ބަންގްލަދޭޝް އަށް އައި ބާރުގަދަ ބިން ހެލުމެއްގައި މަދުވެގެން 3 މީހުން މަރުވެއްޖެ
ބަންގްލަދޭޝްގެ ވެރިރަށް ޑާކާގެ ބޭރަށް 5.5 މެގްނިޓިއުޑްގެ ބާރުގަދަ ބިންހެލުމެއް އައިސް މަދުވެގެން 3 މީހުން މަރުވެ އެތައް ބަޔަކު ޒަޚަމްވެއްޖެއެވެ. ހުކުރު ދުވަހުގެ ހެނދުނު އައި މި ބިންހެލުމުގެ ސަބަބުން އިމާރާތްތަކުން ނުކުމެ މީހުން މަގުތަކަށް ޖަމާވެ، އިމާރާތްތަކުގެ ބައިތައް މަގުތަކަށް ވެއްޓި ރައްޔިތުންނަށް ބޮޑު ހާސްކަމެއް ކުރިމަތިވި.
ބާރުގަދަ ބިން ހެލުމެއްގެ އަސަރު ބަންގްލަދޭޝްގެ ވެރިރަށާއި އެތައް ޑިސްޓްރިކްޓްތަކަށް ވަނީ ކޮށްފައި
ބަންގްލަދޭޝް އަށް އައި ބާރުގަދަ ބިން ހެލުމެއްގައި މަދުވެގެން 3 މީހުން މަރުވެއްޖެ އެވެ.
ސިއްހީ އޮފިޝަލުންނާ ހަވާލާދީ ރިޕޯޓުތައް ބުނާ ގޮތުގައި، ބައިބޯ ވެރިރަށް ޑާކާ ގެ ބޭރަށް އައި ބިންހެލުމުގައި ބަޔަކު މަރުވި ކަން ކަށަވަރު ކުރެވިފައި ވާއިރު، އެތައް ބަޔަކު ވަނީ ޒަޚަމްވެފަ އެވެ.
ވެރިރަށް ޑާކާގެ އިމާރާތްތަކަށް ލޮޅުމުގެ އަސަރު ކުރި އިރު އިމާރާތްތަކުން މީހުން ތައް ނިކުމެ މަގުތައް މަތި ތޮއްޖެހުނެވެ. އިމާރާތްތަކުނާއި ބްރިޖުތަކުގެ ބައިތައް ކަނޑައިގެން ގޮސް މަގުތަކަށް ވެއްޓޭ މަންޒަރު ސޯޝަލް މީޑިއާ ގައި ހާމަވެފައިވެ އެވެ.
ޔޫއެސް ޖިއޮލޮޖިކަލް ސާވޭ (ޔޫއެސްޖީއެސް) އިން ބުނީ، 5.5 މެގްނިޓިއުޑްގެ މި ބިންހެލުން އައިސްފައި ވަނީ، ޑާކާ އާ ގާތްގަނޑަކަށް 33 ކިލޯމީޓަރު (16 މޭލު) ދުރުގައިވާ ނަރްސިންގްދީ ސިޓީއާ ކައިރި އަށް، ހުކުރު ދުވަހު ހެނދުނު އެ ގައުމުގެ ގަޑިން 10:38 (04:38 ޖީއެމްޓީ) ގައި ކަމަށެވެ.
ހުކުރު ދުވަހުގެ ހެނދުނު އައި މި ބިންހެލުމުގެ ސަބަބުން ރައްޔިތުން ވަރަށް ބޮޑު ހާސް ކަމެއް ކުރިމަތިވި ކަމަށް ރިޕޯޓުތައް ބުނެ އެވެ. 170 މިލިއަން މީހުންގެ އާބާދީ އެއް އޮންނަ، މުސްލިމް އަޣުލަބިއްޔަތު އޮންނަ މި ޤައުމުގެ ގިނަ މީހުން ބަންދު ދުވަހެއް ކަމުން ޙާދިސާ ހިނގި އިރު ތިބީ ގޭގައެވެ.
ޑާކާ ގައި ހަރަކާތްތެރިވާ އޭއެފްޕީ ގެ ރިޕޯޓަރުންނަށް، މަގުމަތީގައި މީހުން ރޯ މަންޒަރު ފެނުނު އިރު، ބައެއް މީހުން ތިބީ ސިހުމެއްގަ އެވެ.
ސިއްހަތާ ވުޒާރާއިން ބުނީ، މެޑިކަލް ދަރިވަރަކު ހިމެނޭގޮތަށް ތިން މީހަކު މަރުވި ކަމަށެވެ.
ޔޫއެސްޖީއެސް އިން ވަނީ، "މީހުންނަށާއި ތަންތަނަށް ބޮޑެތި ގެއްލުންތަކެއް" ލިބިދާނެކަމުގެ އިންޒާރު ދީފައެވެ.
ބަންގްލަދޭޝްގެ މޫސުމާ ބެހޭ އިދާރާ އިން ބުނި ގޮތުގައި، ބިންހެލުން 26 ސިކުންތަށް ދެމިގެން ދިޔައިރު، އޭގެ އެޕިސެންޓަރ ހުރީ ނަރްސިންގްދީ ގެ މަދަބްދީ އަވަށުގައެވެ. އަދި އެ އިދާރާ އިން ބުނީ ބިންހެލުމުގެ ބާރުމިން ހުރީ 5.7 މެގްނިޓިއުޑް ގައި ކަމަށެވެ.
މި ބިންހެލުމުގެ އެޕިސެންޓަރާ 325 ކިލޯމީޓަރަށްވުރެ ދުރުގައިވާ، އިންޑިއާގެ ކަލްކަތާ ސިޓީ އަށް ވެސް ބިންހެލުމުގެ އަސަރު ވަރަށް ބޮޑަށް ކޮށްފައިވެއެވެ.
އެ ސިޓީގައި ތިބި އޭއެފްޕީގެ ރިޕޯޓަރުން ބުނިގޮތުގައި، ކުއްލިއަކަށް އައި ލޮޅުންތަކާ އެކު މީހުން އޮފީސްތަކުންނާއި ގެތަކުން ބޭރަށް ނިކުމެގެން ދުއްވައިގަތެވެ.
އިންޑިއާގައި މީހަކަށް ގެއްލުމެއް ލިބުނު ކަމުގެ ރިޕޯޓެއް އަދި ލިބިފައެއް ނުވެއެވެ.
