މުބާރާތަށް ދިވެހި ޓީމު އޮތީ ތައްޔާރަށް، އެދެނީ ސަޕޯޓަރުންގެ އެހީއަށް

މި މަހު ރާއްޖޭގައި ފަށާ ސައުތު އޭޝިއަން ބާސްކެޓް އެސޯސިއޭޝަން (ސާބާ) ޗެމްޕިއަންޝިޕަށް ޤައުމީ އަންހެން ޓީމު އޮތީ ތައްޔާރަށް ކަމަށާއި، އެދެނީ އެންމެހައި ސަޕޯޓަރުންގެ ސަޕޯޓަށް ކަަމަށް ޓީމުގެ ކުޅުންތެރިން ބުނެފިއެވެ.

ކުޅުންތެރިން މިހެން ބުނީ މުބާރާތުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ ބައްދަލުވުމުގައި ވާހަކަ ދައްކަމުން ޤައުމީ އަންހެން ޓީމުގައި ހިމެނޭ ޝިއުރާ ބުނީ، މިހާ ހިސާބަށް އާދެވުނު އިރު، މުޅި ޓީމު އޮތީ މުބާރާތަށް ތައްޔާރަށް ކަމަށެވެ. ޝިއުރާ ބުނީ މީގެ ކުރިން އަބަދުވެސް މުބާރާތްތައް ކުޅެނީ ރާއްޖެއިން ބޭރުގައި ކަމަށާއި، ކުޅެން ޖެހެނީ އެ މުބާރާތެއް ބާއްވާ ޤައުމުގެ ސަޕޯޓަރުންނާ ދެކޮޅަށް ކަމަށެވެ. ނަމަވެސް ރާއްޖޭގައި މުބާރާތް ބާއްވާއިރު، ގިނަ ސަޕޯޓަރުންގެ ކުރިމަތީގައި ކުޅުމަކީ ހިތްވަރަަކަށްވާނެ ކަމަށް ވެސް ޝިއުރާ ބުންޏެވެ.

މީގެ އިތުރުން ޤައުމީ ޓީމުގައި ހިމެނޭ ރިޝްމާ ވެސް ބުނީ މުބާރާތަށް މުޅި ޓީމު އޮތީ ތައްޔާރަށް ކަމަށެވެ. ވަކިން ޚާއްސަކޮށް ރާއްޖޭގައި އަންހެން ބާސްކެޓުގެ މިހާ ބޮޑު މުބާރާތެއް ކުޅެވޭއިރު، ޓީމުގެ ހުރިހާ ކުޅުންތެރިން އެދެނީ ދިވެހި ރައްޔިތުން ޓީމަށް ސަޕޯޓުކޮށްދޭން އައުން ކަމަށެވެ. މީގެ އިތުރުން ރިޝްމާ ބުނީ މީގެ ކުރިން ރާއްޖެއިން ބޭރުގެ ކުޅޭ މުބާރާތްތަކުގައި ވެސް ސަޕޯޓަކާ ނުލާ ކުޅުނު އިރު ވެސް ރަނގަޅު ނަތީޖާތަކެއް ލިބިފައިވާ ކަމަށެވެ. އެހެންކަމުން ރާއްޖޭގައި މުބާރާތް އޮންނަ އިރު، ސަޕޯޓަރުންގެ އެހީތެރިކަމާއެކު ރަނގަޅު ނަތީޖާ ހޯދޭނެ ކަމަށެވެ.

މުބާރާތަށް ތައްޔާރުވުމުގެ ގޮތުން ޓީމުން ވަނީ އިންޑިއާ އަދި ތައިލެންޑުގައި ފަރިތަކުރުންތަކެއް ވެސް ކުރިއަށް ގެންގޮސްފައެވެ. އެކަމާ ގުޅޭ ގޮތުން ރިޝްމާ ބުނީ، އިންޑިއާގައި ކުރިއަށް ގެންދިޔަ ޓްރެއިނިން ކޭމްޕުން ޓީމަށް ވަރަށް ބޮޑު ބަދަލު އައިސްފައިވާ ކަމަށެވެ.

ބާސްކެޓު ޓީމުގެ ކުޅުންތެރިން ވަނީ ޓީމުގެ ފަރިތަކުރުންތަކާއި، އެހެނިހެން ކަންކަމުގައި މިނިސްޓަރު މަޚްލޫފާއި ބާސްކެޓު އެސޯސިއޭޝަނުން ދެއްވާ އެހީތެރިކަމާއި އެއްބާރުލުމަށް ޝުކުރު އަދާކޮށްފައެވެ.

މި މުބާރާތުގައި ރާއްޖޭގެ އިތުރުން ޖުމުލަ ފަސް ޤައުމަކުން ވާދަކުރާނެއެވެ. އެއީ އިންޑިއާ، ސްރީލަންކާ، ނޭޕާލް، ބޫޓާން އަދި ބަންގްލަދޭޝްއެވެ. މި މުބާރާތަށް ތައްޔާރުވުމުގެ ގޮތުން ޤައުމީ ޓީމުން ވަނީ އިންޑިއާ އަދި ތައިލެންޑުގައި ފަރިތަކުރުންތަކެއް ކުރިއަށް ގެންގޮސްފައެވެ.

މުބާރާތް ކުރިއަށް ދާނީ މި މަހުގެ 24 އިން 30 އަށް ޒުވާނުން މަރުކަޒުގެ އެތެރޭ ހޯލުގައެވެ.