ފެންގަނޑު ބޮޑުވުމުން ފުރާޅުމަތީ ކޭމްޕު ޖެހިތަނާ، ވިހެއުމުގެ ވޭންވަރު އައުމުން ދެން ހެދީ ކިހިނެތްކަން އެނގޭތަ؟

ޕާކިސްތާނުގެ ސިހްވާން ސިޓީގައި ކުލިނިކަށް ދެވެން އޮތް ހުރިހާ މަގެއް އޮތީ ފެނު އަޑީގައެވެ. ބަނޑުގައި އޮތް ދަރިފުޅު މި ދުނިޔެއަށް އުފަންކުރުމަށްޓަކައި ހޮސްޕިޓަލަށް ދިއުމަށް، ބޮޑުވެފައިވާ ފެންގަނޑު ތެރޭގައި ބޯޓަކަށް އަރައިގެން 3 ގަޑިއިރު ވަންދެން ރުބީނާ މައްލާ ކުރީ ބިރުވެރި، ނާމާން ދަތުރެކެވެ.

އުމުރުން 27 އަހަރުގެ ރުބީނާއަކީ، ޕާކިސްތާނުގެ ތާރީޚު ނުދެކޭފަދަ ގަދަ ވިއްސާރައާއި ފެންބޮޑުވުމުގެ ހާދިސާގައި ތަކުލީފު އުފުލަން ޖެހިފައިވާ އެތައް ހާސް މާބަނޑު އަންހެނުންގެ ތެރެއިން އެކަކެވެ. ފެންބޮޑުވުމުގެ ހާދިސާތަކުގައި ޕާކިސްތާނުގެ ތިންބައިކުޅަ އެއްބައި އޮތީ ފެނު އަޑީގައެވެ. އެ ކަމުގެ އަސަރު 33 މިލިއަނެއްހާ މީހުންނަށް ކޮށްފައިވާއިރު، ގިނަ ބަޔަކު މިވަގުތު ތިބީ ކޭމްޕުތަކުގައެވެ.

ބޮޑުވެފައިވާ ފެންގަނޑުގެ ތެރެއިން ހޮސްޕިޓަލަށް ދާނެ ގޮތަކާމެދު މާޔޫސްކަން އުފެދިގެން އައި ވަގުތުގެ ވާހަކަ މީޑިއާއާ ހިއްސާކުރަމުން ދިޔައީ، ރުބީނާގެ 1 ދުވަސްވީ ދަރިފުޅު މުޙައްމަދު ޠައްޔިބު، ގަޔާލައި ބޮނޑިކޮށްލައިގެން އިނދެއެވެ.

ޠައްޔިބު އޭނާގެ ހަޔާތުގެ ފުރަތަމަ ދުވަސްވެސް ހޭދަކުރީ ސްކޫލެއްގައި ގާއިމުކޮށްފައިވާ ވަގުތީ ހިޔަލެއްގައެވެ. އަމިއްލަ ވަޒަނުގެ ރަށްބޭރުގައެވެ. އެއީ މިއަދު ޕާކިސްތާނުގެ އެތައް މިލިއަން ބަޔަކަށް އުޅެން ޖެހިފައިވާ ހާލެވެ.

ރުބީނާގެ ފިރިމީހާ، މުޝްތާޤް މައްލާ ކިޔައިދިންގޮތުގައި، އޭނާގެ އާއިލާއިން އަމިއްލަ ގޭގައި މަޑުކުރުމަށް އެންމެ ފުރަތަމަ ނިންމީ، ދާނެ އިތުރު ތަނެއް ނެތީމައެވެ. ކޭމްޕުޖެހީ އަމިއްލަ ގޭގެ ފުރާޅުމަތީގައެވެ. ރުބީނާގެ ބަނޑުގައި ރިއްސަންފެށީ، ރޭގަނޑު 10 ޖަހަނިކޮށެވެ. އެހާހިސާބުން ބޯޓެއްގައި ހޮސްޕިޓަލަށް ގެންދެވުނީ އަނެއްދުވަހުގެ ހެނދުނުއެވެ.

ރުބީނާ ވިހަން ދިޔަ ޢަބްދުﷲ ޝާހް އިންސްޓިޓިއުޓް ހުންނަނީ އޭނާ ދިރިއުޅެމުން ދިޔަ ގެއާ ގާތްގަނޑަކަށް 15 ކިލޯމީޓަރު ދުރުގައެވެ. ފެންގަނޑު ބޮޑުވެފައި ނެތްނަމަ އެއީ އިންތިހާއަށް ފަސޭހަ ދަތުރެކެވެ.

ހޮސްޕިޓަލުގައި މަސައްކަތް ކުރައްވާ ގައިނަކޮލިޖިސްޓް، ޑރ. ނާއިލާ ޤުރައިޝީ ވިދާޅުވީ، ކައިރި ހިސާބުތަކުން ދުވާލެއްގެ މައްޗަށް 150އެއްހާ މާބަނޑު މީހުން އޯޕީޑީއިން ޚިދުމަތް ހޯދާކަމަށެވެ.

ސެޕްޓެމްބަރު 6 ވަނަ ދުވަހުން ފެށިގެން އެކަނިވެސް، ގެދޮރު ގެއްލިފައިވާ 6 އަންހެނަކު ވަނީ ޢަބްދުﷲ ޝާހް އިންސްޓިޓިއުޓްގައި ވިހާފައެވެ. އަދި އެކަކު ވަނީ ސިޒޭރިއަން ހަދާފައެވެ.

ޢަބްދުﷲ ޝާހް އިންސްޓިޓިއުޓްއަށް ވިހަން ގޮސް އިން އުމުރުން 32 އަހަރުގެ ދިލްޝާދު އަލާހްވަރަޔޯވެސް އެ ހޮސްޕިޓަލަށް ދިޔައީ ބޯޓެއްގައެވެ.

އދ.ގެ އާބާދީއާބެހޭ ޖަމްއިއްޔާ (ޔޫއެންއެފްޕީއޭ)ގެ ރެކޯޑްތަކަށް ބަލާއިރު، ފެންބޮޑުވުމުގެ ހާދިސާގެ ސަބަބުން އިންސާނީ އެހީ ބޭނުންވެފައިވާ މީހުންގެ ތެރެއިން 138000 މީހުންނަކީ މާބަނޑު މީހުންނެވެ. އަދި އޭގެ ތެރެއިން 40000 މީހުންނަކީ މި ސެޕްޓެމްބަރު މަހު ވިހާނެކަމަށް ބެލެވޭ މީހުންނެވެ. 

ފެންބޮޑުވުމުގެ ހާދިސާގެ ކުރިންވެސް، ވިހެއުމުގެ ތެރޭގައި މައިން މަރުވުމުގެ ނުތަނަވަސްކަމަކީ ޕާކިސްތާނުގައި ބޮޑުވެފައިވާ މައްސަލައެކެވެ.