ޒޯން ފަހެއްގެ ފުރަތަމަ މެޗު އަމިއްލަފުއްޓަށް

އިންޓަރ ރިސޯޓު ވޮލީބޯޅަ މުބާރާތުގެ ޒޯން ފަހެއްގައި ކުޅުނު ފުރަތަމަ މެޗު އަމިއްލަފުށިން ކާމިޔާބުކޮށްފިއެވެ.

މި ޒޯންގެ ފުރަތަމަ މެޗުގައި އަމިއްލަފުށިން ވާދަކޮށްފައިވަނީ ވަކަރު މޯލްޑިވްސްއާއެވެ. މެޗު އަމިއްލަފުށިން ކާމިޔާބުކުރީ ވަކަރު މޯލްޑިވްސް އިން ފުރަތަމަ ސެޓު ހޯދާފައިވަނިކޮށް، ފަހަތުން އަރައި ތިން ސެޓު ހޯދައިގެންނެވެ.

ފުރަތަމަ ސެޓު ވަކަރު މޯލްޑިވްސް އިން ކާމިޔާބުކޮށްފައިވަނީ ބޮޑު ތަފާތަކުންނެވެ. ސެޓު ފަށައިގެން ރަނގަޅު ލީޑެއްގައި އޮވެ، ވަކަރު މޯލްޑިވްސް އިން ސެޓު ނިންމާލީ 25-11 އިންނެވެ. ނަމަވެސް ޖެހިގެން އައި ސެޓު އަމިއްލަފުށިން ވަނީ ކާމިޔާބުކޮށްފައެވެ. ވާދަވެރިކޮށް ދިޔަ ސެޓުގެ ފަހު ވަގުތު ލީޑު ނަގައި، އަމިއްލަފުށިން މި ސެޓު ހޯދީ 25-21 އިންނެވެ. ޖެހިގެން އައި ދެ ސެޓު އަމިއްލަފުށިން ހޯދީ ރަނގަޅު ލީޑެއްގައި އޮވެއެވެ. އެއީ 25-18 އަދި 25-19 އިންނެވެ.

މި ޒޯންގައި ވެސް ފަސް ޓީމެއް ވާދަކުރެއެވެ. އެއީ އަމިއްލަފުއްޓާއި، ވަކަރު މޯލްޑިވްސްގެ އިތުރުން، އަނަންތަރަ ކަޅިރަވަ، ސޮނެވާ ފުށި އަދި ދުސިތު ތާނީ އެވެ.

މިއަހަރުގެ އިންޓަ ރިސޯޓު މުބާރާތުގެ ނަމަކީ ގޯލްޑަން އިޔަރ އިންޓަ ރިސޯޓު ވޮލީ މުބާރާތެވެ. އެއީ ރާއްޖޭގެ ޓުވަރިޒަމަށް 50 އަހަރު ފުރޭ މުނާސަބަތާ ގުޅުވައިގެންނެވެ.