ބަޔާންގެ ވަޒީފާގައި ނާގަލްސްމަނަށް އެއްވެސް ނުރައްކަލެއް ނެތް

ޖަރުމަނުގެ ބަޔާން މިއުނިކްގެ ކޯޗު ހޫލިއަން ނާގަލްސްމަން އަށް ވަޒީފާގެ އެއްވެސް ނުރައްކަލެއް ނެތް ކަމަށް އެ ކުލަބުގެ ރައީސް ހާބާ ހައިނާ ވިދާޅުވެއްޖެއެވެ.

ހާބާ މިހެން ވިދާޅުވީ ބަޔާން މިހާރު އޮތް މަގާމުގެ ގޮތުން ގިނަ ބަޔަކު ނާގަލްސްމަންގެ ވަޒީފާއާމެދު ސުވާލުކުރަމުންދާ ދަނޑިވަޅެއްގައެވެ. މި ސީޒަންގެ މިހާތަނަށް ކުޅުނު ހަތް މެޗުން ބަޔާނަށް ލިބެނީ 12 ޕޮއިންޓެވެ. އެ ޓީމު އޮތީ ތާވަލްގެ ފަސް ވަނަ މަގާމުގައެވެ. އެއް ވަނައިގައި އޮތް ޔޫނިއަން ބާލިންއާ ބަޔާނާ ދެމެދު ފަސް ޕޮއިންޓުގެ ފަރަގު އެބަ އޮތެވެ.

އެކަމާ ގުޅިގެން ޓީޒެޑަށް ދެއްވި އިންޓަވިޔުއެއްގައި ހާބާ ވަނީ ނާގަލްސްމަނަށް އެއްވެސް ނުރައްކަލެއް އަދި ބިރެއް ނެތްކަން ޔަޤީންކޮށްދެއްވާފައެވެ. ހާބާ ވިދާޅުވީ މުޅި ބަޔާނުން ނާގަލްސްމަނާއި، ޓީމުގެ ކުޅުންތެރިންނަށް އިތުބާރުކުރާ ކަމަށާއި، ނާގަލްސްމަންގެ މަސައްކަތާމެދު ހިތްހަމަޖެހޭ ކަމަށެވެ. އިތުރަށް އޭނާ ވިދާޅުވީ އިންޓަނޭޝަލަން ބްރޭކަށްފަހު، ބަޔާނުން މިހާރުގެ ހާލަތު ބަދަލުކުރާނެ ކަމަށާއި، މިހާރު ދިމާވާ ދަތިތަކުން ވެސް އަރައިގަންނާނެ ކަމަށެވެ. ހާބާ ވިދާޅުވީ އެ މީހުންނަނީ ބަޔާން ކަމަށެވެ.

ބަޔާންގެ ކޯޗުކަމުގެ މަގާމަށް ނާގަލްސްމަން ހަމަޖެއްސީ 2021 ވަނަ އަހަރުއެވެ. އޭނާގެ އިރުޝާދުގެ ދަށުން ބަޔާން ވަނީ މިހާތަނަށް 58 މެޗު ކުޅެފައެވެ. އޭގެ ތެރެއިން ބަޔާން ވަނީ 40 މެޗުން މޮޅުވެ، 10 މެޗުން އެއްވަރުވެފައެވެ. އެ ޓީމު ބަލިވެފައިވަނީ އަށް މެޗުންނެވެ.