ޣައްޒާއަށް ނިސްބަތްވާ އަމީނާ އަލް-ހަޔަކްއަށް، ޣައްޒާގެ އެންމެ ވަރުގަދަ އެއް ރެސްޓޯރަންޓުން ކައްކާއެއްގެ ވަޒީފާ ލިބޭ ގޮތެއް ނުވިއެވެ. ސަބަބެއް ކަމަށް ވީ، އޭނާއަކީ އަންހެނަކަށް ވުމެވެ. އެއީ މީގެ އަހަރުތަކެއް ކުރިއެވެ. ނަމަވެސް، މިއަދު އަމީނާއަކީ ހަމައެކަނި އަންހެނުންނަށް ހާއްސަކޮށްގެން ޣައްޒާގައި ހިންގާ އެންމެ ކާމިޔާބު އެއް ރެސްޓޯރަންޓްގެ ބޮޑު ކައްކާއެވެ.

ޣައްޒާގައި ކައްކާއިންގެ ވަޒީފާއަކީ ފިރިހެނުންގެ ބޮޑު ކޮންޓްރޯލްއެއް އޮންނަ ދާއިރާއަކަށް ވީ ނަމަވެސް، ކައްކާއަކަށް ވުމަށް، އުމުރުން 50 އަހަރުގެ އަމީނާ ދެކެމުން ދިޔަ ފޮނި ހުވަފެންތަކުގައި މިއަދު ވަނީ ހިތްގައިމު ކުލަތަކެއް ޖެހިފައެވެ. މިއަދު އޭނާއަކީ ހަމައެކަނި ކައްކާއެއް ނޫނެވެ. އޭނާއަކީ، އެފަދަ އިތުރު އެތައް އަންހެނުންނެއް ގޮވައިގެން އިސް ސަފުގައި ހުރި، ކައްކާއިން ލީޑަރެކެވެ.

އޯގަސްޓް މަހުގެ ތެރޭގައި ހުޅުވި "ސަބާއިއާ ވީއައިޕީ" އަކީ ހަމައެކަނި އަންހެނުންގެ ރެސްޓޯރަންޓެކެވެ. ކައްކާއިންނާ ހިސާބުން ފެށިގެން ކަސްޓަމަރުންނަކީވެސް އަންހެނުންނެވެ. ރެސްޓޯރަންޓުގެ މެނޫގައި އާންމުކޮށް ހިމެނެނީ ޗިކަން ސޭންޑްވިޗްއާއި ފިއްޒާ ފަދަ ލުއި ކާނާގެ ބާވަތްތަކެވެ. "ސަބާއިއާ ވީއައިޕީ" އަކީ، ތޮއްޖެހިފައިވާ ޣައްޒާގެ އަންހެނުންނަށް ހުޅުވާލި ރައްކާތެރިކަމާއި އުފާވެރިކަމުގެ ގޯވައްޗެއް ކަމުގައިވެސް ސިފަކުރެވެއެވެ. ސަބަބެއް ނެތިއެއް ނޫނެވެ. އުފާވެރި، މަޖާ ވަގުތުތަކެއް މިނިވަންކަމާއެކު ހޭދަކޮށްލުމަކީ ޣައްޒާގެ އަންހެނުންނަށް މާ އާންމުކޮށް ލިބޭ ފުރުޞަތަކަށް އޮންނަނީ ނުވެފައެވެ. ނަމަވެސް، "ސަބާއިއާ ވީއައިޕީ" އިން އެކަން ބަދަލުކޮށްލައިފިއެވެ.

އަމީނާ، އޭނާގެ ކެއްކުމުގެ ހުނަރާއި އުކުޅުތައް ދަސްކުރީ ހިލޭ ސާބަހަށް، ހޮޓަލެއްގެ ރެސްޓޯރަންޓެއްގައި މަސައްކަތް ކުރި ދުވަސްވަރުއެވެ. ކައްކާއިން ހޯދަން ތަކުރާރުކޮށް އިއުލާންތައް ކުރަމުން ދިޔަ ކަމުގައި ވީ ނަމަވެސް، އެއީ އަމީނާ ފަދަ މީހުންނަށް އޮތް ފުރުޞަތަކަށް ނުވިއެވެ.

ރެސްޓޯރަންޓަށް ދީފައިވާ "ސަބާއިއާ ވީއައިޕީ" ނަންވެސް ހާއްސަ ވަނީ އަންހެން ކުދިންނަށެވެ. އެ ނަން ނިސްބަތް ވަނީ އަންހެން ޖިންސުގެ ހުރިހާ އުމުރުފުރާއަކަށެވެ. ފިރިހެނުން އިސްތިސްނާކޮށެވެ.

"ސަބާއިއާ ވީއައިޕީ"ގެ އޯނަރަކީ ރީހާމް ހަމޫދާއެވެ. ހަމޫދާ ބުނި ގޮތުގައި، މިނިވަންކަމާއެކު އުފާވެރި ވަގުތުތަކެއް ހޭދަ ކުރުމަށް ބޭނުން ޖެހިފައި އޮތް ހައްސާސްކަމުގެ ތެރެއިން ރެސްޓޯރަންޓްގެ ފިކުރު އުފެދިގެން އައީއެވެ.  

ހަމޫދާގެ "ސަބާއިއާ ވީއައިޕީ"ގެ މުވައްޒަފުންގެ ލިސްޓުގައި ހިމެނެނީ 8 އަންހެނެކެވެ. އޭގެ އިތުރުން، އަމިއްލަ ގޭގައި ތިބެގެން ރެސްޓޯރަންޓަށް ކާބޯތަކެތި ތައްޔާރުކޮށްދޭ މީހުންގެ ޚިދުމަތްވެސް އޭނާ ހޯދާފައެވެ. ދުނިޔޭގެ އެންމެ ބޮޑު، އަނގަމަތި ހާ ޖަލުގެ ގޮތުގައި ސިފަ ކުރަމުންދާ ޣައްޒާގެ އާބާދީގައި 50 ޕަސެންޓް މީހުންނަކީ ވަޒީފާ ނެތް މީހުން ކަމުގައި ވާ އިރު، ހަމޫދާ ފަދަ ވިޔަފާރިވެރިންގެ އެހީތެރިކަމާއެކު، ވަޒީފާ ނުލިބުމުގެ މައްސަލައަށްވެސް ކޮންމެވެސް ވަރެއްގެ ހައްލެއް މިވަނީ ހޯދިފައެވެ.