޓަރު ވިދާޅުވެފައިވަނީ ވޯރކިންގ ގްރޫޕުން ކުރެވުނު މަޝްވަރާތަކަށް ފަހު އިހަވަންދިއްޕޮޅުގައި އެންމެ އަވަހަށް ފެށިދާނެ ހިދުމަތްތަކުގެ ތެރޭގައި ކްރޫ ޗޭންޖްގެ ހިދުމަތާއި، ޝިޕް ސްޓޯރ އަދި ސަޕްލައި ފޯރުކޮށްދިނުމުގެ ހިދުމަތް ފާހަގަކުރެވޭ ކަމަށް މިނިސްޓަރު ވަނީ ވިދާޅުވެފައެވެ. އެހެންކަމުން މި ކަންކަމަށް ބޭނުންވާ އިމާރާތާއި ވަސީލަތްތައް ގާއިމްކޮށް، ވާންޖެހޭ އެހެނިހެން ތައްޔާރީތައް ވުމުގެ މަސައްކަތް މޯލްޑިވްސް ޕޯޓްސް ލިމިޓެޑާއި، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ކަމާއި ގުޅޭ އެހެނިހެން އިދާރާތަކާ ގުޅިގެން އިކޮނޮމިކް މިނިސްޓްރީ އިން ކުރަމުންދާ ކަމަށެވެ.

މިނިސްޓަރު ވިދާޅުވީ 2022 ވަނަ އަހަރު ފަހުކޮޅު ނުވަތަ 2023 ވަނަ އަހަރުގެ ފުރަތަމަ ކުއާޓަރުގައި އިހަވަންދިއްޕޮޅުގައި ބައިނަލްއަގުވާމީ ބަންކަރިންގެ ހިދުމަތް ފެށުމަށްވެސް ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) މެދުވެރިކޮށް ދަނީ މަސައްކަތް ކުރެވެމުން ކަމަށާއި، މިކަމަށް ބޭނުންވާ ފައިސާ ހަމަޖެއްސުމާއި، އުޅަނދު ފަހަރާއި އިކުއިޕްމެންޓް ހޯދުމާއި، ގާނޫނީ އޮނިގަނޑު އެކުލަވާލުމާއި، އެހެނިހެން ތައްޔާރީތަކުގެ މަސައްކަތްތައް އެސްޓީއޯ އާއި، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ކަމާ ގުޅޭ އެހެނިހެން އިދާރާތަކާއި މިނިސްޓްރީން ކުރަމުންދާ ކަމަށެވެ.