ފުލުހުންނަށް ޙަމަލާ ދިނުމުގައި ފަތިބުރިއާއި ގައު ފަދަ ތަކެތި ބޭނުންކޮށްފައިވޭ
11 ސެޕްޓެމްބަރު 2022 | އާދީއްތަ 06:20ފުލުހުންނަށް ހަމަލާ ދިނީ ހުކުރު ދުވަހު 11:52ހާއިރު، އެމީހުން އޮފް ޑިއުޓީގައި އުޅެނިކޮށް
ކްރިމިނަލް ކޯޓް
ފުލުހުންނަށް ހަމަލާދިން ދެ މީހުން ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން ނިންމައިފިއެވެ.
ފުލުހުންނަށް ހަމަލާ ދިނީ ހުކުރު ދުވަހު 11:52ހާއިރު، އެމީހުން އޮފް ޑިއުޓީގައި އުޅެނިކޮށެވެ. މި ހާދިސާގައި އަނިޔާވި ފުލުހުންނަށް އޭޑީކޭގައި ފަރުވާދެމުން ދާއިރު ފުލުހުންތަކަކަަށް ހަމަލާދިނީ ހެންވޭރުގެ މަޝްހޫރު ގޭންގަކުންކަމަށް، ކޮމިޝަނަރ އޮފް ޕޮލިސް މުޙައްމަދު ޙަމީދު ވަނީ ހުކުރު ދުވަހު ވިދާޅުވެފައެވެ.
ފުލުހުންތަކަކަަށް ހަމަލާދިން މައްސަލައިގައި ދެ މީހުން ފުލުހުންގެ ބެލުމުގެދަށަށް ގެންގޮސްފައިވާއިރު، މި ހަމަލާ ދިނުމުގައި ހަރަކާތްތެރިވި އިތުރު މީހުން ހައްޔަރު ކުރައްވާނެ ކަމަށާއި، ފުލުހުންނަށް ދޭ މިފަދަ ހަމަލާގެ މައްސަަލަތައް ވަރަށް ސީރިއަސްކޮށް ނަންގަވާނެކަމަށްވެސް ސީޕީ ވިދާޅުވިއެވެ. މި މައްސަލާގައި ހައްޔަރުކުރީ އުމުރުން 18 އަހަރުގެ އަހުމަދު އުވައިސް ނަމަކަށް ކިޔާ މީހަކާއި، 20 އަހަރުގެ ޔޫސުފް ސުހައިލް އަލީ މުސްތަފާއެވެ.
ކްރިމިނަލް ކޯޓުން ވަނީ އެ ދެމީހުންވެސް ޝަރީއަތް ނިމެންދެން ބަންދު ކުރުމަށް ނިންމާފައެވެ.
ގާޒީ އިސްމާއިލް ޝަފީއު ނެރުއްވި އަމުރުގައި ވިދާޅުވީ، އަނިޔާ ލިބުނު ފަރާތްތަކަށް ޙަމަލާ ދިނުމުގައި ފަތިބުރިއާއި ގައު ފަދަ ތަކެތި ބޭނުންކޮށްފައިވާ ކަމަށާއި، އަނިޔާވެރިކަމާއެކު ޙަމަލާދީފައިވާ ކަމަށެވެ.
އަނިޔާ ލިބުނު ފަރާތުންވެސް އެމީހުން ދެނެގަނެފައިވާކަމަށް ކޯޓު އަމުރުގައި ބަޔާންކޮށްފައިވެއެވެ.
ފުލުހުންތަކަކަަށް ހަމަލާދިން މައްސަލައިގައި ދެ މީހުން ފުލުހުންގެ ބެލުމުގެދަށަށް ގެންގޮސްފައިވާއިރު، ޙަމީދު ވިދާޅުވީ، ރާވައިގެން ހިންގާ ކުށްތަކާއި މަސްތުވާތަކެއްޗާ ދެކޮޅަށް ކުރާ މަސައްކަތުގައި ފުލުހުން ފަހަތަށް ނުޖެހޭނެކަމަށެވެ. ނަމަވެސް ގޭންގުތަކުގެ ކުށްތަކާއި މަސްތުވާތަކެތީގެ މައްސަލަަތައް ހުއްޓުވޭނީ އެންމެން ގުޅިގެންކަމަށް ސީޕީ ވިދާޅުވިއެވެ.
މުޖުތަމައަށް ޚިދުމަތްކޮށް އާންމުންގެ ސަލާމަތާއި ރައްކާތެރިކަން ކަށަވަރުކުރުމަށާއި ފުލުހުންގެ ރައްކާތެރިކަންވެސް ކަަށަވަރުކުރުމަށް އިތުރު އެއްބާރުލުން ބޭނުންވާކަން ޙަމީދު ފާހަގަކުރެއްވިއެވެ.
ފުލުހުންނަށް ހަމަލާދޭ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ. އެ ވީޑިއޯގައި ފެންނަ ގޮތުގައި، ސައިކަލެއްގައި ވެއްޓިފައި އޮތް މީހަކު ފުލުހުން ނަގައި އެމްބިއުލާންސަކަށް އަރުވައެވެ.
