އުމުރުން 6 އަހަރުގެ ކުއްޖެއްގެ މަރާއެކު ޕާކިސްތާނުން ވަރުގަދަ އިންޒާރެއްގެ ރަނގަބީލު އަޅައިފި

އަމިއްލަ އުނގުމަތީގައި، އުމުރުން އެންމެ 6 އަހަރުގެ އުފަން ދަރިފުޅު މަރުވެދިއުމުގެ މަދު ގަޑިއިރުކޮޅެއްގެ ކުރިން ކަން ހިނގައިގެން ދިޔަ ގޮތް، ބަދަރު ބިބީގެ ހަނދާނުގައި ހަރުލާ ހުރީ އުމުރަށް ބިންވަޅު ނެގޭ ފަދަ ގޮތަކަށެވެ. އެ ޤައުމުގެ ތާރީޚު ދެކެފައި ނުވާ ފަދަ ފެންބޮޑުވުމުގެ ކާރިޘާއެއް ތަޖުރިބާ ކުރަމުން ދާ ޕާކިސްތާނުގައި ޤާއިމުކޮށްފައިވާ ވަގުތީ ހޮސްޕިޓަލަކުން، ސިޓީ ހޮސްޕިޓަލަށް ދަރިފުޅު ގޮވައިގެން ދުވި ދުވުމަކީ ދުވަހަކުން ބިބީގެ ހަނދާނުން ފިލާ ދާނެ ހަނދާންތަކެއް ނޫނެވެ. އެ ދަރިފުޅުގެ ހުން ވިހެލާތޯ އެ މަންމަ ކުރި މަސައްކަތް، އެހެން މީހަކަށް، އިންސާފުވެރި ގޮތެއްގައި ބަޔާންކޮށެއް ނުދެވޭނެއެވެ.

ބިބީ، އޭނާގެ ދަރިފުޅު، ޢަބްދުލްޤާދިރު ގޮވައިގެން އެންމެ ފުރަތަމަ ދިޔައީ ވައިގެ އަސްކަރިއްޔާއިން ޤާއިމު ކޮށްފައިވާ މެޑިކަލް ސެންޓަރަކަށެވެ. އެތަނުގައި ތިބި ޑޮކްޓަރުން ދިން ފަރުވާގެ އެހީގައި، ޢަބްދުލްޤާދިރުގެ ހުން، ކޮންމެވެސް ވަރަކަށް މަޑުވިއެވެ. އެ ޑޮކްޓަރުން ވަނީ، ކައިރި އަވަށެއް ކަމަށް ސިހްވާންގެ ހޮސްޕިޓަލުން ފަރުވާ ހޯދުމަށް، ޓުކް-ޓުކްއެއް ހޯދުމަށްވެސް ބިބީއަށް އެހީތެރިކަން ފޯރުކޮށްދީފައެވެ.

އެންމެ ފުރަތަމަ ޢަބްދުލްޤާދިރު އޮތީ އައިވީ ގުޅާފައެވެ. އޭނާގެ ހާލަތު ކޮންމެވެސް ވަރަކަށް ރަނގަޅުވާން ފެށުމުން ހޮސްޕިޓަލުން ދޫކޮށްލިއެވެ. ނަމަވެސް، ގެދޮރު ގެއްލިފައިވާ މީހުންނަށް ހާއްސަކޮށްގެން ޕާކިސްތާނުގެ ސަރުކާރުން ޓެންޓު ޖަހައިގެން ހިންގަމުން ދިޔަ ކުލިނިކަށް ދަރިފުޅު ގެންދިޔަ ރޭ، ބިބީގެ ދަރިފުޅު މި ދުނިޔެއަށް ފަހު ނޭވާ ދޫކުރިއެވެ.

ޢަބްދުލްޤާދިރަށް ފީލްޑް ކުލިނިކުގައި މިދިޔަ ހަފުތާގައި ފަރުވާ ދިން ޑޮކްޓަރ ޝާހިދު އިޤްބާލް ބުނި ގޮތުގައި، އެ ކުއްޖާ ހުން އަންނަ އަސްލު ސަބަބު އޮތީ ދަނެނުގަނެވިއެވެ.

ޢަބްދުލްޤާދިރަކީ ޕާކިސްތާނަށް މިއަދު ކުރިމަތިލާން ޖެހިފައިވާ ފެންބޮޑުވުމުގެ ކާރިޘާގައި މަރުވި ކުދިންގެ ލިސްޓުގައި ހިމެނޭ ނަމެކެވެ. މަރުގެ ސަބަބުތަކުގެ ތެރޭގައި ފެންގަނޑަށް ޣަރަޤުވުމުގެ އިތުރުން، ނުރައްކާތެރި ބަލިތަކެއްގެ ޝިކާރައަކަށްވުން ހިމެނެއެވެ.

ތަފާސް ހިސާބުތަކަށް ބަލާއިރު ޕާކިސްތާނަށް ކުރިމަތިވި މޫސުމީ ގަދަ ވިއްސާރަގައި މަރުވި 1399 މީހުންގެ ތެރޭގައި 496 ކުޑަކުދިން ހިމެނެއެވެ.

ބޮޑުވި ފެންގަނޑު ހިނދެން ފަށާފައި ވާ މި ދަނޑިވަޅުގައި ފެތުރިގެންދާ ބަލިމަޑުކަމުގައި އެންމެ ނާޒުފު ފައްތަރެއްގައި ތިބި ބަޔަކީވެސް ކުޑަކުދިންކަން ފާހަގަ ކުރަން ޖެހެއެވެ. އެއީ އެހީދޭ ޖަމިއްޔާތަކުންވެސް ފާޅުކޮށްފައިވާ ކަންބޮޑުވުމެކެވެ.

ކުޑަކުދިންނާ ބެހޭ އދގެ ޖަމިއްޔާ (ޔުނިސެފް) އިން ބުނާ ގޮތުގައި ޕާކިސްތާނަށް ކުރިމަތިލާން ޖެހިފައިވާ ފެންބޮޑުވުމުގެ ކާރިޘާގެ އަސަރު، 16 މިލިއަނެއްހާ ކުދިންނަށް ވަނީ ކޮށްފައެވެ. އަދި އޭގެ ތެރެއިން 3.4 މިލިއަން ކުދިންނަކީ ފުރާނަ ސަލާމަތް ކުރުމަށް އެހީ ބޭނުން ވެފައިވާ ކުދިންނެވެ.

ޕާކިސްތާނަށް ކުރިމަތިލާން ޖެހިފައިވާ މޫސުމީ ގަދަ ވިއްސާރައާއި އެ ވިއްސާރައާ ގުޅިގެން ކުރިމަތިވި އެހެން ކާރިޘާތަކުގައި އެ ޤައުމަށް ލިބުނު މާލީ ގެއްލުމުގެ އަގު، 30 ބިލިއަން ޑޮލަރަށް އަރާނެ ކަމަށް ވަނީ އަންދާޒާ ކޮށްފައެވެ.

ބިބީފަދަ ޢާއިލާތަކުން ރައްކާތެރި ހިސާބުތަކަށް ބަދަލުވި ނަމަވެސް، އޭނާ ނިސްބަތްވާ މެހާރު އަވަށުގައި 2 ފަންގިފިލާއަށް ހުރި ގެތަށްވެސް ފެންގަނޑުން ތެރެއިން ކިރިއާ ފެންނަން ހުރި ކަމެވެ. އެ ހުރިހާ ކަމަކަށް ވުރެވެސް ބޮޑަށް، އިންތިހާ ލޯބިވި ތުއްތު ދަރިފުޅުގެ ވަކިވެ ދިއުމަކީ، ދުވަހަކުވެސް ބިބީގެ ހަޔާތުގައި ފޫބައްދާލެވޭނެ ވަރުގެ ގެއްލުމެއް ނޫންކަން ދަންނަންޖެހެއެވެ. ވިއްސާރައިގެ ކޮޅިގަނޑު މަޑުވެ، ފެންގަނޑު ހިނދުނު ކަމުގައި ވީ ނަމަވެސް، ޙަޤީޤީ އިންސާނީ ކާރިޘާގެ ކޮޅިގަނޑު އަދި އޮތީ ކަމުގެ އިންޒާރު، ޢަބްދުލްޤާދިރުގެ މަރާއެކު މުޅި ދުނިޔެއަށް ދިން ފަދައެވެ.