ސިޔާސީ މަޤާމުތައް މަދެއް ނުވި، އެންވަޔަރމަންޓް މިނިސްޓްރީއަށް އަނެއްކާވެސް އައު ޑެޕިއުޓީ މިނިސްޓަރެއް އައްޔަނުކޮށްފި
3 ޖުލައި 2024 | ބުދަ 09:18މިނިސްޓްރީގައި މިހާރުވެސް 47 ސިޔާސީ މުވައްޒަފުން އެބަތިބި
އެންވަޔަރމަންޓް މިނިސްޓްރީގެ ރަސްމިއްޔާތެއްގެ ތެރެއިން
އެންވަޔަރމަންޓް މިނިސްޓްރީއަށް އަނެއްކާވެސް އައު ޑެޕިއުޓީ މިނިސްޓަރެއް އައްޔަނުކޮށްފިއެވެ.
އެ މަޤާމަށް އައްޔަނު ކޮށްފައިވަނީ ފަޒުނާ ޖަލީލެވެ. އޭނާއަކީ ނެޓްބޯލް އެސޯސިއޭޝަންގެ ރައީސްގެ މަގާމުގައި ހުންނެވި ފަރާތެވެ.
އެންވަޔރމަންޓް މިނިސްޓްރީގައި މިހާރުވެސް 47 ސިޔާސީ މުވައްޒަފުން އެބަތިބިކަމަށް އެ އިދާރާގެ ވެބްސައިޓުން ދައްކައެވެ. އެގޮތުން މިހާރުވެސް 14 ޑެޕިއުުޓީ މިނިސްޓަރުންނާއި، 7 ސްޓޭޓް މިނިސްޓަރުންގެ އިތުރުންވެސް އިތުރު ސިޔާސީ މަޤާމުތައް އެ މިނިސްޓްރީގައި އެބަހުއްޓެވެ.
މި ސަރުކާރުން ވެރިކަމަށް އައީ އެމްޑީޕީގެ ސަރުކާރުން ސިޔާސީ މުވައްޒަފުން ގިނަކަމަށް ބުނެ ފާޑުކިޔުމަށްފަހުގައި 700ށް ވުރެ ސިޔާސީ މުވައްޒަފުންގެ އަދަދު އިތުރުނުކުރާނެކަމުގެ ވައުދާއެކުއެވެ. ނަމަވެސް ސިޔާސީ މުވައްޒަފުންގެ އަދަދު އެތައް ގުނައެއް އިތުރުވެފައިވާއިރު، އެ އަދަދު ހާމަކުރަން ސަރުކާރުން ދަނީ ދެކޮޅު ހަދަމުންނެވެ.
