ރާއްޖެއަށް އެތެރެކުރާ ކަރަންޓު ސާމާނަކީ ވަކި ފެންވަރެއްގެ ތަކެތިކަން ޔަގީންކުރުމަށް ފަށާފައިވާ ހަކަތަރި ޕްރޮގްރާމުގެ, ދަށުން ރަންފައުނު ޕްރައިވެޓް ލިމިޓެޑުން އެތެރެކުރާ ކަރަންޓު ސާމާނުގެ ތެރެއިން 4 އެއަރ ކޮންޑިޝަނަރ މޮޑެލްއެއް، ހަކަތަރި ޕްރޮގްރާމަށް ފެތޭ ތަކެތި ކަމުގައި ކަނޑައަޅައިފިއެވެ.

މި 4 މޮޑެލްގައި ހަކަތަރި ލޭބަލް ޖެހުމަށް ވަނީ އެ ކުންފުންޏަށް ހުއްދަ ދޫކޮށްފައެވެ. މިއީ ހަކަތަރި ލޭބަލް ޖެހުމަށް ހުއްދަދޫކުރި ދެވަނަ ކުންފުންޏެވެ.

ކަރަންޓު ބޭނުންކުރާ މިންވަރާއި ހަކަތަ ސަމަކާރަ މިންވަރު އަންގައިދޭ ހަކަތަރި ލޭބަލް ހުންނާނީ އެކަކުން ފެށިގެން ފަހަކާ ހަމައަށް، ދަރަޖަ ގިންތި ކުރެވިފައެވެ. އެގޮތުން އެންމެ ފުރަތަމަ ދަރަޖައިގެ ލޭބަލަކީ ހަކަތަ ސަމަކާރަ މިންގަނޑަށް ފެތޭ އެންމެ ދަށްމިންވަރު އަންގައިދޭ ލޭބަލެވެ. އަދި ފަސްވަނަ ދަރަޖައިގެ ލޭބަލަކީ ހަކަތަ ސަމަކާރަ މިންގަނޑުގެ އެންމެ މަތީ ދަރަޖަ އަންގައިދޭ ލޭބަލެވެ. ހުއްދަ ދޫކުރެވުނު މޮޑެލްތަކަށް ވަނީ 5 ތަރި ލިބިފައެވެ. ހަކަތަރި ލޭބަލުން ކޮންމެ އަހަރަކު ބޭނުންކުރާނެކަމަށް އަންދާޒާ ކުރެވޭ ކަރަންޓުގެ މިންވަރުވެސް އެނގޭނެއެވެ. މި ލޭބަލުން އަދިވެސް އޭސީއާގުޅޭ އިތުރު މައުލޫމާތު ލިބިގެންދާނެއެވެ.

ހަކަތަރި ޕްރޮގްރާމްގައި ރަޖިސްޓްރީވުމަކީ ވިޔަފާރިތަކަށް އަދި އިޚްތިޔާރީކަމެކެވެ. މި ޕްރޮގުރާމް ހިންގުމަށް ހަމަޖެހިފައިވަނީ އިމްޕޯޓުކުރާ ފަރާތްތަކުން މިޕްރޮގްރާމުގައި ރަޖިސްޓްރީވުމަށްފަހުއެވެ. މި ޕްރޮގްރާމުގެ ދަށުން ފުރަތަމަ ލޭބަލް ޖެހުމަށް ހަމަޖެހިފައިވަނީ އައިސްއަލަމާރި، އޮޓޮމެޓިކް ދޮންނަމެޝިން އަދި އެއަރކޮންޑިޝަނަރގައެވެ. ލޭބަލް ޖެހުމަށް ހުއްދަ ދެވިފައިވާ އާލާތްތައް ގަންނަ ފަރާތްތަކަށް ވިއްކުމުގެ ކުރިން އެތަކެތީގައި ލޭބަލް ހަރުކުރަން ޖެހޭނެއެވެ. މިނިސްޓްރީގެ އަމާޒަކީ 2024 ވަނަ އަހަރުން ފެށިގެން ރާއްޖޭގެ ބާޒާރަށް އެތެރެކުރާ އޭސީ، އައިސް އަލަމާރި، އަދި ދޮންނަ މެޝިނަކީ ހަކަތަރި މިންގަނޑަށް ފެތޭ ތަކެތިކަމަށް ހެދުމެވެ.

ހަކަތަރި ޕްރޮގްރާމް އެކުލަވާލާފައިވަނީ، ގްލޯބަލް އެންވަޔަރަމަންޓް ފެސިލިޓީ (ޖެފް)ގެ އެހީއާއެ،ކު އދ.ގެ ތިމާވެއްޓާބެހޭ ޖަމްއިއްޔާ، ޔުނައިޓެޑް ނޭޝަންސް އެންވަޔަރަމަންޓް ޕްރޮގްރާމް (ޔޫ.އެން އެންވަޔަރަންމަންޓް)އާ ގުޅިގެން، މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ހިންގަމުން އަންނަ "ސްޓްރެންތެނިންގ ލޯ ކާބަން އެނަރޖީ އައިލެންޑް ސްޓްރެޓެޖީސް" މަޝްރޫއުގެ ދަށުންނެވެ. މިމަޝްރޫއުގެ މައިގަނޑު މަގުސަދަކީ، އިމާރާތްތަކުން ޖައްވަށް ބޭރުކުރެވޭ ވިހަގޭސް (ގްރީންހައުސް ގޭސް) މަދުކޮށް މިދާއިރާއިން ހަކަތަ އިސްރާފުކުރުން މަދުކުރުމާއި، އަދި ތިމާވެއްޓާ ރައްޓެހިގޮތުގައި ހަކަތަބޭނުންކުރުން އިތުރުކުރުމެވެ.