ކަމްޕޯސްގެ ތައުރީފު މެސީއަށް، އެދެނީ މެސީ ޕީއެސްޖީގައި މަޑުކުރުމަށް

ޕެރިސް ސެއިންޓް ޖަރމަން (ޕީއެސްޖީ)އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ އެ ޓީމުގައި މަޑުކުރަން އެދޭކަމަށް ލުއިސް ކަމްޕޯސް ބުނެފިއެވެ.

ދާދި ދަހުން ޕީއެސްޖީގެ ސްޕޯޓިންގ ޑިރެކްޓަރުގެ މަގާމަށް އައްޔަންކުރި ކަމްޕޯސް މިހެން ބުނީ އޭނާ ދިން އިންޓަވިއުއެއްގައެވެ. އޭނާ ބުނީ މެސީއަކީ ވަރަށް މޮޅު ކުޅުންތެރިއެއްކަމަށާއި، މި ސީޒަންގައި މެސީ އަންނަނީ ޕީއެސްޖީއާއެކު މޮޅު ކުޅުމެއް ދައްކަމުންކަމަށެވެ. އަދި އެދެނީ މެސީ ޕީއެސްޖީގައި މަޑުކުރަން ކަމަށާއި، މެސީއަކީ ޕީއެސްޖީއަށް މުހިންމު ކުޅުންތެރިއެއްކަމަށެވެ. ޕީއެސްޖީއާއެކު މެސީ ހަދާފައިވާ އެއްބަސްވުން އަންނަ އަހަރު ހަމަވާނެއެވެ. ނަމަވެސް މެސީ އޭނާގެ ކުރިމަގާމެދު ގޮތެއް ނިންމާނީ މިއަހަރު ގަތަރުގައި އޮންނަ ވޯލްޑް ކަޕަށް ފަހުކަމަށް ރިޕޯޓުތަކުގައިވެއެވެ.

މި އިންޓަވިއުގައި ކަމްޕޯސް ވަނީ އެކި ކަންކަމާ ގުޅޭގޮތުން ވާހަކަދައްކާފައެވެ. އޭނާ ބުނީ ޕީއެސްޖީގެ ރައީސް އޭނާއަށް އެ ކުލަބުގެ ސްޕޯޓިންގ ޑިރެކްޓަރުގެ މަގާމު ހަވާލުކުުރުން އެކަމަށް ޝުކުރުވެރިވާކަމަށެވެ. އަދި އޭނާއަށް އެ މަގާމު ލިބުމާއެކު އެންމެ ފުރަތަމަ ގުޅީ ކްރިސްޓޮފް ގަލްޓިއޭއާކަމަށެވެ. އެއީ ޕީއެސްޖީގެ ކޯޗުކަމުގެ މަގާމާ ހަވާލުވުމަށް އެދިއެވެ. މީގެ އިތުރުން އޭނާ ބުނީ ފްރާންސްގެ ޒައިނުއްދީން ޒިދާން އެ ޓީމުގެ ކޯޗުކަމަށް ގެންނަން މަޝްވަރާ ނުކުރާކަމަށާއި، ހަމައެކަނި މަޝްވަރާކުރީ ގަލްޓިއޭއާ ކަމަށެވެ.

އިތުރަށް ވާހަކަދައްކަމުން ކަމްޕޯސް ބުނީ، ޕީއެސްޖީގެ ޓްރާންސްފަރތަކާމެދު އޭނާ އެންމެ ހިތްހަމަނުޖެހޭ ކަމަށެވެ. އޭނާ ބުނީ ޕީއެސްޖީން އިތުރު ޑިފެންޑަރުން ހޯދުމަށް ވެސް މަސައްކަތްކޮށް، މަޝްވަރާތަކެއް ކުރިނަމަވެސް، އެ ކުޅުންތެރިންގެ ސޮއި ހޯދޭ ގޮތް ނުވީކަމަށެވެ.

ޕީއެސްޖީގެ ސްޕޯޓިން ޑިރެކްޓަރުގެ މަގާމަށް ކަމްޕޯސް ހަމަޖައްސައި، އެ ކުލަބުން އަންނަނީ ގިނަ މަސައްކަތްތަކެއް ކުރަމުންނެވެ. އެ ކުލަބުގެ އެންމެ ބޮޑު އަމާޒަކީ ޔުއެފާ ޗެމްޕިއަންސް ލީގު ކާމިޔާބުކުރުމެވެ.