ވިކްޓޯރިއާ ޕްލެޒެން ބަލިކޮށް އިންޓަ އިން ފުރަތަމަ މޮޅު ހޯދައިފި

ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެވަނަ މެޗުގައި ވިކްޓޯރިއާ ޕްލެޒެން ބަލިކޮށް އިންޓަ މިލާނުން ފުރަތަމަ މޮޅު ހޯދައިފިއެވެ.

ގްރޫޕް ސްޓޭޖުގެ ފުރަތަމަ ފުޓުބޯޅަ މެޗުގައި އިންޓަ އިން ވަނީ އަމިއްލަ ދަނޑުގައި ބަޔާން މިއުނިކް އަތުން ބަލިވެފައެވެ. ދެވަނަ މެޗުގައި ވިކްޓޯރިއާ ޕްލެޒެންގެ ދަނޑުގައި އިންޓައިން މޮޅުވީ 0-2 އިންނެވެ.

މެޗުގައި އިންޓައިން ރަނގަޅަށް ކުޅުނުއިރު، އެ ޓީމުގެ ފުރަތަމަ ލަނޑު މެޗުގެ 20 ވަނަ މިނެޓުގައި އެޑިން ޖެކޯއެވެ. އޭނާ މި ލަނޑު ޖެހީ ޔަކީން ކޮރެއާ ތަނަވަސްކޮށްދިން ފުރުސަތެއްގައެވެ. އިންޓަގެ ދެ ވަނަ ލަނޑު އެ ޓީމުން ޖެހީ މެޗުގެ ދެވަނަ ހާފުގައެވެ. ދެވަނަ ހާފުގެ 70 ވަނަ މިނެޓުގައި ޖެކޯ ތަނަވަސްކޮށްދިން ފުރުސަތެއްގައި މި ލަނޑު ޖެހީ ޑެންޒެލް ޑަމްފްރީސްއެވެ.

މި މޮޅާއެކު އިންޓައިން ވަނީ ބާސެލޯނާއާ ޕޮއިންޓުގެ ގޮތުން އެއްވަރުކޮށްފައެވެ. ދެ މެޗުން އިންޓައަށް ތިން ޕޮއިންޓު ލިބޭއިރު، ދެ މެޗުން ބާސެލޯނާ އަށް ވެސް ލިބެނީ ތިން ޕޮއިންޓެވެ. ނަމަވެސް ބާސެލޯނާއިން ކުރި ހޯދަނީ ފައިދާ ގޯލުންނެވެ. ބާސެލޯނާ އަށް ގްރޫޕްގެ ދެވަނަ ލިބޭއިރު. އިންޓަ އަށް ލިބެނީ ތިންވަނަ އެވެ.

ގްރޫޕް ސްޓޭޖުގައި އިންޓަ އަށް ދެން އޮތީ އަމިއްލަ ދަނޑުގައި ބާސެލޯނާއާ ދެކޮޅަށް ކުޅޭ މެޗެވެ. އެ މެޗު އޮންނާނީ އޮކްޓޫބަރު މަހުގެ ފަސް ވަނަ ދުވަހުގެ ރޭއެވެ.