ވޯލްޑްކަޕް ފުޓްބޯޅަ މުބާރާތަށް ގަތަރަށް ދިއުމަށް ކޮންމެހެން ބޭނުންވާ ހައްޔާކާޑު މިހާތަނަށް ދެލައްކަ ފަސްދޮޅަސްހާސް މީހުންނަށް ދޫކޮށްފިނަމަ ގަތަރުން ބުނެފި އެވެ.

މެދުއިރުމަތީގައި ބާއްވާ ފުރަތަމަ ވޯލްޑްކަޕުގެ މެޗުތައް ބަލަން ގަތަރަށް އެތެރެވެވޭނީ ހައްޔާ ކާޑު އޮވެގެންނެވެ. މި ކާޑު ލިބޭނީ ވޯލްޑްކަޕް ޓިކެޓެއް ލިބިފައިވާ ފަރާތަކަށް އެކަންޏެވެ. ހައްޔާކާޑަކީ ނޮވެމްބަރު 20 އިން ޑިސެމްބަރު 18 އަށް ގަތަރުގައި ބާއްވާ ވޯލްޑްކަޕުގައި ގަތަރަށް ވަނުމަށް ބޭނުންވާ އެންމެހާ ހުއްދަތައް ހިމެނޭ ކާޑެވެ. މިކާޑު ލިބޭ ފަރާތްތަކަށް ގަތަރަށް އެތެރެވުމަށް ވިސާނަގާކަށް ނުޖެހޭނެ އެވެ.

ގަތަރުގެ އެގްޒެކްޓިވް ޑިރެކްޓަރ އޮފް ހައްޔާ ޕްލެޓްފޯމް ސައީދު އަލް ހުވާރީ ބުނީ ހައްޔާ ކާޑު ބޭނުންވާ ފަރާތްތަކަށް ޓިކެޓާއެކު ހުށަހެޅުމުން ގިނަވެގެން ފަސް ދުވަސްތެރޭގައި ކާޑު ދެމުންދާ ކަމަށެވެ. މި ގޮތުން ގަތަރުގައި ހުރެގެން މިކާޑު ބޭނުންވާ އެދޭ ފަރާތްތަކަށް ތިން ދުވަސް އަދި އެހެން ގައުމެއްގައި ހުރެގެން އެދޭ ފަރާތްތަކަށް ފަސް ދުވަސް ތެރޭގައި ކާޑު ލިބޭނެ އިންތިޒާމް ހަމަޖައްސައިފާ ކަމަށެވެ. މި ކާޑުގެ މުއްދަތު ވޯލްޑްކަޕް ނިމޭތާ 12 ދުވަސްތެރޭގައި ހަމަވާނެ އެވެ.

ހައްޔާ ކާޑަކީ ޕާސްޕޯޓްގެ ބަދަލުގައި ވޯލްޑްކަޕް ދުވަސްވަރު ގަތަރަށް އެތެރެވާ ފަރާތްތަކުގެ އެންމެހާ މައުލޫމާތު ހިމެނޭ ކާޑެވެ. މި ކާޑު ވޯލްޑްކަޕް ދުވަސްވަރު ގަތަރާ އަވަށްޓެރި ޔޫއޭއީ އާއި ސައޫދީގައި ވެސް ބޭނުންކުރުމަށް އެދެގައުމުން މިހާރުވަނީ ނިންމާފައެވެ.

ފީފާ އާއި ގަތަރުން ލަފާކުރާ ގޮތުގައި ވޯލްޑްކަޕް ދުވަސްވަރު ގަތަރަށް 1.5 މިލިއަނަށްވުރެ ގިނަ މީހުން ޒިޔާރަތްކުރާނެ އެވެ.