ފެންބޮޑުވުމުގެ ކާރިސާއަށް ފަހު ޕާކިސްތާނުގައި ޑެންގޫ ފެތުރެނީ

ޕާކިސްތާނަށް ކުރިމަތިވި ފެންބޮޑުވުމުގެ ކާރިސާއަށް ފަހު ޑެންގޫ ފަދަ ސީރިއަސް ބަލިތައް ފެތުރެމުން ދާކަމަށް ބުނެ ސިއްހީ އޮފިޝަލުން މިކަމަށް ސަމާލުވުމަށް ގޮވާލަން ފަށައިފިއެވެ. ޑެންގޫގެ އިތުރުން މެލޭރިޔާ އަދި ގެސްޓްރިކް އިންފެކްޝަންތައް ވެސް ފެތުރުން އިތުރުވެފައިވާ ކަމަށް އެފަރާތްތަކުން ދަނީ ބުނަމުންނެވެ.

ޖޫން މަހުގެ މެދެއްހާ ހިސާބުން ފެށިގެން ޕާކިސްތާނަށް ކުރި ވިއްސާރަޔާއި ގުޅިގެން އެތައްހާސް ގެއާއި ބްރިޖް ފަދަ ތަންތަން ހަލާކުވުމާއި ގުޅިގެން 33 މިލިއަން މީހުންގެ ދިރިއުޅުމަށް ވަނީ ވަރަށް ބޮޑަށް އަސަރު ކޮށްފައެވެ. އަދި ކުރިމަތިވި ތަފާތު ހާދިސާތަކުގައި މަދުވެގެން 15 ސަތޭކައެއްހާ މީހުން ވަނީ މަރުވެފައެވެ.

ޑެންގޫ ޖެހުމުގެ ސަބަބުންވެސް މިހާރު މީހުން މަރުވަމުން ދާކަމަށާ އަދި ބަލިޖެހޭ މީހުންގެ އަދަދު ދުވަހެއް ދުވަހަކަށް އިތުރުވަމުން ދާކަމަށް ޚަބަރުތައް ބުނެއެވެ. މިގޮތުން ސިންދު ޕްރޮވިންސްގައި އެކަނިވެސް ޑެންގޫގެ 3،830 ކޭސް ރިޕޯޓް ކޮށްފައިވާކަމަށާ މިހާތަނަށް ނުވަ މީހުން މަރުވެފައިވާ ކަމަށް ސިއްހީ އޮފިޝަލުން ބުނެއެވެ.

ޕާކިސްތާނަށް ވިއްސާރަކުރަން ފެށިތާ ދެމަހަށް ވުރެ ގިނަ ދުވަސްވެފައިވާއިރު އަދިވެސް އެތައްހާސް އަވަށެއް ވަނީ ފެނުއަޑީގައެވެ. މިކަމުގެ ސަބަބުން އެތައް ސަތޭކަ އާއިލާއެއް ވަނީ ވިއްސި ވިހާލި ވެގެން ގޮސްފައެވެ. ގިނަ ހިސާބުތަކެއްގައި އަދިވެސް މަގުތަކުން ދަތުރު ކުރެވޭ ވަރު ނުވާތީ ސިއްހީ ހިދުމަތް ހޯދުމަށްވެސް ވަނީ ހުރަސް އެޅިފައެވެ. ސަރުކާރުންނާއި އެހީދޭ ފަރާތްތަކުން ދަނީ ސިއްހީ ޚިދުމަތް ދިނުމަށް އެހިސާބުތަކަށް މޯބައިލް ވޭންތަކެއް ވެސް ފޮނުވަމުންނެވެ.

ފެނުން ސަލާމަތްވެ ހިކި ހިސާބުތަކަށް ދެވިފަ ތިބި މީހުންނަށް ވެސް ކާބޯތަކެއްޗާއި ސާފު ބޯފެނުގެ ދަތިކަން ވަރަށް ބޮޑަށް އެބައޮތް ކަމަށް ޚަބަރުތައް ބުނެއެވެ.

ނިމުނު ހަފްތާގައި އެގައުމަށް ކުރެއްވި ދަތުރުފުޅެއްގައި އދގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވަނީ ދުނިޔޭގެ މުއްސަދި ގައުމުތަކުން ޕާކިސްތާނަށް އެހީވުމަށް ގޮވާލައްވާފައެވެ.