އިންޑޮނޭޝިއާގެ މެންޓާވައި އައިލެންޑްސް ކައިރިއަށް 6.1 މެގްޓިޑިއުޓްގެ ބާރުމިނުގައި ބިންހެލުމެއް އައިސްފިއެވެ.

ރޮއިޓަރސްގައި ބުނެފައިވަނީ ބިންހެލުން އައިސްފައިވަނީ އިންޑޮނޭޝިއާގެ ސުމަޓްރާގެ ހުޅަނގުން އޮންނަ މެންޓާވީ އައިލެންޑްސް ކައިރިއަށް ކަމަށާއި، މި ބިންހެލުމާއި ގުޅިގެން ސުނާމީއެއްގެ އަރާނެކަމުގެ ބިރުވެރިކަން ނެތް ކަމަށެވެ.

ބިންހެލުން އައިސްފައިވަނީ 27 ކިލޯމީޓަރު އަޑިންނެވެ. އަދި މި ބިންހެލުމަށްފަހު 5.3 މެގްނިޓިއުޑްގެ އިތުރު ބިންހެލުމެއް އައިސްފައިވާ ކަމަށް އިންޑޮނޭޝިއާގެ ޖިއޯ ފިޒިކް އެޖެންސީ (ބީއެމްޖޭޖީ) އިން ބުނެފައިވާކަމަށް ރޮއިޓަރސްގައި ވަނީ ބުނެފައެވެ. އިންޑޮނޭޝިއާގެ ނޫސްތަކާއި ހަވާލާދީ ރޮއިޓަރސްގައި ބުނެފައިވަނީ ބިންހެލުމުގެ ސަބަބުން ލަކުނޑިތަކެއް ބޮލަށް ވެއްޓި މީހަކަށް އަނިޔާވި ކަމަށެވެ.

މީގެ އިތުރުން އިންޑޮނޭޝިއާގެ އިރުމަތީ ސަރަހައްދަކަށް ވެސް އާދިއްތަ ދުވަހު 7.6 މެގްނިޓިއުޑްގެ ބިންހެލުމެއް ވަނީ އައިސްފައެވެ. ރޮއިޓަރސްގައި ބުނެފައިވަނީ މި ބިންހެލުން އައިސްފައިވަނީ ޕަޕުއާ ނިއު ގިނީގެ ވެސް އިރުމަތީ ސަރަހައްދަށް ކަމަށެވެ. މި ބިންހެލުމުގެ ސަބަބުން އިމާރާތްތަކަށް ގެއްލުން ލިބި އާންމުންގެ މެދުގައި ބިރުވެރިކަން ފެތުރުނުކަމަށް ވަނީ ރިޕޯޓްކޮށްފައެވެ.