ޗެލްސީގެ ކޯޗުކަމުން ތޯމަސް ޓުޗެލް ވަކިކޮށްފި
ޗެލްސީގެ ބަޔާނުގައި ބުނީ ކުލަބުގެ އައު އޯނަރޝިޕުން ކުލަބާ ހަވާލުވިތާ 100 ދުވަސް ވެގެންދާއިރު، ކުލަބުގެ ކުރިމަގަށް މިއީ މި ނިންމުން ނިންމަން ޖެހުނު އެންމެ ރަނގަޅު ވަގުތު ކަމަށް
ޗެލްސީގެ ކޯޗު ތޯމަސް ޓުޗެލް
ޗެލްސީގެ ކޯޗުކަމުގެ މަގާމުން ތޯމަސް ޓުޗެލް ވަކިކޮށްފިއެވެ.
އެކަން ހާމަކޮށްފައިވަނީ ޗެލްސީން މިއަދު އާންމުކޮށްފައިވާ ބަޔާނެއްގައެވެ. އެ ބަޔާނުގައި ވަނީ ޗެލްސީގެ ކޯޗުކަމުގެ މަގާމުގައި ހުރެ ޓުޗެލް އެ ޓީމަށް ކޮށްދީފައިވާ ޚިދުމަތްތަކަށް ޝުކުރު އަދާކޮށްފައެވެ. މީގެ އިތުރުން އެ ބަޔާނުގައި ވަނީ ޗެލްސީގެ ތަރީޚުގައި ޓުޗެލްގެ ނަން ފާހަގަކުރެވިގެން ދާނެ ކަމަށެވެ. އޭނާ ވަނީ ޗެލްސީއާއެކު ގިނަ ކާމިޔާބީތަކެއް ހޯދާފައެވެ.
މީގެ އިތުރުން ޗެލްސީގެ ބަޔާނުގައި ބުނީ ކުލަބުގެ އައު އޯނަރޝިޕުން ކުލަބާ ހަވާލުވިތާ 100 ދުވަސް ވެގެންދާއިރު، ކުލަބުގެ ކުރިމަގަށް މިއީ މި ނިންމުން ނިންމަން ޖެހުނު އެންމެ ރަނގަޅު ވަގުތު ކަމަށެވެ. އިތުރަށް އެ ބަޔާނުގައި ބުނީ ޓީމުގެ ކޯޗިން ސްޓާފުންގެ ތެރޭގައި ހިމެނޭ ފަރާތަކުން ކުރިއަށް އޮތް ދުވަސްތަކުގައި ޓީމުގެ ފަރިތަކުރުންތަކާއި، މެޗުތަކަށް ޓީމާ ހަވާލުވާނެ ކަމަށެވެ.
ޗެލްސީގެ ކޯޗުކަމާ ޓުޗެލް ހަވާލުވެފައިވަނީ 2021 ވަނަ އަހަރުއެވެ. މަދު ދުވަސްކޮޅެއްގެ ތެރޭގައި އޭނާ ވަނީ އެ ޓީމަށް ގިނަ ކާމިޔާބީތަކެއް ހޯދައިދީފައެވެ. އޭނާ ވަނީ ޗެލްސީއާއެކު ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕާއި، ފީފާ ކުލަބް ވޯލްޑް ކަޕް ކާމިޔާބުކޮށްފައެވެ. މީގެ އިތުރުން އެފްއޭ ކަޕާއި ކަރަބޯ ކަޕްގެ ރަނަރަޕްކަން ހޯދާފައިވެއެވެ.
ޗެލްސީގެ ކޯޗުކަމުގެ މަގާމުން ޓުޗެލް ވަކިކޮށްފައިވާއިރު، މި ސީޒަންގެ ޗެމްޕިއަންސް ލީގުގައި ކުޅުނު ފުރަތަމަ މެޗުން ޗެލްސީ ވަނީ ބަލިވެފައެވެ.
