ކެންޔާގެ އޮޅުއަލައިގެ މުޑުވައް ރާއްޖޭގައި ދިރާސާކުރަނީ
5 ރަށެއްގައި މި ދިރާސާ ކުރިއަށްދާނެ
ކެންޔާގެ ގެނައި މުޑުވައް އިންދަނީ
ކެންޔާގެ އޮޅުއަލައިގެ މުޑުވައް ރާއްޖެ ގެނެސް ދެކުނުގެ ބައެއް ރަށްރަށުގައި ދިރާސާއެއް ފަށައިފިއެވެ.
އަލަގަހުގެ ފަތުގައި ލައްޖަހާ ގަސްހަލާކުކޮށްލާ ބައްޔެއް ކަމުގައިވާ ޓާރޯލީފް ބްލައިޓް ބަލި ފެތުރި ރާއްޖޭގައި ފުޅާދާއިރާއެއްގައި ދަނީ ފެތުރެމުންނެވެ. އަދި މި ބަލީގެ ސަބަބުން ރާއްޖޭގެ އަލަ ގަސްތަކަށް ބޮޑެތި ގެއްލުންތަކެއް ދަނީ ލިބެމުންނެވެ.
އެހެންކަމުން މިކަމަށް ހައްލެއް ހޯދުމަށް ކެންޔާގެ އަލައިގެ މުޑުވައް ރާއްޖޭގައި އާލާކުރުމަށް އެގްރިކަލްޗަރ މިނިސްޓްރީން ވަނީ ނިންމާފައެވެ. މިގޮތުން މި ބަލި ޖެހުމާ ދުރު އަލައިގެ ވައްތަރެއް ރާއްޖެ ގެނެސް އެ މުޑުވައް ރާއްޖޭގައި އިންދާ، ދިރާސާކުރުމުގެ މަސައްކަތް މިނިސްޓްރީން މިހާރު ވަނީ ފަށާފައެވެ.
ރާއްޖެއެމްވީއަށް މައުލޫމާތުދެމުން އެގްރިކަލްޗަރ މިނިސްޓްރީން ބުނީ މި ދިރާސާގެ މަސައްކަތް ކުރިއަށްދާނީ 5 ރަށެއްގައި ކަމަށެވެ. މިހާތަނަށް ދެކުނުގެ ހަތަރު ރަށެއްގައި މި މަސައްކަތް ފަށާފައިވާކަމަށެވެ. އެއީ ގދ. ހޯޑެއްދޫ، ފިޔޯރީ، ގައްދޫ އަދި ވާދޫގައެވެ. އާދިއްތަ ދުވަހު ފުވައްމުލަކުގައި މި މަސައްކަތް ފެށިގެންދާނެ ކަމަށް މިނިސްޓްރީން މައުލޫމާތުދެއެވެ.
އެގްރިކަލްޗަރ މިނިސްޓްރީން ބުނީ ކެންޔާގެ އަލައިގެ މުޑުވައް އިންދައިގެން ހަދާ ދިރާސާއަށް ކޮންމެ ރަށަކަށް 60 މުޑުވައް ހަވާލުކޮށްފައިވާކަމަށެވެ. މި ދިރާސާގެ ތެރެއިން އެ އަލަގަސްތައް ހެދެމުންދާ ގޮތް ބަލާނެ ކަމަށް މިނިސްޓްރީން ބުނެއެވެ. އަދި އަލައިގެ ބޮޑުމިނާއި، ކޮލިޓީއަށް ބަލާނެ ކަމަށް އެގްރިކަލްޗަރ މިނިސްޓްރީން ބުނެފައިވެއެވެ.
ކާމިޔާބު ކަމާއެކު މި ދިރާސާ ނިންމާލެވިއްޖެނަމަ އެ މުޑުވައްތައް ރާއްޖޭގެ އެހެން ރަށްރަށަށްވެސް މިބާވަތުގެ އަލައިގެ މުޑުވައް ފޮނުވާނެ ކަމަށް މިނިސްޓްރީން ބުނެފައިވެއެވެ.
