އިންޓަރ ރިސޯޓު ވޮލީބޯޅަ މުބާރާތުގެ ޒޯން ހައެއްގައި ސިޔާމް ވޯލްޑާ ދެކޮޅަށް ކުޅުނު މެޗު ފަހަތުން އަރައި ކޮރަ ކޮރާއިން ކާމިޔާބުކޮށްފިއެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗު ކޮރަ ކޮރާއިން ކާމިޔާބުކުރީ ތިން ސެޓު ދެ ސެޓުންނެވެ. މެޗުގެ ފުރަތަމަ ދެ ސެޓު ސިޔާމް ވޯލްޑުން ކާމިޔާބުކުރީ ވާދަވެރި ކުޅުމަކަށްފަހުއެވެ. ފުރަތަމަ ސެޓު އެ ޓީމުން ހޯދީ 25-23 އިންނެވެ. އަދި ދެ ވަނަ ސެޓު ހޯދީ 25-20 އިންނެވެ. ފަހު ސެޓުން ކާމިޔާބުކޮށް، ސިޔާމް ވޯލްޑްއިން ސީދާ ތިން ސެޓުން މެޗު ކާމިޔާބުކުރުމާ ދިމާލަށް ދަނިކޮށް، ކޮރަ ކޮރާއިން ވަނީ ތިން ވަނަ ސެޓު ހޯދާފައެވެ. އެއީ ވާދަވެރި ކުޅުމެއްގައި 25-23 އިންނެވެ.

ތިން ވަނަ ސެޓު ކާމިޔާބުކޮށް ލިބުނު އުންމީދުގައި ނުކުމެ ކޮރަ ކޮރާއިން ވަނީ ހަތަރު ވަނަ ސެޓު ވެސް ކާމިޔާބުކޮށް މެޗު ހޯދުމުގެ އުންމީދު ގެނުވާފައެވެ. ހަތަރު ވަނަ ސެޓުގައި ކޮރަ ކޮރާއިން ސިޔާމް ވޯލްޑްގެ މައްޗަށް ކުރި ހޯދީ 25-19 އިންނެވެ. ފަހު ސެޓަށް ނުކުމެ ރަނގަޅު ކުޅުމެއް ދައްކައި ކޮރަ ކޮރާއިން މި ސެޓު ވެސް ހޯދިއެވެ. ކުރިން ސެޓުތަކާ ޚިލާފަށް ކޮރަ ކޮރާއިން މި ސެޓު ހޯދީ ރަނގަޅު ލީޑެއްގައި އޮވެއެވެ. އެއީ 15-07 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ކޮރަ ކޮރާގެ ސައިފްއެވެ.

މި ޒޯންގައި ވާދަކުރާ ޓީމުތަކަކީ، ސަން ޝިޔާން އިރުފުށި، ކޮރަ ކޮރަ މޯލްޑިވްސް، ޖޯލި ބީން އަދި ދިގަލި މޯލްޑިވްސްއެވެ. މި ޒޯންގެ ފައިނަލްގެ ފުރަތަމަ ޖާގަ ލިބޭނީ އެންމެ ގިނަ ޕޮއިންޓު ލިބޭ ޓީމަކަށެވެ. ދެ ވަނަ ޓީމާއި ތިން ވަނަ ޓީމު ޖެހޭނީ ޕްލޭ އޮފް މެޗެއް ކުޅޭށެވެ.

މިއަހަރުގެ އިންޓަ ރިސޯޓު މުބާރާތުގެ ނަމަކީ ގޯލްޑަން އިޔާ އިންޓަ ރިސޯޓު ވޮލީ މުބާރާތެވެ. އެއީ ރާއްޖޭގެ ޓުއަރިޒަމަށް 50 އަހަރު ފުރޭ މުނާސަބަތާ ގުޅިގެންނެވެ.