މިހާރު އޮތީ ކުރިއަށްވުރެ ތަފާތު ބާސެލޯނާއެއް، ކުޅުންތެރިންނަށް އެކަން ވިސްނައިދެން: ނާގަލްސްމަން

މިހާރު އޮތީ ކުރިއަށްވުރެ ތަފާތު ބާސެލޯނާއެއް ކަމަށާއި، ބަޔާން މިއުނިކްގެ ކުޅުންތެރިންނަށް އެކަން ވިސްނައިދޭ ކަމަށް އެ ޓީމުގެ ކޯޗު ހޫލިއަން ނާގަލްސްމަން ބުނެފިއެވެ.

ނާގަލްސްމަން މިހެން ބުނީ މި ސީޒަންގެ ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެވަނަ ފުޓުބޯޅަ މެޗުގައި ބާސެލޯނާއާ ދެކޮޅަށް ނުކުތުމުގެ ކުރިން އޮތް ޕްރެސްގައެވެ. އަމިއްލަ ދަނޑުގައި ބާސެލޯނާއާ ދެކޮޅަށް ނުކުންނައިރު، ނާގަލްސްމަން ބުނީ ބަޔާންއަށް ބާސެލޯނާ ވަރަށް ރަނގަޅަށް އެނގޭ ކަމަށެވެ. ނަމަވެސް މިއީ އައު ޗެލެންޖެއްކަން ފާހަގަކޮށް ނާގަލްސްމަން ބުނީ، ބާސެލޯނާގައި މުހިންމު ދައުރު އަދާ ކުރާ އައު ކުޅުންތެރިން ތިބިކަމަށެވެ. އޭގެ ތެރޭގައި ބަޔާން ދޫކޮށް ބާސެލޯނާއަށް ބަދަލުވި ޕޮލެންޑުގެ ފޯވާޑް ރޮބާޓް ލެވަންޑޯސްކީގެ ނަން ނާގަލްސްމަން ވަނީ ފާހަގަކޮށްފައެވެ.

މީގެ އިތުރުން ނާގަލްސްމަން ބުނީ އެންމެ ފަހުން ބާސެލޯނާއާ ދެކޮޅަށް ކުޅުނު ހަތަރު މެޗުން ލިބުނު ނަތީޖާއަކީ މިހާރު ކައުންޓު ކުރެވޭނެ ނަތީޖާއެއް ނޫންކަމަށެވެ. ސަބަބެއްގެ ގޮތުގައި އޭނާ ބުނީ މިހާރުގެ ބާސެލޯނާއަކީ މުޅިން ތަފާތު ޓީމެއް ކަމަށެވެ. ނާގަލްސްމަން ބުނީ ބާސެލޯނާގައި ޒުވާން ހުނަރުވެރި އެތައް ކުޅުންތެރިންނެއް ތިބިއިރު، ޕެޑްރީ އާއި ގަވީ އަކީ ވަަރަށް މޮޅު ދެ ކުޅުންތެރިންކަމަށެވެ. މީގެ އިތުރުން ބާސެލޯނާގެ ކޯޗުކަމާ ހަވާލުވެ ޒަވީ ހެނާންޑޭޒް އަދާކުރަނީ ރަނގަޅު ރޯލެއްކަން ފާހަގަކޮށް އޭނާ ބުނީ، ޒަވީ ކޯޗުކޮށްދޭ ޓީމަކާ ދެކޮޅަށް ކުޅުމަކީ ޓަފް ކަމަކަށް ވާނެ ކަމަށެވެ.

އެންމެ ފަހުން ބާސެލޯނާއިން ބަޔާނާ ދެކޮޅަށް ކުޅުނު ހަތަރު މެޗު ވެސް ކާމިޔާބުކޮށްފައިވަނީ ބަޔާނުންނެވެ. އޭގެ ތެރެއިން އެންމެ ފާހަގަކޮށްލެވެނީ ބާސެލޯނާގެ އަމިއްލަ ދަނޑުގައި ބަޔާނުން 2-8 އިން އެ ޓީމު ބަލި ކުރި މެޗެވެ.

ބަޔާން އާއި ބާސެލޯނާ ބައްދަލުކުރާ މެޗު އޮންނާނީ އަންގާރަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.