ސީދާ ތިން ސެޓުން ކޮރަ ކޮރަ ބަލިކޮށް ޖޯލި ބީން ފައިނަަލަށް

އިންޓަ ރިސޯޓު ވޮލީ ބޯޅަ މުބާރާތުގެ ޒޯން ހައެއްގެ ޕްލޭ އޮފް މެޗުގައި ކޮރަ ކޮރަ ބަލިކޮށް ޖޯލި ބީން އިން ފައިނަލަށް ދަތުރުކޮށްފިއެވެ.

ރައުންޑް ރޮބިން އުސޫލުން ކުރިއަށްދާ މުބާރާތުގެ ސީދާ ފައިނަލަށް ދަތުރުކުރީ ޖޯލި މޯލްޑިވްސްއެވެ. އެއީ ކުޅުނު ހުރިހާ މެޗަކުން މޮޅުވެ އެއްވަނަ ޓީމުގެ ގޮތުގައެވެ. ދެވަނަ ޓީމުގެ ގޮތުގައި ޖޯލި ބީން އާއި ތިންވަނަ ޓީމު ކޮރަ ކޮރަ ޖެހުނީ ޕްލޭ އޮފް މެޗު ކުޅޭށެވެ. ޖޯލި ބީން އިން ވަނީ ޕްލޭ އޮފްގައި ސީދާ ތިން ސެޓުން ކޮރަ ކޮރަ ބަލިކޮށްފައެވެ.

މެޗުގެ ސެޓުތައް ޖޯލި ބީން އިން ހޯދީ 22-25، 20-25 އަދި 13-25 އިންނެވެ. މެޗުގެ ފުރަތަމަ ސެޓާއި ދެވަނަ ސެޓު ގާތް ގާތުން ދިޔަ ނަމަވެސް، ތިންވަނަ ސެޓުގައި ޖޯލި ބީން އިން ވަނީ ބޮޑު ލީޑަކާއެކު ސެޓު ހޯދާފައެވެ. މެޗުގެ މޮޅު ކުޅުންތެރިޔަކަށް ހޮވުނީ ޖޯލި ބީންގެ މުޙައްމަދު އަލީއެވެ. މެޗަށްފަހު ވަނީ މުބާރާތުގެ ތިންވަނަ ޓީމު ކޮރަ ކޮރައަށް މެޑައްޔާއި ސެޓްފިކެޓު ހަވާލުކޮށްފައެވެ.

ފައިނަލްގައި ޖޯލި މޯލްޑިވްސްއާ ދެކޮޅަށް ޖޯލި ބީން ނުކުންނާނީ ބުދަ ދުވަހުގެ ހަވީރުއެވެ. މުބާރާތުގައި މީގެ ކުރިން ވެސް މި ދެ ޓީމު ވަނީ ވާދަކޮށްފައެވެ. އެ މެޗު ކާމިޔާބުކޮށްފައިވަނީ ޖޯލި މޯލްޑިވްސް އިންނެވެ.

މިއަހަރުގެ އިންޓަ ރިސޯޓު މުބާރާތުގެ ނަމަކީ ގޯލްޑަން އިޔަރ އިންޓަރ ރިސޯޓު ވޮލީ މުބާރާތެވެ. އެއީ ރާއްޖޭގެ ޓުއަރިޒަމަށް 50 އަހަރު ފުރޭ މުނާސަބަތާ ގުޅުވައިގެންނެވެ.