ދެކުނު ކޮރެޔާގެ ކާރުޕާކެއްގައި ބޮޑުވި ފެނަށް ޤަރަޤުވެގެން ހަތް މީހުން މަރުވެއްޖެ

ދެކުނު ކޮރެޔާއަށް ބާރުގަދަ ތުފާނެއް އަރާ ބޮޑެތި ގެއްލުންތައް އަދިވެސް ލިބެމުން ދާކަމަށް ޚަބަރު ލިބިއްޖެ އެވެ. އަންގާރަ ދުވަހުގެ ރޭ ހިނގި ހާދިސާއެއްގައި ބިމުއަޑީގައި ހަދާފައިވާ ކާރު ޕާކުކުރާ ތަނެއްގައި ވަރަށް ބޮޑަށް ފެން ބޮޑުވެ، އެފެންގަނޑަށް ޤަރަގުވުމުގެ ސަބަބުން ހަތް މީހުން މަރުވެފައި ވެއެވެ. މަރުވި މީހުން ދިޔައީ އަވަހަށް ކާރު އެތަނުން ނެރެން ކަމަށާއި ނަމަވެސް އެއަށް ވުރެކުރިން ފެންގަނޑު އެތާތެރެޔަށް ދެމިގަތީ ކަމަށް ވެއެވެ. އެހީގެ މަސައްކަތުގައި އުޅުނު މީހުން ބުނިގޮތުގައި ކާރު ޕާކިންގެ ސީލިންގައި އަޅާފައިވާ ހޮޅިބައިގައި އެލިގެން 12 ވަރަކަށް ގަޑި އިރު ތިބި ދެމީހުން ސަލާމަތް ކުރެވިފައި ވެއެވެ.

ހަތް މީހުންގެ މަރާއި ގުޅިގެން ރައީސް ޔޫން ސުކް ޔިއޯލް ވަނީ ތައުޒިޔާ ވިދާޅުވެފައެވެ. އަދި މި ކާރިސާ ހިއްޕުޅަށް އަރާވަރުން ރޭ އަވަހާރަފުޅު ވެސް ނުލެއްޕެވުނު ކަމަށް ވިދާޅުވެފައި ވެއެވެ.

ތޫފާން ހިންނަމްނޯރު ދެކުނު ކޮރެޔާ އަށް އެރީ އާދީއްތަ ދުވަހު އެވެ. މިއީ މިހާތަނަށް އެގައުމަށް އެރި އެންމެ ބާރުގަދަ ތޫފާން ކަމަށް ޚަބަރުތައް ބުނެއެވެ.

މިއަދު ރިޕޯޓް ކުރެވުނު ބައެއް ހާދިސާތަކުގެ ތެރޭގައި ދެތަނެއްގައި އަލިފާންރޯވުން ހިމެނެއެވެ. ތުފާންގެ ސަބަބުން އެންމެ ބޮޑަށް ގެއްލުން ލިބުނު ޕޯހެންގ ސިޓީގައި ބައެއް އިމާރާތްތައް އަރި އަޅާލާފައިވާއިރު އެހެން ބޮޑެތި ގެއްލުންތައް ވެސް ވެފައި ވެއެވެ. މިގޮތުން އަތިރި މަތީގެ ހިސާބުތަކަށް ރާޅު އަރާ އަދި ވައިގަދަވުމުގެ ސަބަބުން ބައެއް ގަސްތައް ވެއްޓި އެކި ގެއްލުންވެފައި ވެއެވެ.

ތޫފާން ހިންނަމްނޯރުގެ ސަބަބުން މަރުވި މީހުންގެ އަދަދު މިހާރު ވަނީ 10 އަށް އަރާފައެވެ.

ތޫފާންގެ ސަބަބުން ބޫސާން ސިޓީ އަދި އުލްސާންސިތީއަށް ވެސް ވަނީ ބޮޑެތި ގެއްލުންތައް ލިބިފައެވެ.