ދިގަލި މޯލްޑިވްސް ބަލިކޮށް ސިޔާމް ވޯލްޑަށް ފުރަތަމަ މޮޅު

އިންޓަ ރިސޯޓު ވޮލީބޯޅަ މުބާރާތުގެ ޒޯން ހައެއްގައި ދިގަލި މޯލްޑިވްސްއާ ދެކޮޅަށް ކުޅުނު މެޗު ކާމިޔާބުކޮށް ސިޔާމް ވޯލްޑުން ފުރަތަމަ މޮޅު ހޯދައިފިއެވެ.

މިއީ ސިޔާމް ވޯލްޑުން މިއަހަރުގެ މުބާރާތުގައި ކުޅުނު ހަތަރުވަނަ މެޗެވެ. ކުރިން ކުޅުނު ތިން މެޗުން ވެސް އެ ޓީމު ބަލިވެފައިވާއިރު، އެއްމެޗުގައި ވަނީ ދެ ސެޓު ކާމިޔާބުކޮށް އެއް ޕޮއިންޓު ހޯދާފައެވެ.

ދިގަލި މޯލްޑިވްސްއާ ދެކޮޅަށް ކުޅުނު މެޗު ސިޔާމް ވޯލްޑުން ކާމިޔާބުކުރީ ސީދާ ތިން ސެޓުންނެވެ. މެޗުގެ ސެޓުތައް އެ ޓީމުން ކާމިޔާބުކޮށްފައިވަނީ 25-16، 25-17 އަދި 25-17 އިންނެވެ. ތިން ސެޓު ވެސް އެ ޓީމުން ކާމިޔާބުކުރީ ރަނގަޅު ލީޑެއްގައި އޮވެއެވެ. މެޗުގެ މޮޅު ކުޅުންތެރިޔަކަށް ހޮވުނީ ސިޔާމް ވޯލްޑުގެ އަޙުމަދުއެވެ.

މެޗުން މޮޅުވެ ލިބުނު ތިން ޕޮއިންޓާއެކު، ޖުމުލަ ހަތަރު ޕޮއިންޓު ހޯދައިގެން ސިޔާމް ވޯލްޑް އޮތީ ތާވަލްގެ ތިން ވަނަ މަގާމުގައެވެ. މިހާތަނަށް ކުޅުނު ތިން މެޗުން ޖޯލި މޯލްޑިވްސް އާއި ޖޯލި ބީން އަށް ލިބެނީ ނުވަ ޕޮއިންޓެވެ. ހަތަރު ވަނައިގައި އޮތް ކޮރަ ކޮރާއަށް ތިން މެޗުން ދެ ޕޮއިންޓު ލިބޭއިރު، ފުލުގައި އޮތް ދިގަލި މޯލްޑިވްސް އަށް އަދި ޕޮއިންޓެއް ނުލިބެއެވެ.

މި ޒޯންގެ ފައިނަލްގެ ފުރަތަމަ ޖާގަ ލިބޭނީ އެންމެ ގިނަ ޕޮއިންޓު ލިބޭ ޓީމަކަށެވެ. ދެވަނަ ޓީމާއި ތިންވަނަ ޓީމު ޖެހޭނީ ޕްލޭ އޮފް މެޗެއް ކުޅޭށެވެ. މިއަހަރުގެ އިންޓަ ރިސޯޓު މުބާރާތުގެ ނަމަކީ ގޯލްޑަން އިޔަރ އިންޓަ ރިސޯޓު ވޮލީ މުބާރާތެވެ. އެއީ ރާއްޖޭގެ ޓުވަރިޒަމަށް 50 އަހަރު ފުރޭ މުނާސަބަތާ ގުޅުވައިގެންނެވެ.