ސްޕެނިޝް ލީގުގައި އެލްޗޭއާ ދެކޮޅަށް ކުޅުނު މެޗުގައި ރޮބާޓް ލެވަންޑޯސްކީގެ މޮޅު ކުޅުމާއެކު މޮޅުވެ ބާސެލޯނާއިން ލީގު ތާވަލްގެ އެއް ވަނަ އަށް ޖެހިލައިފިއެވެ.

މެޗުން މޮޅުވެ ބާސެލޯނާ އެއް ވަނައިގައި އޮތީ ހަ މެޗުން 16 ޕޮއިންޓާއެކުއެވެ. ބާސެލޯނާއަށްވުރެ އެއް މެޗު މަދުން ކުޅެ ވާދަވެރި ރެއާލް މެޑްރިޑަށް ލިބެނީ 15 ޕޮއިންޓެވެ. ލީގުގައި އާދިއްތަ ދުވަހުގެ ރޭ އެތުލެޓިކޯއާ ދެކޮޅަށް ކުޅޭ މެޗުން މޮޅުވެ، ރެއާލަށް އަލުން އެއް ވަނަ އަށް އެރުމުގެ ފުރުސަތު އެބަ އޮތެވެ.

ބާސެލޯނާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 0-3 އިންނެވެ. މެޗުގައި ލެވަންޑޯސްކީ ވަނީ ދެ ލަނޑު ޖަހާފައެވެ. މެޗުގެ ފުރަތަމަ ލަނޑު އޭނާ ޖެހީ 34 ވަނަ މިނެޓުގައެވެ. ބާސެލޯނާގެ ދެ ވަނަ ލަނޑު 41 ވަނަ މިނެޓުގައި ޖެހީ މެމްޕިސް ޑިޕާއީއެވެ. އޭގެ ތިން މިނެޓު ފަހުން ޕެޑްރީ ލަނޑެއް ޖެހި ނަމަވެސް، ވީއޭއާރުން ވަނީ އެ ލަނޑު ބަަލައިނުގަންނަން ނިންމާފައެވެ. ބާސެލޯނާގެ ތިން ވަނަ ލަނޑު ލެވަންޑޯސްކީ ޖެހީ ދެ ވަނަ ހާފު ފަށައިގެން ތިން ވަނަ މިނެޓުގައެވެ. މިއީ ސްޕެނިޝް ލީގުގައި ލެވަންޑޯސްކީގެ އަށް ވަނަ ލަނޑެވެ.

ބަޔާން މިއުނިކް ދޫކޮށް ބާސެލޯނާއަށް ބަދަލުވެ ލެވަންޑޯސްކީ އަންނަނީ މޮޅު ކުޅުމެއް ދައްކަމުންނެވެ. މިހާތަނަށް އޭނާ ވަނީ އެ ޓީމަށް ކުޅެދިން އަށް މެޗުން 11 ލަނޑު ޖަހާފައެވެ.