ދެވަނަ މެޗުގައި ވަކަރު މޯލްޑިވްސްއިން ސޮނެވާފުށި ބަލިކޮށްފި

އިންޓަރ ރިސޯޓު ވޮލީ ބޯޅަ މުބާރާތުގެ ޒޯން ފަހެއްގައި ވަކަރު މޯލްޑިވްސްއިން ސޮނެވާފުށީގެ މައްޗަށް ކުރި ހޯދައިފިއެވެ.

މިއީ މި ދެ ޓީމުން ވެސް މުބާރާތުގައި ކުޅުނު ދެވަނަ މެޗެވެ. ދެ ޓީމު ވެސް މުބާރާތް ފަށަން ޖެހުނީ ބައްޔަކުންނެވެ. ފުރަތަމަ މެޗުގައި އަމިއްލަފުއްޓާއި ވާދަކޮށް ވަކަރު މޯލްޑިވްސް ވަނީ ބަލިވެފައެވެ. އަދި ސޮނެވާފުށި ބަލިވެފައިވަނީ އަނަންތަރަ ކިހާވަކާ ވަދަކޮށެވެ.

ދެވަނަ މެޗަށް ނުކުތްއިރު މިއީ ދެ ޓީމަށް ވެސް މުހިންމު މެޗަކަށްވިއެވެ. މި މެޗުގައި ވަކަރު މޯލްޑިވްސްއިން ވަނީ ފަސޭހަކަމާއެކު ސީދާ ތިން ސެޓުން ސޮނެވާފުށި ބަލިކޮށްފައެވެ. މެޗުގެ ސެޓުތައް ވަކަރު މޯލްޑިވްސް އިން ހޯދީ 18-25، 20-25 އަދި 22-25 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވަކަރު މޯލްޑިވްސްގެ ޙަސަން ނިލާމްއެވެ.

މިހާތަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓާއެކު އެއްވަނަ މަގާމުގައި އޮތީ އަމިއްލަފުއްޓެވެ. ވަކަރު މޯލްޑިވްސް އާއި އަނަންތަރައަށް ވެސް ލިބެނީ ތިން ޕޮއިންޓެވެ. ނަމަވެސް މިއަދު ހަވީރު ދުސިތު ތާނީއާ ދެކޮޅަށް ކުޅޭ މެޗުން މޮޅުވެގެން، އަނަންތަރައަށް ޕޮއިންޓުގެ ގޮތުން އަމިއްލަފުއްޓާއި އެއްވަރުކުރެވޭނެއެވެ.

މި ޒޯން ވެސް ކުރިއަށްދާނީ ރައުންޑް ރޮބިން އުސޫލުންނެވެ. ކޮންމެ ޓީމެއް ކޮންމެ ޓީމަކާއި ވާދަކޮށް، އެއްވަނަ ލިބޭ ޓީމު ދާނީ ސީދާ ފައިނަލަށެވެ. ދެވަނަ ޓީމާއި ތިންވަނަ ޓީމު ޖެހޭނީ ޕްލޭ އޮފް މެޗެއް ކުޅޭށެވެ. ފައިނަލްގެ ދެވަނަ ޖާގަ ލިބޭނީ އެ މެޗުން މޮޅުވާ ޓީމަކަށެވެ.