ޔުއެފާ ޗެމްޕިއަންސް ލީގުގައި ރޭންޖަރސް ބަލިކޮށް, ނަޕޯލީ ގްރޫޕްގެ އެއްވަނައަށް ޖެހިލައިފިއެވެ.
ލިވަޕޫލް ހިމެނޭ ގްރޫޕްގެ އެއްވަނާގައި އިޓަލީގެ ނަޕޯލީ އޮތީ ދެ މެޗުންވެސް މޮޅުވެ ހަ ޕޮއިންޓާއެކުއެވެ. ލިވަޕޫލް ދެވަނާގައި އޮތީ ތިން ޕޮއިންޓާއެކުއެވެ. ނަޕޯލީ ދެވަނަ މެޗު ރޭންޖަރސްގެ ދަނޑުގައި ކުޅެ ކާމިޔާބުކުރީ 3-0 ނެވެ. އެކަމަކު މެޗުގައި ނަޕޯލީން ތިން ލަނޑުވެސް ޖެހީ 55 ވަނަ މިނެޓުގައި ރޭންޖަރސްގެ ސޭންޑްސްއަށް ދެވަނަ ރީނދޫ ކާޑާއެކު ރަތްކާޑް ދެއްކި ފަހުންނެވެ. ނަޕޯލީގެ ފުރަތަމަ ލަނޑު ޖަހާ ކުރި ހޯދައިދިނީ ޕެނަލްޓީއަކުން ޕޮލިޓާނޯއެވެ. އޭގެ ކުރިން ލިބުނު ޕެނަލްޓީ ޒިއެލެންސްކީއަށް ކާމިޔާބެއް ނުކުރެވުނެވެ. މެޗު ނިމެން ފަސް މިނެޓަށް ވެފައިވަނިކޮށް ދެވަނަ ލަނޑު ޖެހީ ރަސްޕަޑޯރީއެވެ. ތިންވަނަ ލަނޑު އިތުރު ވަގުތުގައި ޖެހީ އެންޑޮމްބެލޭއެވެ.
ދެ މެޗުންވެސް މޮޅެއް ނުލިބި ރޭންޖަރސް އޮތީ ގްރޫޕްގެ ފުލުގައެވެ. ލިވަޕޫލްގެ އިތުރުން އަޔެކްސް ވެސް އޮތީ ތިން ޕޮއިންޓާއެކުއެވެ.
