ބްރައިޓަންގެ އާ ކޯޗުކަމަށް އިޓަލީގެ ރޮބާޓޯ ޑި ޒާބީ ހަމަޖައްސައިފިއެވެ.
ބްރައިޓަންގެ ކޯޗުގެ މަޤާމް ހުސްވީ, އެކްލަބާއެކު ރަނގަޅު މަސައްކަތްތަކެއް ކުރަމުން އައި ކޯޗު ގްރަހަމް ޕޮޓާ ޗެލްސީއާ ހަވާލުވުމުންނެވެ. ބްރައިޓަންއާއެކު ރޮބާޓޯ ޑި ޒާބީ ސޮއިކުރީ ހަތަރު އަހަރުގެ އެއްބަސްވުމެއްގެ ދަށުންނެވެ. ބްރައިޓަންއިން ކޯޗުގެ މަޤާމް ހުސްވުމުން ފުރަތަމަވެސް ގެންނަން ބޭނުންވި ކޯޗަކީ ޒާބީއެވެ. ޒާބީއަކީ ކުރިން ޔުކްރެއިންގެ ޝަހުތަރު ޑޮނެސްކްގެ ކޯޗެވެ. އެކަމަކު ރަޝިޔާއާއި ޔުކްރެއިންގެ ހަނގުރާމައިގެ ސަބަބުން ޖުލައި މަހުން ފެށިގެން ހުރީ ކްލަބާ ދުރުގައެވެ.
43 އަހަރުގެ ކޯޗު ވަނީ ކުރިން ނަޕޯލީއަށް ކުޅެފައެވެ. އޭގެ ފަހުން އިޓަލީގެ ސަސުއޯލޯއާއެކު ތިން އަހަރު ރަނގަޅު މަސައްކަތްތަކެއް ކުރިއެވެ. ރޮބާޓޯ ޑި ޒާބީއާއެކު ބްރައިޓަންއަށް ފުރަތަމަ ވެސް އޮތީ ބޮޑު މެޗެކެވެ. އެއީ އަންނަ މަހުގެ ފުރަތަމަ ދުވަހު ލިވަޕޫލާ ދެކޮޅަށް ކުޅޭ މެޗެވެ. ބްރައިޓަނުންއިން ބުނީ ރޮބާޓޯ އަކީ އިޓަލީއާއި ޔުކްރެއިންގައި އޭނާގެ ކޯޗިންގ ފެންވަރު ސާބިތުކޮށްދީފައިވާ އިތުބާރު އޮތް ކޯޗެއްކަމަށެވެ.
މިވަގުތު ހަތަރު ވަނާގައި އޮތް ޓީމް ޕޮޓާ ކްލަބް ދޫކޮށްލި ފަހުން އަދި މެޗެއް ނުކުޅެއެވެ. ކުޅެން އޮތް ދެ މެޗުން ވަނީ ފަސްކޮށްފައެވެ.
